「短篇」「小小傻瓜，大大幸福」: 壓力

夜闌人靜，月光伴我思考人生。

點解咁夜都唔訓？我唔知道呀，訓唔著囉。

咁點解訓唔著？喂大佬訓唔著就係訓唔著架啦邊有得解架老友，你同學校d仆街老師問學生點解唔記得做功課有乜分別啫。

不過呢，咁樣坐係窗邊望住個月光，個人又有好多唔同既感受。

尤其係子琪佢地黎過之後，個份感受就更大。





哈，真麻煩呢毒撚既內心世界…不比女人心複雜呀真係…

中學時期個種多愁善感又返黎啦，慘啦我以後會唔會晚晚係度思考人生架。

我望望自己隻手，幼稚地想伸手去捕捉掛係天邊既三日月。

明知不可能，最後只好擺出Lockon既手槍手勢，嘲笑一下自己。

啊係，聽日仲要問下老豆老母佢地幫唔幫Nicole搞百日宴…





仲有好多好多野等緊我去做添呀，算啦都係早D去…唔？

就係我打算結束呢場人生大反思之際，一陣拖鞋聲劃破左黑夜既寧靜。

呢種行路聲係Cherry，一齊生活左咁耐，我係分得出呢d小事既。

呀係，即刻笠返頂帽先。

「我轉過我的臉，不讓你看見。」





突然間，腦海閃過呢一句歌詞，哈哈真係貼切呀《斷點》。

哦等陣先，我唔係話成首歌都貼似呀，我只係話個一句貼切咋。

明明知道佢行緊出黎，但我故意唔望過去，繼續望住窗外既月亮。

拖鞋聲愈來愈近，我既心跳亦愈來愈快，我都唔知自己點解會咁。

我好似想逃避d乜野咁，但具體係咩就連自己都唔知。

Cherry：「lulu~ 」

佢一邊叫我個名一邊從後攬住我，攬到實一實。

換轉係平日既我，我一定馬上轉身去迎接佢，但我今次企硬，不為所動。





Cherry：「做咩呀唔睬人既，咁夜仲唔訓係度做乜呀。 」

我：「呃…無，岩岩打機有一關過極都過唔到，自己係度諗應該點玩先過到啫。 」

Cherry：「唔~~真係咁咩？ 唔緊要啦，點呀係今日見過子琪佢地之後，有無咩想講？ 」

點解你成日都知道我諗緊咩架傻婆…仲要樣都唔洗望下都知道我講緊大話都有既。

估唔到我魯路修一世英明，一生看破無數謊言，而家居然比自己老婆一下睇穿自己講大話。

Cherry：「其實呢…係我請佢地黎架。因為我見你呢幾日好似奇奇怪怪，心神恍惚咁，所以請d舊朋友黎聚下開心下，睇下可唔可以開解到你… 」

「不過睇黎都係失敗左啦，今日都無乜見你笑過。」





「但係可唔可以話俾我知，你係因咩事唔開心？等我陪你一齊面對吖。」

「我真係唔忍心見到你一個人半夜係度偷偷地喊。 」

佢講完就揭起我頭上既帽，仲細心地為我拭去臉上熱熱既水珠。

原本我以為自己可以撐住，但佢呢下舉動再加上溫柔既話語，我始終都係失守了。

其實我壓力好大。

我想守護佢兩母女既心情並無變，問題係我唔知應該點做先岩。

我總感覺自己係度兜緊圈，身陷係一個loop入面，困惑，開心一陣之後又再陷入返困惑。

我想走出呢個loop，卻頭頭碰壁，壓力亦愈發愈大。





以上既妄想，我全部都一五一十咁話哂俾我眼前呢個女人聽。

佢聽完只係笑左一笑，帶住一如既往既天使之微笑黎摸我塊臉。

Cherry：「真係好多謝你呀魯路修，多謝你咁著緊我同Nicole。」

「但係你咁快就唔記得左自己講過d乜啦？幾星期前咋喎？」

我講過既野…？我一日都講好多野下喎…幾星期前要諗一排先得…

我岩岩開始思考緊正確答案到底係乜既時候，佢就率先揭曉左答案。

Cherry：「你話過之後就由你陪我仲有Nicole一齊堅強咁行落去，話明係一齊，就應該係大家一齊面對所有野，邊洗你一個人負責哂。」





「乖啦，無事架，你唔洗一個人面對哂所有野，我會一直係你身邊同你一齊照顧Nicole架。 」

我到底一直係度煩惱d乜…最好既答案明明一直就係自己身邊…

低能…