【王道】《我每晚都會發畀阿哥追殺嘅惡夢》: 第二十二章————憂鬱的八字眉（楓篇）
「佢....冇出現到.....」Hugo雙目無神，雙手垂下頹然而坐。
「吓！冇理由架，約啱哂時間地點架。」
「我信你呀....佢可能...純粹唔想識我....」
「我諗唔會嘅，聽Marla講佢都係個好女仔嚟。」
「佢的確係。」Hugo嘆了一口長氣：「算啦，等我沉澱下先。」
一直到了放學，Hugo獨自前去書店閱讀散心，他不敢妄自揣測女孩的心思，只望自己對她的這份心意能夠在某日傳遞，現在受了挫折，唯有找找事做，把思緒淡忘。
「這個世界容許了太多自作多情，有人被女人斜著眼睛瞟了一眼，就覺得自己是萬人迷」Hugo手中正翻著一本由夏目漱石著作，名為《我是貓》的書。
他心中暗想，其實有時候就是一個眼神、一個笑容便足以令對方著迷，就好像自己當天初次遇見那個她這般。
而意想不到的是，Hugo在這地方重遇那個令他如痴如醉的眼神，Stephy正正就在前方閱讀書本。
Stephy看書看得入迷，她的烏黑髮絲扎成一把清爽的單馬尾，與社交平台上的照片有所差別，照片上的她看起來像是陽光正面，有著健康體魄的運動少女，但現實中卻給人一種冰冷高傲的感覺，散發著不可隨便靠近的氣場。
Hugo手上的書本已沒有比這女孩更大的吸引力，已把所有注意力轉移到她身上，不過看見Stephy邊走邊看，快要步近書店的防盜器。
嗶—嗶—嗶—嗶—！
「喂小姐，你做咩？你知唔知偷嘢係犯法？」書店職員立刻上前截住Stephy。
「吓，唔好意思，我睇得太入神，而家會去畀翻錢。」Stephy解釋。
「唔使講咁多啦，你地班𡃁仔𡃁妹成日係到打書釘死都唔買，而家仲想偷書走？」職員似乎已對年輕人有很深成見。
「我真係一時唔記得，唔係想偷嘢呀。」Stephy有氣沒力地說。
「你唔好側側膊，有咩同警察講啦。」職員決意把事情鬧大。
「等一等。」Hugo看見意中人有危機，自然就想辦法幫忙解圍，跟著上前說話：「佢都未走出書店範圍。」
「我唔理，我懷疑有人偷嘢已經可以報警！」職員不聽勸告。
「既然佢未走出去，咁點解防盜器會響？會唔會係反應過敏，定抑或偷嘢嘅係另有其人？」Hugo把極具說服力的推理說出來。
「............. 」職員一時回駁不到：「最近防盜器就係佢！唔係佢仲有邊個。」
「啊，唔好意思，係我。」一名男子捧著六、七本書，書本疊起來幾乎擋住了他的臉：「我最近練緊偷嘢，點知都係失敗。」
在場的人都詫異這個陌生男子的出現，竟然偷走了一疊書而無人察覺，那男子披頭散髮，皮膚蒼白，卻又不是病態般的白，最令人印象深刻是他眼上那雙憂鬱的八字眉。
「上網睇啲人話道閘係裝飾，點知真係有用，唔知係咩原理呢。」那男子說。
職員頓時反應不來，看著這奇怪男子啞口無言，而Hugo就趁機叫Stephy放下書本，二人抽身離開店舖。
「本書....我真係想買架....」Stephy說。
「我知，我信你唔係啲咁嘅人。」Hugo回話。
「唔係呀，我話做咩唔畀我買埋先就拉我走。」
「吓...呃....咁翻去買？」
「咁又唔使，我諗件事應該搞到好大，翻去一定好麻煩，我最憎就係啲麻煩嘢。」Stephy看著Hugo：「不過點都好，頭先唔該哂你幫我。」
