[真人真事][校園][純愛]《兩個我加一個妳》: 第一百一十九章

一步一步行過去

直至行到去佢側邊，

終於選擇出聲

我:「唔好意思呀小姐請問呢度有冇人呀 」

芊靈:「冇人呀我都係喺度等人啫 」



我:「好啦咁我坐落嚟喇 」

一坐低咗我就同佢對望，

好耐冇見過喇

再見返而家都係同之前一樣，

眼球總係唔安分咁樣停留喺佢度



有咩想講

其實嗰刻我個腦係空白咗

幾年以嚟不斷咁樣諗，

究竟重遇嗰一刻要講乜野

原來諗嚟都係嘥氣



根本就冇思緒

淨係識眼定定望住佢

而今日見到嘅佢同我喺Michelle 個instagram見到嘅差唔多，

相同埋真人冇乜落差

咁當然梗係想見到真人多啲啦

講嚟都係廢話

我要做嘅就係要抑壓情緒，

唔可以透露最真實嘅表情



芊靈:「做乜望住我呀 」

我:「咁耐冇見

唔係望下都唔得掛

同埋你呢套衫好熟口面 」

芊靈:「哈哈你記得呀 」

佢今日著咗一件黑色褸，

上面有五粒白色大圓點



好似當年嗰件不過我知唔係，

因為當年嗰件係八粒圓點

下身亦都係一條黑色裙

點解咁記得

係因為我印象之中以嗰年聖誕係著得最驚艷

亦都係我覺得最靚嘅一次

我:「好似當年嗰件褸不過唔係

少咗三粒白色圓點 」



芊靈:「真係唔同咗喎

記性好咗好多 」

我:「唔係你估 」

芊靈:「係喎你帶齊啲野未

手冊功課筆袋銀包水樽 」

我:「唉呀冇帶添 」

芊靈:「哈哈



話時話咁你知唔知我地幾耐冇見丫 」

我:「我最後一次見你咪就係你退學嗰日

依家17年就嚟十年喇 」

芊靈:「係八年零十個月多三日 」

我:「嘩大佬你嗰啲係咩記性 」

芊靈:「講咗唔好睇少我記性 」

我:「點呀

返咗嚟幾耐 」

芊靈:「14年返咗嚟

屋企嗰邊都上返軌道咪返過嚟囉，

依家幫緊daddy手 」

我:「你就好啦太子女

痴線我做緊狗咋 」

芊靈:「痴線我都係小公司入面嘅打工仔

同一般寫字樓冇分別 」

我:「重請唔請打雜呀

我ok喎 」

芊靈:「請你唔起呀你知你要求幾高

我有叫過Michelle不過佢唔肯

話唔想我地之間有公事，

關係好容易出裂痕

後來諗返起都明嘅 」

我:「頭先見到佢呀

真係犀利佢同呀宏可以行到咁耐 」

芊靈:「係呀

唔係好多人行到咁耐 」

講完之後大家望一望大家

唔想太耐唔開口講野如果唔係氣氛一定好老尷

焗住都要求其搵啲野講

我:「呀bi呢

佢幾好嘛 」

芊靈:「上年走咗喇 」

我:「sorry呀

提返起你啲傷心事 」

芊靈:「唔使

冇野喎依家

不過我終於明白你當年嗰句 」

我:「邊一句 」

芊靈:「之後唔會想再養第二隻囉

除非咁有緣分自己行過嚟又或者喺街邊執到，

如果唔係都唔會嚕 」

我:「走得安詳 」

芊靈:「其實臨走之前幾個月都知佢健康有啲問題

睇咗醫生佢話上咗年紀嘅狗仔少不免出現呢個情況

已經有心理準備

不過記得嗰日返緊工，

晏晝媽咪打電話嚟話俾我知佢走咗嗰陣

都重係喊到收唔到聲

的士司機都嚇親問我有冇事 」

我:「你試下係我呢啲毒撚

已經屌柒我叫我咪撚喊費事整污糟佢架車

靚女就係大晒 」

芊靈:「痴線唔好咁話人啦

成日諗到人咁衰重係好似以前咁 」

我:「你係靚女成日都有優待梗係咁講啦 」

芊靈跟住喺度笑

我:「笑咩呀 」

芊靈:「冇

把口重係唔收成日有意無意咁樣扮晒野讚人 」

我:「從來都冇扮野

至少對住你嘅時候係咁樣 」

芊靈:「我都係唔會信你架哈哈

係喎食唔食糖呀 」

我:「好喎 」

跟住佢拎咗一條二寶出嚟

第一粒係黃色，

以前嘅佢第一時間就俾咗我

然之後再拎多一粒出嚟睇下係咪橙色

直至見到橙色先至擺落口

不過呢一刻唔係

佢拆咗包裝紙就放咗入口，

我:「你唔係唔食黃色嘅咩 」

芊靈:「哈哈

咁多年乜都變啦 」

我:「um 」

跟住到我，

咁好彩係橙色

自自然然就擺落口，

芊靈:「你唔係唔食橙色嘅咩

又話食橙色正傻仔呢樣嗰樣 」

我:「學你話齋

咁多年乜都變啦 」

最後我選擇隱瞞以前拎黃色嘅真相

我諗佢唔會知道個真相

亦都冇乜興趣知，

都係嗰句我唔想俾佢知其實咁多年都係冇放低過，

既然係咁又何必特登講出嚟呢

講下講下大家傾返熟，

一切就好似以前讀書咁樣，

喺同一個地點你一言我一語，

從未間斷

雖然唔係著住校服，

年齡外貌都有唔少變化，

不過嗰種氣氛重可以保持到

冇被時間嘅洗禮而變質

唯一一樣唔同，

就係佢左手中指變得好刺眼，

刺眼到令我有少少唔舒服，

真係少少咋。