[穿越] 執房嗰時搵返部Sony Ericsson推蓋手機: 89.

「唔許住。」

「吓？又話要個願望。」

「我保留許願嘅權利，等你欠住我先，哈哈。」

「想我欠你？有咩居心啊！」

「欠我一世，一世追你債囉。」





「你就想啊！」

一世只是一個時間長度，只有真的經歷過一生才能變成諾言。如果相愛不能保證，或許虧欠是一個更好的方式，有欠有還，他讓我欠他一世，一世就成了我的債，感覺實在多了。

「想㗎，哈哈。」

我裝作不理他，走向夾公仔機。這時的夾公仔機還不用十二個代幣那麼貴，價錢就看玩的是甚麼類型和公仔款式，普通的「三爪」兩個代幣就可以玩一次了。

「你睇你隻右手，震緊喎小姐。」





「你唔講我都唔覺，我都唔想㗎，證明我啲運動細胞真係負值。」

「明知自己廢又要同我比賽，咁係咪叫不自量力呢？」

「係喇係喇，你至叻好未？」

他的嘴巴不饒人，卻替我按摩前臂，讓我想起學校旅行那一次他替我冰敷。他的手掌也許變大了，動作依舊溫柔，酸軟感散去不少。

「返去痴啲撒隆巴斯嗰啲啦，你呢啲無做開運動嘅，聽日實痛死你。」





「死啦，我都覺得自己好虧，玩個籃球機就搞到咁。」

「係時候運動吓喇。」

「你都啱，等我思考吓先。」

「你諗諗吓就唔會做，我哋weekend book場打波啦。」

「吓，我唔識打籃球㗎喎。」

「唔好咁睇得起自己，打羽毛球啫，你應該識掛？」

「殺你，我小學學過㗎，你死緊喇。」

「你又知我打得唔叻？係咪又要比賽？」





「要比嘅不如比夾公仔？」

「知你想玩啦，來來回回都唔行去第到，睇中咩公仔啊？」

「鬆弛熊！五個代幣一局，可以一戰喎，我哋依家夾埋有幾多個幣？」

「廿個咋，我去問小君拎多啲先。」

「nonono，我哋就用廿個夾佢返嚟！」

我們看着躺在中央近出口位置的鬆弛熊，它的姿勢是伏在枕頭上，我就是喜歡這種傭懶感。

我投下五個代幣，一字按鈕正在閃動着，這種夾公仔機只有兩個按鈕，分別是向左或右移動和向後移動，長按直至「兩腳爪」到了適當位置，一次機會，考的是反應和判斷距離感。





我先按下向左移動，爪子比想像中動得快，一下子便到了所在位置，我立刻鬆開手，二字按鈕隨即閃動。

「你去側邊幫我睇吓會唔會後得濟，到就嗌停。」

卓行站在右邊，全神貫注地看着鬆弛熊。

「你諗住夾個頭定身先？」

「試下夾頭先，你嗌停我就放手。」

「好，嚟啦。」

爪子在我按下二字後迅速後退，卓行大呼一聲「停」，我馬上放手，兩爪緩緩張開，搖擺不定的下降，位置後了一點，大概在我聽到指示後再作出反應就已經遲了一秒。

爪子把鬆弛熊夾起數秒又掉了下來，位置比剛才更接近出口，只要再把它推出一點，我就可以用夾子直接壓它下去。





「今次你早少少嗌停，我反應得嚟就啱啱好。」

再接再厲，第二次機會。這次卓行預早喊停，位置比上一次更精準，看着爪子把它夾起，不其然地緊張起來。

「哎呀，差啲。」

卓行竟然發出感嘆，我不禁失笑。

「笑咩啊你？」

「無，見你仲緊張過我。」

「真係差啲嘛，今次我嚟，你睇位。」





他投下代幣，聚精會神的看着爪子，堅定的神情跟剛才比試沒差。

「停！」

卓行的反應比我慢，爪子夾起了它的身體，意外地把它向前推，公仔就掉下來了，我驚訝得說不出話，他也是一臉茫然。

「其實...夾公仔好易啫。」

「符碌！你撞手神嘅，明明你就遲咗停。」

「唔通我計過度過又話你知咩，事實擺在眼前，你都係唔好同我比喇。」

他拿出鬆弛熊，交到我的手上。

「嗱，送比你嘅。」

「咩啊，我都有份夾㗎。」

「nonono，係我夾到㗎。」

「係我開得個頭好咋，呢啲叫助攻。」

「仲有五個幣喎，比你做正選夾多次喇。」

「怕你？」

我看準了偏圓形的鼻窿雞，希望夾起的時候它會滾到出口。

投幣，爪子移動，落下，夾起——