[真人真事][校園][純愛]《兩個我加一個妳》: 第一百零四章

跟住就搭到尾去買珍珠奶茶

買完之後慢慢行返去佢屋企

我原本諗住送咗佢返去先，

點知買緊珍珠奶茶嗰陣

佢問我今晚有冇野做



跟住我一如以往答今晚要打機啦

佢亦都係好似以往咁樣講即係冇野做啦

我:「有囉咩叫冇呀 」

芊靈:「我唔係講你夜晚九點十點喎

我係講六七點嗰陣喎 」



我:「做咩 」

芊靈:「不如一陣帶呀bi去散步好冇

因為夜晚要出去食飯

你知啦我返到去如果用電腦嘅話

我就一定唔想出嚟



我又唔鍾意瞓晏覺喎

唔知做乜好就不如帶佢去散步

順便叫埋你

我知你肯嘅 」

我:「又搵我攝時間 」

芊靈:「你真係心水清嘅啫 」

我:「慘得過我又受 」

芊靈:「咁好啦一陣你喺樓下等啦



屋企有人喺度

定係你唔介意上嚟

我諗媽咪ok嘅 」

我:「唔好搞我最唔鍾意就係見到對方屋企人

又唔知講乜，

世界級尷尬咪鬼預我 」

芊靈:「咁好啦你喺樓下等我啦 」



我:「好 」

跟住行咗一陣就到佢屋企，

佢上去接呀bi落嚟

我就喺樓下鳩fing fing

等咗一陣就見到佢，

呀bi個死仔一見到我又撲埋嚟

我:「做乜咁興奮呀

你係咪gay架下 」



呀bi梗係唔識講野啦淨係喺到碌大對眼望住我

芊靈:「呀bi性取向正常嘅

唔使喺度冤枉好狗喇

佢見到邊個都咁興奮架啦 」

我:「又係喎屌 」

其實咁樣散步真係好舒服

特別係天氣唔熱嗰陣



所以點解佢搵我咁多次

我都冇托佢手踭就係呢個原因

當然另一個原因係佢啦

第二個叫我我都係睬佢都傻

過程冇乜特別咁樣就唔多講

行咗陣就返上去喇

芊靈:「拜拜 」

我:「拜拜 」

同佢兩個散步，

每一次臨走嗰陣我都會踎低同呀bi玩一陣

摸下佢個頭呀攬住佢條頸呀咁樣

當時喺度玩緊呀bi嘅我，

又點會諗到呢次係最後一次同佢玩丫

千算萬算都算唔到，

如果嗰陣有人同我講呢樣野，

我諗我自己都唔會信

重會屌鳩返佢

不過發生咗就係發生咗，

邊輪到你唔信

講真嘅，

最近年半以嚟

我同芊靈佢真係行得好埋

當然啦大家都冇開口

我唔知佢點諗，

但係如果你問我自己，

嗰陣我覺得拍唔拍拖真係冇乜所謂

可能你地唔信啦

我淨係知同佢相處嘅時候，

我覺得好舒服

大家都了解大家喜好，，

唔會做一啲對方唔鍾意嘅野

拍拖與否又有乜所謂

呢個的而且確係我當時嘅諗法

同埋我好慶幸，

我同佢從來都冇鬧過交

平時玩嗰啲唔計啦

就算真係計埋落去，

咁其實佢都唔係好難氹啫

俾啲糖同埋同佢鳩噏就已經搞掂

唔似其他人所講咁

又呢樣又嗰樣

正如我上面所講，

大家了解大家嘅喜好，

知道對方有啲乜野鍾意有啲乜野係唔鍾意

咁就盡量唔去做費事令到大家唔開心

我覺得咁真係好重要

我冇問過佢點樣睇

不過我諗佢應該都同意啦

即係好似嗰次睇戲咁樣，

睇完之後我同佢講我話唔鍾意睇，

講埋點解

跟住佢就冇再叫我去睇戲

咁咪啱囉啱唔啱先

有啲人會話鬧過交先至會提升感情

老實講喺我身上，

我覺得係唔適用嘅

起碼我真係會有條刺喺度

早幾日咁樣屌完，

要我依家扮冇野真係難啲

除非係返緊工咁就冇計啦係咪先

老細出得糧就要預咗架啦

鬼叫自己冇本事做死一世奴隸

唔係真係冇錢呀大佬

但係如果真係咁樣同朋友大嘈完

自己九成九都同嗰個人做唔返朋友

總係會凝住有條刺

所以咁耐以嚟同我friend嗰啲，

大家真係從來未嘈過

Cyrus就係一個好好嘅例子啦

十二年入面一次都冇鬧過交

咪又係做咗咁耐老友

愈講愈遠呀講返故事入面先

頭先我都講，

我好感恩嘅係我同芊靈識咗幾年從來都冇鬧過交

正當我好天真，

諗住可以成個中學生涯都可以喺佢身邊，

繼續同佢一齊升上去大學甚至維持到出嚟做野嘅時候

唔知點解個天總係唔會咁易俾你得逞，

次數唔需要多，

一次足以致命。