「唔好咁講，我只係講個事實出嚟。」
「而家已經好少人會肯出聲幫人，除咗你，個個都只會當睇唔到。」
咕嚕嚕嚕—
Stephy的肚子發出一些腸鳴音。
「你係咪肚餓...？雖然有啲突然，介唔介意同我一齊去食啲嘢？反正我都有啲餓。」Hugo相約她。
「.......」Stephy沉思了幾秒，回想Hugo剛剛的挺身而出：「....好啦，不過最好去近啲，唔想行咁遠。」她依然保持高傲的態度，但臉上卻因腸鳴音而害羞泛紅。
二人走到附近的一間茶餐廳，揀了個雙人卡位就坐了下來。
「乾炒牛河唔該。」Stephy爽快地點了食物。
「你呢靚仔，諗好食咩未呀。」店員問Hugo。
「呃....」在Hugo思考途中，他忽見餐廳櫥窗外有一張熟悉的臉孔。
是Gary…..他向Hugo打出ok手勢，拍拍心口，笑意淫淫地走進店內，坐在了Stephy後面的座位，正好只有Hugo能看見他。
Hugo看見Gary的出現，已心知不妙，但一方面就猜測著Gary有可能是個情場高手，或許能幫助自己一把。
「咖哩吉飯唔該。」Hugo點餐。
「吉飯？吉雞定吉豬呀？」店員再問。
「.....係呀吉飯呀。」Hugo一時分心，說錯了話，但想著不能在心儀女孩面前失威，只好硬著頭皮照點。
「吉飯？你食啲嘢咁奇怪嘅.....」Stephy疑惑。
「我....我唔係咁鍾意食肉。」Hugo找理由搪塞。
坐在Stephy後方的Gary噗嗤一笑，伏在了桌上顫著身體。
「咳咳，係呢，頭先見你睇關於排球嘅書，你好鍾意排球？」Hugo問。
「我係呀，平時都有玩開。」
Gary從後舉起一本白簿，上面寫著「答你都有留意開排球 我會幫你！」。
「我..我咁啱都有留意開排球。」Hugo說。
「咁巧合？你鍾意邊個排球選手？」一提起排球，Stephy明顯比剛才精神抖擻得多。
「上原亞衣」Gary舉起的白簿上寫著。
「..............」Hugo看到這答案後，為自己竟然對Gary抱有期望而感覺羞恥，大力拍了額頭一下。
「你做咩？」Stephy問。
「冇，有少少唔舒服。」
「咖哩吉......吉飯到。」店員遞上食物。
Hugo也好奇「吉飯」到底會是怎樣的食物，一看竟然是上了一碟舖滿麵包糠並淋上咖哩汁的白飯，他只好找來一瓶茄汁調調味，希望能易入口些。
拿上手後，發現茄汁瓶口擠不出來，倒轉看看有甚麼堵住了，結果誤把醬汁四周亂濺，駭人場面相當諷刺。
Hugo在Stephy面前屢出洋相，慌張得手忙腳亂，完全失去平日那個行事聰明、冷靜的自己。
看著這一切發生的Gary笑得不能自拔，捧著肚子，眼淚水也掉了幾滴下來。
「.........」Stephy及時遞上餐紙。
「.........唔該。」Hugo尷尬道謝。
「你...好特別，明明幫我嗰陣係個好聰明嘅人，但另一面又咁笨手笨腳。」Stephy俊忍不住，對著Hugo笑了一口：「我叫Stephy呀，傾咗咁耐，都未知你叫名？」
Stephy的笑容非常燦爛，滿滿的陽光氣息，與平日冷漠孤傲的她大相徑庭，彷彿就是從冰雪中融化的太陽一樣，而吸引Hugo的正正是這個笑容，令他一見傾心，但誰又料到，聰明伶俐的他會因愛情又淪得這副模樣？
「我叫Hugo。」Hugo回答。
