[穿越] 執房嗰時搵返部Sony Ericsson推蓋手機: 120.

「點解你仲未同芯言一齊嘅？」

「點解我哋一定會一齊？」

「你又鍾意佢，佢又鍾意你，點解唔一齊？」

「因為佢走咗喇。」

「咩走咗啊？我講緊芯言啊。」

「佢其實係喺未來穿越返嚟㗎。」

「你比人拒絕咗？痴咗線啊？穿越都講得出。」

「真㗎，我鍾意嗰個佢，喺未來。」



我呆望着阿寶，待他把話說完。





「佢話，你係穿越返嚟㗎。」

「佢...同咗你講？」

想不到卓行會把這件事告訴別人，大概是受不了活在只有他一個的世界吧，要守住不知是否真實的回憶，總覺得很心痛。

「佢無詳細講啲咩，我以為佢亂講啫。但後來我發現，所謂另一個你好似唔知我鍾意男仔呢件事咁，成日話要介紹女仔比我識，我先醒起卓行咁樣講。係有啲懷疑，但又唔敢肯定。」

他停一停，不說話了，在觀察我的反應，我專心看着他，說不出是哪種感覺，腦海中只有卓行的身影。





「直到頭先喺m記，你好似明白我點解會話難，比着平時你一定會一齊抽我水串我啦。」

「所以你就試探我？」剛才他指着的男生已經離去，我們依然靠着欄杆，異常冷靜。

「都真係試下㗎咋，點知你咁易露出馬腳。」

「Sorry囉，哈哈。」我裝作抱歉，他乾笑幾聲，似乎不領情。

「估唔到世上真係有啲咁荒謬嘅事情，咁你哋依家點啊？」

「我都唔知，卓行唔係拍過拖咩？」

「唉，等佢慢慢話你知啦，佢一直等緊嗰個係你啊。」

「多謝你阿寶。」





「傻啦，有咩好多謝我？」

「多謝你呢幾年都陪喺佢身邊，好似代我陪住佢咁。」

「咪咁肉麻啦你，要陪你自己陪飽佢啦。」他拍一拍我的頭，似是在鼓勵我。

我們走回商場內，卓行剛好從電梯下來。

「男人老狗去個廁所都咁耐㗎。」阿寶一臉無奈，不忘調侃一番。

「唉兜嚟兜去先揾到廁所啊，行啦，搭車返去。」

「我咁啱有friend而家係旺角，揾揾佢先，你哋返去啦。」阿寶向我眨眨眼，示意給我們獨處的機會。





「而家咁晏？又食糖水啊？」

「你理得我，我可能去屈蛇，你同芯言返去啦吓，bye！」

「又會話走就走...」卓行小聲對我說，我輕輕一笑，轉身走向巴士站的方向，他就立刻跟前來。

「頭先食雞煲，你話一陣再講咩啊？」我決定打破沉默，是時候把六年前暫停連載的故事寫完了。

「返去先講啦。」

「呢到唔講得㗎咩？」

「呢到咁嘈。」

「好啦，哈哈。」





我們上了巴士，我拿出手機，插上耳筒，把其中一邊遞給他。

「做咩啊？」卓行有點猶豫，要不要接過我的耳筒。

「聽歌囉，你想聽咩啊？」

「你鍾意啦...」他緩緩戴上耳筒，閉上雙眼，我猜他應該很累了吧？

我打開音樂播放器，建立了新的歌單。

櫻花樹下
張敬軒
春秋
張敬軒

Lonely Christmas 
陳奕迅
那些年
胡夏
金剛圈
麥浚龍
百年樹木
張敬軒

熟悉的前奏響起，我偷瞄卓行一眼，他依然閉上眼，沒甚麼反應。

窗外的景色不斷往後退，就如當初我們在旅遊巴上，他微小的歌聲彷彿仍在我耳邊播放着；他胖胖的臉蓋不過好看的輪廓，小小的個子有一天會擁有可以抱緊我的臂彎，伴我走過無數次回家的路；他坐在我身旁，分享着同一首歌，共同走過的回憶——終於，我回來了。

歌曲循環播放，迎來第二年的春秋，我也漸漸睡着了，朦朧中還是感覺到那隻大手輕輕一碰，讓我靠在他的肩上。

樹蔭看着人海悲歡愛恨都記載
二百年後所有事物都種出青苔墳墓見證花開...

「醒喇，就到喇。」他拍拍我的肩，我張開雙眼，是一張放大的臉。

「又卒眼啊你？紅紅哋嘅？」

「係啊，痕吖嘛。」

他的微笑，總是藏着一個我不知道的故事。