「短篇」「小小傻瓜，大大幸福」: 堅強

識我既人都知道我平時非常少跑步，甚至連運動都好少做，因為自己體能非常差，又怕麻煩。

但係今晚我為左佢，自己一個係條街狂奔，為既就係可以儘早趕到佢身邊。

你可能會問做乜唔坐的士咁白痴，原因好簡單，我唔想係條街上面為左架的士白等。

我當然都唔係傻，我一邊跑一邊搵的士，直至經過一個路口見到有對男女岩岩係的士上落黎，我即刻衝上去，唔理三七廿一直接跳上車。

我經過對男女既時候好似仲聽到佢地嗌左聲「lulu？」，可能係我識既人都未定，但我而家真係無時間同佢地打招呼，所以我眼尾都無望佢地一下，直接閂門，叫司機去醫院。

點知d仆街的士佬偏偏同我玩野，話交更唔去，一下辣著原本已經煩躁不安既我。

我：「我屌你老母呀夜晚八點鐘同我講交更？

你趕住返屋企睇愛回家呀？開車啦我老婆係醫院等緊我呀大佬！

」

唔知係咪我既怒火實在太勁，的士佬居然無好似平時D Youtube片咁駁嘴，而係乖乖咁開車。

之後就係等佢車我去到醫院…

個身停左落黎之後，之前一直一片空白既腦袋終於都有機會重新開機，快速轉動去組織返之前發生既一切。

點解佢要駛開我呀…唔比我係佢生既時候係佢身邊陪住佢…

唔係話女人係生仔既時候最需要自己老公陪住架咩？點解佢完全相反？千方百計駛開我，甚至動用埋晨哥呢D重量級人物。

佢會唔會有乜野瞞住我，唔通其實BB無佢之前講既咁健康？？

係狹窄既的士車廂入面，我苦苦思量有如海量般既問題，可惜既係一個答案都得唔出。

因為我腦入面迎來一舊大石，壓住其他一切，就係佢既安危。

唔知道佢而家…邊個打黎？

我拎出電話一睇，發現係美星打黎。

美星而家應該係醫院陪住Cherry…係喎！！

一聯想到佢可能知道Cherry而家既我就即刻聽左呢個電話，恨不得快一秒問佢而家點。

美星：「喂阿妹岩岩入左產房喇喎。」

我都未有機會開口講野，佢就率先彈左個震撼彈比我，令我唔知應該要點接落去先好，只係一味啊啊啊咁。

結果就係比左機會佢講第二句先。

美星：「嘛，我既任務已經完成啦~~你快d黎啦~~~」

佢講左就收左線，而我就傻傻咁望住自己既電話。

的士佬：「哥仔，坐穩。」

我：「嗯？嘩！！

」

一波未平一波又起，的士大佬突然同我黎個Booster On，好彩我坐得穩，如果唔係撻係度都似。

我都無心情深究佢發乜神經，只係繼續自己既沉思同祈禱，希望Cherry無事。

如果無左佢，我都唔知應該點行落去…

的士佬：「到喇哥仔。」

咁快？你又想撚鳩我…咦…？

我望望出面，又真係到左醫院。

明明頭先都仲有好遠下路程，點解會咁快到既？係因為我掛住諗野？

的士佬：「快d入去啦，你又話你老婆等緊你，仲唔快D？」

我：「啊係…」

立場比起頭先完全相反左呢…

我急忙摷銀包出黎打算俾錢，但佢只係淡淡講左句唔洗喇。

的士佬：「我以前都經歷過呢d時刻，之後既路仲好長，加油喇後生仔。」

我無拒絕佢既好意，講左聲多謝就落左車，跑入醫院。

好快我就搵到美星，仲發現唔只佢一個，我老豆老母，Cherry老豆老母都已經係哂度。

我呢個做老公既，做人爸爸既居然係最遲先到，大家都望住我。

內疚已經唔足以形容我呢一刻既心情。