「你就係.....Marla同我講嘅嗰個男仔？」Stephy既驚又喜。
「係呀....嗰日你冇嚟到...」
「哈，我講過我係好怕麻煩嘅人，即係懶，嗰日只係我瞓晏咗，本身都想嚟架，不過又廢事出門口....」Stephy接著說：「講你講翻聲對唔住先，今次請你食飯當無數好冇？」
「都好！哈哈！」他們打破尷尬，繼續飯局。
Gary見狀，知道Hugo已經漸入佳境，豎起手指公便轉身離開。
二人一直聊個不停，並說好下次再約，與Marla、Peter一起外出遊玩。
Gary步出茶餐廳，心中正為朋友的愛情進展順利而感到喜悅，但走到半路時，驟然聽到巷子裡傳出爭執聲。
「點解你要去書店偷嘢？」一把女聲說：「咁做係唔啱架。」
「你唔使理我，我想做自己鍾意嘅嘢。」另一把男聲說。
「你同我翻屋企，重新.....」話音未落，那女生就被推倒在地，另一位男生就揮袖而去。
Gary在後偷偷八掛發生何事，只看見那女生穿著運動外套，頭戴上外套帽子，把自己包得密實，坐在地上發了瘋般抓著自己身體。
唯獨看見的半臉和雙手都血跡斑斑，亂抓過後便是一場痛哭，目睹一切的Gary不忍這女生如此可憐，也好奇她的身體為何留下血跡，就上前關心。
「你冇事嘛？」Gary拍了拍她的肩膀。
「嗄！」那女生明顯異常驚慌，馬上就向後移動，和Gary拉開距離。
「使唔使咁驚.....我睇下你有冇嘢要幫手啫。」
「我....冇....」女生把帽子拉得更低，想要遮擋自己的臉。
「但你成身都係血喎？真係冇受傷？」
「呢啲....呢啲係......」女生結結巴巴說不出話：「你唔好望啦....」
「呢啲係濕疹...？」Gary凝視著她：「我好似係電視見過。」
「嗯....我好醜樣....你唔會想見到....」她用雙手擋住自己的臉。
「講咩呀你，你點睇都似有問題喎。」
「你唔好理我啦，如果你睇清楚我個樣，一定唔會咁講....」
「你又會咁自卑嘅....我覺得幫一個人唔需要理佢係咩樣。」
「個個把口都係咁講架啦，當見到我真面目嗰陣，結果咪又係走夾唔抖，掂都唔想掂到我，你唔使再扮好人啦！」女生激動地說，露出了一直遮擋著的臉。
驟眼看下去，果然是充滿著一道道由濕疹造成的疤痕，有些還是鮮血淋漓，說真的是有點令人驚駭。
「嚟，唔好坐喺呢到，好污糟架。」但Gary絲毫不介意，二話不說捉住她雙手，把她拉起身。
「吓，我...我地去邊呀？」女生被他拉到了大街上。
「我送你翻屋企啦。」Gary再望望女生：「順便，同你傾下心事啦，我做樹洞好叻架。」
Gary自己沒有想，也想不明白，為何要去幫助一個素未某面的濕疹女生，可能最近幫人的經歷多了，自自然然就成了一種習慣，他卻不知自己已變得好人好事，只是單純的做想做的事。
「點解.....你唔驚我傳染你咩？」女生問。
「唔好玩啦，濕疹點會傳染架，雖然我唔係話十分聰明，但呢啲常識都係有嘅。」
「如果其他人都好似你咁就好喇.....可惜呢個世界....每人都只係偽善，內心都係醜陋無比。」說罷，女生又把帽子拉低，擋著半張臉。
「嗯......」Gary思考數秒：「我叫Gary，你叫咩名呀？」
「我叫小秋...」
「想唔想去一個好好玩嘅世界？」Gary突發奇想。
「好好玩嘅世界...？」小秋疑惑地看著Gary。