[穿越] 執房嗰時搵返部Sony Ericsson推蓋手機: 96.

「做咩咁好興致行咁遠食日本嘢啊？」

殷殷挽着我的手臂，邊走邊問道，而卓行和阿寶早已拋離我們。也好，日本食店總是有很多人排隊。

「卓行話好肚餓嘛，食定食最飽啦。」

「喔...卓行肚餓，明晒，哈哈。」

「做咩笑到咁衰㗎你，明你個頭！」





殷殷不懷好意的看着我，我就知道她想說甚麼。

「咁啫係你而家同卓行點啫？師兄你又拒絕咗喇，無嘢阻礙你哋啦？」

「其實正確啲嚟講我又唔算拒絕咗資逸，自然而然就...唉好複雜，反正...」

「咪叉開話題啊你，重點已經唔係師兄ok？快啲講啦，你哋點㗎？」

「無啊，咪咁囉，都係咁。」





「由得佢，唔再進一步？好明顯卓行對你有嘢啦，都唔知你哋兩個慢吞吞做乜。」

「我唔係無諗過，不如主動少少啦，但又唔知點開口。」

「嚟緊你生日，睇吓佢有無表示啦，無嘅話，你就主動出擊！」

「ummm係囉睇定啲先，而家順其自然，有時我都覺得幾好，嘻嘻。」

「發姣啦你，之前仲話我，你笑得仲衰過我！」





我們在街上大聲笑，惹來途人側目，便急步逃走，不知不覺就來到店前，卓行和阿寶早已等着。

「兩個八婆做乜笑到咁大聲啊？」

阿寶八卦的樣子，比我們還要「八婆」。

「咁你一定係八公啦，關你鬼事啊？」

跟阿寶相處總能激發我的毒舌個性，跟他吵架就是日常，也是我們最舒服自然的相處方式吧。

「而家啲同學真係好無愛囉，關心你又唔得嘅，咁叻我哋分枱坐啦！」

「無人想愛你啊唔好意思，咁卓行同我哋坐，你自己行埋一二邊啦。」

「食屎啦你！」





阿寶惱羞成怒，一手拉着我的馬尾，我立刻叫了一聲，捉住他的手企圖弄開他的手指。怎料他加重力度向後一扯，我整個人差點就跌倒了。

「喂，小心啊。」

卓行拉着我，只見他黑了一張臉，好像很不滿的樣子，阿寶亦識趣放手。

「最衰都係你啦何寶軒，幾大啊，玩扯頭髮...」

阿寶沒有反駁，只是朝着我扮鬼臉。然後，店員出來叫我們進內，店內空間小只容得下三桌，所以門口依然有兩三群人在等候。

「好彩你哋早行到嚟咋，腳長係有啲用啊吓！」

殷殷對他們加以讚賞，阿寶十分得意，相反卓行依舊沒有表情，在專心看餐牌。





「我要親子丼。」

「你真係好餓喎...」

我望向卓行，他聳聳肩，沒有回應，自個兒在按電話。

「我要豬軟骨拉麵！」
「我要吉烈豬扒定食！莊芯言差你咋，快啲啦！」

「咁...我要...海鮮烏冬啦。」

殷殷和阿寶對着坐，聊起班中的八卦事，我在一旁默默聆聽，畢竟中四的事我已沒多大印象。過了一陣子，食物來到，卓行終於放下電話，亦不時搭話。

我們快速吃完午餐，免得外面的人等候太久。回程的時候，殷殷故意拉着阿寶聊天，漸漸和我們拉開距離，造就了我跟卓行短暫的獨處時間。





「頭先嬲啊？」

我試探問道，他臉帶微笑，回復原來的他。

「吓？嬲咩啊？」

「你囉，好似有人黑面喎。」

「痴線，我邊有？」

「真係無？有人仲不停㩒手機唔理我哋添～」

說罷，卓行的電話就傳來震動。

「大忙人，咁多人搵。」





「Paula問我啲科考成點咋嘛。」

「喔...」

卓行的手指在屏幕上飛快舞動，一會兒便放下電話。

「做咩唔出聲啊？」

「你覆訊息嘛，咪唔阻你。」

卓行沒有回應，只是用手輕輕拍我的頭，露出耐人尋味的笑容。

「做咩啫你？整亂人哋個頭。」

他並沒有弄亂，我是故意這麼說的。

「阿寶就真係整亂你個頭喇。」

「咁你呢？」

「我係幫你整返好，我幾時有整亂過？」

「講到自己咁好？」

「我不嬲都對你好㗎啦。」

這次換我笑而不語。