突然，有一道bb仔既喊聲劃破左醫院走廊既寧靜，大家都望過去，當中亦包括我。

我終於見到佢，我終於見返佢。

佢攬住我地既BB，臉上一片慈祥，完全就係一副好媽媽既姿態。

當佢被推過我身邊既時候，佢伸出手用好微弱既力度捉住我既手。

Cherry：「lulu…

」

聽到佢咁柔弱既聲線，我既涙線就猶如水壩缺堤，係眾人面前喊左出黎。

我：「對唔住…我咁遲先黎到…

」

我唯一諗到同佢講既野，就只有呢句。
面對我最真誠，最發自內心既道歉，佢並無太大反應，只係繼續保持一向既微笑，同用手指撩下我既手背。

Cherry：「傻豬…要講…」

我仲未聽得清佢講既野，不解風情既護士小姐就推走左佢，其他人都跟左上去，得我一個仲望住佢慢慢遠離。

眼淚都未黎得切抹去，美星就走左埋黎拍一拍我。

美星：「喂人地老豆就快d跟埋上去啦，你老婆同BB去到咁遠啦你仲企係度做乜呀？

」

啊佢講得岩喎…

意識到美星講得岩之後我就即刻跟上去，打算守係佢兩母女身邊。

原先係咁打算既，但係現實總係會有D出入既…

到我匆匆忙忙跑到入病房既時候，四位長輩就已經將兩母子團團圍住，完全無我既位置。

只好先企係一邊，等幾位長輩先好好玩下個孫先啦，老人家見到個孫係特別開心既。

啊話時話，我連個bb係男定女都未知喎，唉唔得都係忍唔住，要過去睇下個B先！

我嘗試從我父母個邊切入想話睇下個BB，點知老豆老母既銅牆鐵壁真係密不透風，我真係想搵條隙睇下都無。

講一百句唔該借借佢地都好似聽唔到咁，淨係掛住自己嘻嘻哈哈。

我呢個做老豆既都未睇清楚自己個BB，你班友唔好阻住啦…

我用左小小力，好似摩西分紅海咁分開兩老，為既就係見佢兩母子一面。

但係呢，BB就見唔到，淨係見到Cherry。

大家都望住我，望到我頭腦發熱。

Cherry：「係我媽手上呀傻佬…

」

聽到佢咁講我當然望左去外母度啦，發覺個bb又真係係外母手上。

不過更令我更在意既，當然都仲係我老婆啦。

我想同佢講一千句一萬句對唔住，但知道就算講幾多都已經彌補唔到已經發生左既事。

頂…講到我好似去左偷食叫雞咁…明明我就只係行開左去食飯…仲要係佢用計駛開我既…

Cherry：「去抱下我地個女啦，唔好一味企係度啦傻佬，你係爸爸黎架嘛。

」

女？係女黎架！？哇！！我有個女啦！！！

我想盡量保持平靜，但聽到呢個消息實在太令人激動，好難冷靜。

我望住我地個女，咁岩外母又行左埋黎，打算將呀女交到我手上。

面對呢個突如其來既難題重責，就算我一早做過功課學野都顯得有d手忙腳亂。

最後就只係好生硬抱住個女，之前學既野完全唔記得啦，好似讀書時考試咁。

但見到個女細細粒咁可愛，真係心都被融化了。

「唔好意思~~阻一阻各位~~」

突然有一把陌生既聲音傳入黎，大家都望去，見到兩位護士走左入黎。

護士A：「唔好意思呀各位，我地真係要帶給BB去育嬰室架啦~」

護士B：「或者等夜D做好哂檢查，沖好涼之後大家可以再去育嬰室探BB吖~」

吓…我岩岩先抱上手咋喎…一分鐘都未夠…

我擺出一副依依不捨既樣，繼續望住我地可愛既BB女。

美星：「之後日子大把時間你見啦，咪要姑娘難做啦低B仔。

」

