【短短一個月內，屋企就死左五個人...】: 第三章 店中異事

守完夜，送埋四叔上山，我終於可以抖一下，以最後既意志勉強拖住就快散既身體返到鋪頭。順帶一提，我地寧家既鋪頭就係殯儀館隔離，招牌就只有簡單既四隻大字 — 寧家殯儀，一個唔好彩真係要搵殯儀服務既話可以搵我地，響我寧可思個朵打返個八五折比你地。 一個月前既鋪頭好多時會塞滿哂人，會見到我啲阿叔陪我阿爺打麻將啦，又會見到我表哥哩埋係間有冷氣既房仔到打機啦，但係依家...唉。我對住空無一人既內室搖一搖頭，逕自行入去我阿爺平時訓既個一個細閣樓到，準備幫佢執好啲遺物。 我穿過幾疊人咁高既棺材，繞過擺放關公同地主既神櫃，再爬上一條只能夠容一個人通過既小樓梯，先黎到我阿爺平時訓開既閣樓仔。我將手心既汗抹走，輕輕推開木製既房門。由細細個到成年而黎，阿爺都係唔比我入佢間房，所以推門既個一下我都有啲緊張。 到底阿爺點解唔比我入黎？唔通阿爺中意收埋啲古怪野，怕我入黎會嚇親我？定唔通阿爺間房有金條怕比我偷？定係...? 正當我胡思亂想，房門岩岩比我推開左少少之時，房中忽然無故爆出一聲極淒厲既慘叫，有一道極強既風將木門扯開，而靠住門口照射入房既光，我赫然見到一張滿面披血，眼窩空洞既人面係房既深處飛出，直奔我面龐而來！ 「屌！」我黎唔切比任何反應，只可以大叫一聲，雙腳一拉就往牆貼！ 人面伴隨住刺耳又令人毛骨悚然既慘叫聲，係無任何阻擋之下從門口極速飛走，甚至連望都無望我一眼...呃，或者望左我唔知啦。面對咁突如其來既驚嚇我驚魂未定，靠牆喘氣。仆街，點解鋪頭入邊會有啲咁既野既？我心中突然泛起一股寒氣，直覺話我知，緊接落黎所發生既事將會超越我既想像。 我再次鼓起勇氣，開著閣樓中既燈。 「啪！」 今次咩事都無發生。頭頂上既燈光好似平時咁閃爍而亮，將室內所有既事物通通都照得一清二楚。經歷過頭先既事，阿爺房中既擺設對我黎講更增幾分神秘感，會唔會好似啲鬼片咁，成幅牆都係符？又或者會唔會有好多人骨？ 但係乜都無。爺爺間房入邊就只係得一張床，一個高到頂天花，有兩個我咁闊既多層木書架，成個格局其實比起平常老人既房間更簡潔，但係唔知點解，一股不安感卻係我心中擴散開去。 可能係因為一個咁大既書架上竟然只係得一本書。