【短短一個月內，屋企就死左五個人...】: 第四章 張天師

書架上有書當然係正常不過既事，但係咁大個書架竟然只有一本書就十分奇怪。

本書比起正常A4紙細，但係好厚，外型十足十好似武俠小說入邊既秘笈咁。而原本湖藍色既書面都因為擺放得太耐而開始泛黃，可見呢本野確係有一定既年份。 我隨手翻開，驚覺成本書既紙雖然已經變霉變黃，但無一頁係有崩缺，甚至摺痕，可見阿爺對呢本書係有幾咁愛惜！ 而唔單止書既外型奇特，其至連書入邊既文字都好奇特。書中用黎記載既文字並唔係我地一般所用既文字，基本上係以啲之乎者也個啲文言文去寫，但係好彩我當年係大學係讀中文，雖然未可以話將文言文運用至出神入化既境界，但係要用解讀一啲基本文字都還可以既。 不過...有時知得太多野都唔係一件好事，因為一句一句咁睇落去，愈睇我就愈心寒！因為書上記載既野全部都係關於啲鬼鬼怪怪既事，而且仲要配上大量驚悚手畫既圖片！ 鬼掩眼，鬼嫁，瓶中鬼，殭屍，趕屍，十大陰師，符籙，閻王，甚至去到中國各地既古傳說... 一時間大量湧出黎既詞彙，圖片搞到我頭都暈埋。 「啪。」我用力合上本書，轉身攤係爺爺既床上，腦中開始泛出好多不同既畫面。我摸出一直袋係身既個張委託。 我左翻右翻，妄想可以搵到多啲提示。唉，到底發生咩事？阿爺佢地死得咁突然又咁古怪，唔通真係關呢次既趕屍委託事？ 「唉。」我拎出手機，禁左幾個數字，打左過去。嘟嘟幾聲，電話既另一端終於接通左。 「喂張叔？係我呀，阿思。」我率先開口。 「仆街仔你仲敢打黎？你累我今個月比左五次帛金啦屌你老味！真係慘撚過我自己屋企死人呀屌！」電話裹頭另一端怒不可歇，貌似一個月比五次帛金仲慘過人地一個月死五個親人咁。 「我都唔想架...」明明我先係受害者喎，點解我仲要比人屌？ 「唉屌，我夠知啦，我都係講下姐，邊撚個想死親戚既姐！」電話另一端既張叔頓左頓，語氣一轉，嘆一口氣問道：「無事不登三寶殿，講啦寧家老野個孫，係咪有咩事要我幫丫？」 「係有關於我屋企人既死既...」 「嗯，我依家係世界黎，等我過黎。」  係聽到張叔既承諾之後，我終於可以稍微鬆一口氣。張叔係紅磡另一個殯儀世家既話事人，論輩份點都唔會低得過過我地寧家，份人係就係粗魯左啲，但係對我地所有既後輩一直都好好，連我老豆細細過個時都無少受過佢既恩惠。 張叔對我地黎講係一個好神秘既人，除左佢已經成七十歲人仲逼我地叫佢做叔之外，其實仲有另一個原因，就係我地連佢個全名係咩都唔知。除左我地爺爺之外，我地一班後輩都只係叫佢做張叔，只有我爺爺會叫佢既全名，前面仲要加多個屌字。 不過我地好少叫佢做張叔，我地私底下都係叫佢做張天師。