我知道你講既係啱，但你就可唔可以用個好聽D既講法呢…聽到人好唔舒服…

最後我都乖乖屈服，交返個女俾護士。

我仲feel到個女唔捨得離開我身邊，一定唔係幻覺，一定唔係！

之後其他人都話唔阻Cherry休息，好似約好咁拉隊走人，最後就得返我地兩公婆。

終於得返我地兩個啦。

我地兩個坐係度對視左好耐，但係一句說話都無講過。

佢眼內有我，我眼內都有佢，大家用眼神黎交談。

雖然無對話，卻總感覺有幸福既聲音徘徊係呢個空間。

過左唔知幾耐但感覺好耐，佢終於開口講第一句野。

Cherry：「對唔住啊老公…我咁任性…

」

乜你都知架咩…

當然，我無將呢句說話講出口啦，我既反應就只係輕撫佢個頭。

但估唔到呢一下小動作，居然刺激到佢，佢明明一直都好平靜，但我一摸佢個頭佢居然就喊起上黎，仲緊緊咁捉住我隻手，嚇左我一大跳。

我即刻一邊幫佢抹眼淚一邊問佢做乜事吖，但佢都係只掛住喊，好似聽唔到我講野咁。

無辦法之下，我唯有企起身，攬住佢同輕輕掃佢背脊，好似氹細路咁。

我：「乖啦唔好喊啦，無事架喇有我係度吖嘛~

」

雖然唔知佢因咩事喊，但我諗我有能力改變既，就算無我都會令到自己有啦總知。

身為一個老公，一個男人，又點可以比自己既老婆喊呢係咪先。

Cherry：「我頭先真係好驚呀lulu…我頭先真係怕自己會再見你唔到，成個腦都係你個傻樣…

」

唉…咁你又千芳百計駛走我？何苦呢好老婆…

我：「咁你應該比我留係你身邊陪你生吖嘛…做乜要同晨哥佢地夾計駛走我呢？」

Cherry：「我以為自己無你係身邊可以堅強D，生個陣可以順利d吖嘛…

」

我：「咩理論黎架…你即係覺得無左我你會好D呀？

」

Cherry：「你知我唔係咁既意思架衰人…我係覺得自己一直都太依賴你，樣樣野都要你照顧，所以先想自己堅強返一次咁大把…

」

「但無諗過原來係唔得，我個陣真係好想有你係我身邊捉實我隻手…好想聽到你把聲…

」

真係傻婆黎…

我：「我話過要照顧你架嘛，你又點解要咁諗呢，仲駛走我搞到我趕唔切過黎，你知唔知我鬼死咁內疚。」

「不過真係辛苦你啦，你真係做到啦你好堅強。但之後就等我陪你仲有我地個女一齊堅強咁行落去啦，好唔好？」

聽到我咁講，佢終於破涕為笑，仲攬到我實一實。

女人真係易氹，哈哈哈哈。

Cherry：「記住你今日講過d咩呀魯路修，咁我同女以後都痴實你架啦~~你要養我地架~~

」

呀啊，中左佢計添。不過唔緊要啦，反正我都一早打算一世照顧佢地既。

少有地，今次我居然覺得一D都唔麻煩，仲好開心，好似仲期待緊黎緊既生活咁。

我諗老豆當時同我講既「愛意」就係咁啦…

條友又真係咩都估到…不得不佩服佢…

Cherry：「lulu?」

我：「啊，做乜呀？」

佢輕輕呼喚我個名，將我個靈魂拉返黎病房。

Cherry：「係咪有乜事啊？我頭先講下笑架咋…我會出返黎做野架…」

我：「啊，唔係唔係，我唔係咁既意思，我只係咁岩諗起我老豆之前講既野啫。」

「嘛，唔洗擔心我，無事無事！你專心休養就可以！點呀個女叫咩名好呀老婆~」

Cherry：「唔…我諗住叫「詠詩」，你點睇呀？」

我：「唔！好呀！好有仙氣呀，第時一定溝死仔呀！

」

Cherry：「正經d啦傻佬，我地個女黎架。