[穿越] 執房嗰時搵返部Sony Ericsson推蓋手機: 121.

我們如常走回家。

「你...」
「你頭先想同我講咩？」

我搶先發問，他愣一愣，停了下來。

微黃的街燈映照出一雙黑影，原來下一秒我已被他擁入懷中，他用力得使人生痛，也痛不過剩下一顆心臟孤單地跳動着，默默等待另一顆相同的頻率。

我終於感受到他真實的存在。





「我嚟到你所在嘅時空喇。」他在我耳邊細語，平淡地說出一句深深刻進我心裡的說話。

「唔係，係我返到未來揾你喇。」我拉開一點距離，看着他雙眼堅定地說：「我就知道，如果你未忘記我嘅話，一定會記得嗰啲歌，一定會知係我嚟。」

「傻仔，我一早知喇，你破綻百出啊。」

「頭先reu我有講錯嘢咩？」

「喺你解開我個電話lock screen嗰刻，我就知係你啦。」





「Lock screen... 我真係無諗過呢樣，手快快就開咗...」

「你一定係有心比我知嘅係咪？哈哈！」他露出奸狡的笑容，一雙彎月透露出他的快樂，我也許明白他雙眼通紅的原因了。

「唔係㗎，如果你已經有女朋友，或者你唔再在乎我，甚至我哋已經斷聯嘅話，我有冇返嚟都唔重要喇，咁我會好好放低。」我說得沒所謂，好像是甚麼能輕易辦到的事。

「咁簡單？真係放得低？」他有點不滿，撇嘴的模樣特別可愛。

「唔知呢，你都同第二個人拍拖啦可？」我只是開玩笑，並沒有真的責備他（雖然是有點介意），怎料他嚴肅起來，眉頭深鎖，又深深嘆一口氣。





「唉...其實都唔算真係認真嘅拍拖...」

「喔！你玩弄人哋感情！」我們有默契地走向公園，找了一張長椅坐下。

「都係因為你。」

如果我一直都在，陪伴他的人，都會是我。因為我，那的確是因為我。

「因為嗰個女仔太似你，似到我甚至以為，你係咪去咗其他人嘅身體呢？佢知我心入面住咗一個人，但佢叫我比次機會佢，試一次就夠。」他凝視着公園內的遊樂設施，沒有了白天的熱鬧，只剩下冷清清的大樹在旁被風吹得沙沙作響，卓行說話的聲線温柔似水，卻在我心中泛起漣漪，無限放大。

「我好想佢係你，好想好想。佢係好鍾意張敬軒嘅春秋，佢鍾意個旋律鍾意個感覺，但佢永遠唔明白個故事，唔明白個情感；佢好鍾意去冒險樂園，鍾意企喺一邊睇我玩籃球機，叫我夾公仔比佢，我話要比賽，佢會話一定唔夠我勁，睇我打就好；佢鍾意食小食，格仔餅、魚旦、章魚燒，但佢唔會食到周圍係，污糟邋遢。」

他似乎在說他和他前度的事，可是我聽起來又像回味着我們的過往，我們所經歷的真的太少太少，卻又太深刻。也許深刻的只是情感，當你很在乎一個人，很想念一個人，微不足道的小事也會成為獨特的回憶。





「佢唔會玩數字球玩到扭親，哈哈，不過我哋都無機會玩；佢好整齊企理，所以我諗佢會執locker，唔會由得啲書塞爆個locker... 好快我就知道，佢真係唔係你。」他的語氣平淡得像是在說別人的故事，他越是顯得沒所謂，我的心就越沉越深。

「係你就係你嘅，唔需要試都無得試，因為我一早知道答案。所以... 我又一直等，直到我終於等到答案。」他看着我苦笑，我竟說不出一句話來，彷彿一開口，眼淚就會失控地流出。

「你睇你，對眼都紅晒，頭先仲笑我？」我強忍淚水，只好別過臉，不讓他看到。

「你係咪會介意啊？」他輕拍我的肩，不敢打擾。

「我只係會介意，現在呢一刻，陪喺你身邊嘅人係咪我。」我輕輕擦掉眼角的淚，望向他真摯的眼神。

我靠向他，不再說話了，二人進入了靜音模式。直到天上的密雲散開，月亮悄悄現身，剛好是月圓之夜。

「你睇下個月亮。」我指向遙遠的天邊，總覺得圓圓的月亮散發着微黃的光最可愛。

「好圓好靚。」





「多謝你一直等我。」

「多謝你返嚟我身邊。」

等到了滿月，等到了我們，時間彷彿靜止了。