[穿越] 執房嗰時搵返部Sony Ericsson推蓋手機: 92.

晚飯後我攤在床上，母親亦沒有多說甚麼，畢竟是考試後的一刻放肆，電腦播放着周杰倫的《不能說的秘密》，熟悉的前奏響起，海浪聲和鋼琴聲交織出一段淒美的愛情故事。這樣想來，又是一個關於穿越的故事。回來後我才明白，捨棄原來的生活﹑時間和記憶有多沉重。湘倫放棄了現在，回到小雨還在的年代，一切重新開始。小雨回眸一笑，他眼框含着淚臉帶笑容，所謂值得，是再次看到那個讓你魂縈夢繫的人。*

周杰倫獨有的聲線和咬字，帶我進入了他的故事。

來自資逸：1個新訊息

得唔得閒？21:15

可唔可以落嚟啊？21:17





係啊 方唔方便落一落嚟haha 21:19

不知從何時開始，窗外下起微微細雨，想起他，竟然有點心痛。時間只是九點多，只好編個藉口出門，跟他見一面。

「媽咪，我同學嚟搵我食糖水，落一落街。」

「咁突然嘅，唔好咁夜喎。」

「得喇，食完就返。」





我穿了一件厚外套，穿上拖鞋便馬上下樓。這時我才覺得奇怪，為甚麼他會直接來找我，他知道我住哪裡嗎？

踏出升降機，我就看到他的身影，站在大門外的簷蓬下。

「你，點解嚟搵我嘅？」

他看着我，明亮的雙眼似是要把我攝進他的身體裡。我感覺到他有很多想要說的話，卻又不知從何說起。

「有嘢想講？」





很多事他可以跟你侃侃而談，唯獨喜歡把心事藏在我觸碰不到的深處，他讓我猜，而我永遠猜不中，然後在吵鬧中結束對話。

「你記唔記得，每次送你返屋企，我哋都好鍾意企喺呢到傾計，成日都唔捨得走。」

「我...唔係好明你講咩。」

「點解你要返嚟，就係點都唔比個機會我？」

「你...唔通！」

「我成日都會翻睇我哋send過嘅訊息，有一晚，我用一個無訊號嘅舊手機，照樣send訊息比你，然後，我竟然返咗嚟中二嗰年。」

「所以，所以當年你喺Facebook搵我嘅開場白都改變咗...」

「我覺得係我唔想失去你嘅執念令我返到嚟，為咗重新同你一齊。」





「其實...」

「其實，我真係好努力。同你相遇嘅每一個瞬間我都好珍惜，我以為我哋嘅將來可以續寫。分咗手之後我真係明白咗好多嘢，我無用你需要嘅愛去愛你，我無聽到你每次鬧交後心累心碎嘅聲音，我仲未嚟得切改變，差少少，我哋嘅故事會改寫。」

「其實，我哋互不相欠。」

他沉默不語。

「喺感情入面，我哋無負對方。只不過係我哋無用最好嘅自己去遇見對方，點解仲要執着過去？」

「我哋都快樂過，中學呢段時間，曾經係我哋最幸福嘅日子。其實無嘢需要改變。」

「每段感情都有佢存在嘅原因，我哋一齊過，愛過痛過，總有啲嘢帶得走。點解一定要修成正果先係意義，唔通三年感情都係白走？唔會㗎，你明明知道，咁係最完滿嘅結局。」





「所以，你已經唔想再試一次喇，係咪？」

「我哋唔係需要再試，只可以重新遇見，你明唔明？」

「嗯，就好似依家咁。」

回到過去再遇見，其實我們都明白，答案早已寫好，只是我們不忍揭曉。

穿越不是我們能控制的因素，我們天真的以為上天想我們改變，卻偏偏留住了回憶，原來不是每一個故事都能改寫，或者應該說，我們的故事不需重寫。

「至少，我哋都無忘記原來嘅過去。」

「我諗我返嚟，只係一個意外，但我慶幸有呢個意外。」

我一臉疑惑，他輕輕一笑，看着雨點灑落。





「我賺咗一齣戲。」

「你...係咪早過我嚟到呢一年？」

「早你一個秋天嘅時間。」

雨水沒有停下來的打算，或許我們都需要一場雨。他別過頭，我沒能看清他的臉容。

「一個只係屬於我嘅秋天。」

一個苦笑，一行淚水，秋天早已遠去，寒風在訴說冬天的故事。









*電影《不能說的秘密》