[真人真事][校園][純愛]《兩個我加一個妳》: 第九十八章

說時遲那時快

我地好快去到金鐘跟住再轉埋車去到海洋公園

人就當然多啦，

不過好彩唔係塞到幾個字都行唔到嗰種

芊靈:「好耐冇嚟海洋公園喇 」



我:「你就好啦有錢女

小弟窮一次都未嚟過 」

芊靈:「又喺度扮野

明明就自己唔鍾意嚟唔鍾意玩 」

我:「屌又喺度玩踢爆 」



入到去我地就喺動物嗰度行咗一陣

去都係去水族館同埋睇熊貓

芊靈:「你睇下佢好大條呀 」

我:「係喎真係好大條喎 」

跟住佢又喺度拍我手臂



芊靈:「好hea呀你

唔想講咪唔講囉 」

我:「咁唔通點呀

唔通話唔係好大條咋喎咁樣呀

到時你咪又鬧我傻點會唔大條 」

芊靈:「講呢啲你又咁醒

平時又傻下傻下咁樣 」

我同佢都有帶相機嚟嘅



之前都講過啦，

我同佢都唔係好鍾意影相嘅人

可能都係最後影一兩張咁樣

不過今日佢唔知痴咗邊條線

係咁話要影相

我:「又影呀唔好啦 」

芊靈:「影啦影啦 」



我:「今日傻撚咗

點解成日影相 」

芊靈:「你就傻

係咪唔得丫 」

我:「梗係唔係啦

你喎 」

芊靈:「咁就唔好講咁多啦

影啦 」



跟住去睇熊貓點知睇唔到

唔知佢匿埋咗喺邊度

同埋嗰陣未有人扮熊貓潮文

咁就算啦跟住就搭纜車上去另一邊

芊靈:「其實呢我不嬲都好驚玩機動遊戲

不過嚟到又冇乜理由唔玩

玩唔玩 」



我:「知唔知點解咁多年我都唔嚟海洋公園 」

芊靈:「睇你個樣肯定係驚啦 」

我:「你知就好啦

我喺下面睇住你玩

順便可以幫你睇住啲袋 」

芊靈:「一齊玩啦

一個玩邊有癮 」

我:「唔好啦

到時我驚冇命落返嚟 」

芊靈:「傻嘅點會

有姐姐喺度保護你 」

我:「你係姐姐

大我幾個月咋 」

芊靈:「唔係大呀 」

我:「都係算啦我睇住你玩啦 」

芊靈:「陣間上到去坐低嗰陣你就捉住我隻手

咁樣就唔驚架啦 」

我:「嘩咁你咪好犀利囉 」

芊靈:「係呀姐姐係咪好勁呢 」

我:「屌你啦當我係細路仔

講啲咁嘅野 」

跟住佢無啦啦捉住我隻手

芊靈:「依家我地咁樣一路行過去

咁咪壯到膽 」

我:「哦

好 」

唔係講笑嗰下我都呆咗一呆

從來冇諗過佢會咁樣拖住我隻手行

行行下就行到去海盜船嗰度

嗰陣對手重拖緊

芊靈:「使唔使咁緊張呀咁多手汗 」

我:「靚女拖住我喎點會唔緊張 」

芊靈:「你講得出呢句即係唔緊張啦 」

我:「 我……好……緊緊緊緊張，

係咪要咁樣先叫緊張 」

芊靈:「痴線會唔會咁呀 」

我:「講真真係一定要玩 」

芊靈:「都嚟到呢度咯

冇野嘅上到去你捉實我隻手啦

咁大家咪唔驚囉啱唔啱先 」

成日都對住佢講笑

話想拖佢隻手

一講就講咗幾年

估唔到今日真係可以名正言順拖住佢隻手

唔使偷偷摸摸唔見得光咁樣，

真係成世仔都記得

第一次體會咩叫做心亂如麻，

原來平時真係唔會知

成日睇戲睇小說都會覺得主角使唔使咁誇張，

少少野就靦腆

不過經歷過就會知道，

唔需要講出嚟自己試過就知

總之呢一刻我都係咁講，

嗰日嘅緊張唔係來自於機動遊戲，

其實我真係講真，

只係唔想俾你知先至扮到若無其事咁樣

我唔鍾意玩機動遊戲，

亦都好驚玩機動遊戲，

不過更加唔鍾意見到你失望，

亦都好驚見到你失望，

青春年代嘅戇鳩仔就係咁樣，

自己所謂嘅底線根本就係不值一提

冇價值嘅，

因為條底線其實唔係根據自己嚟設定，

總係有一個人不斷令你去更改，遷就

演變成所謂嘅破例，

依家老喇過咗成十年，

回望返以前係幾懷念呢一個自己，

唔係因為以前自己幾咁所謂嘅熱血，青春，

亦都唔係因為以前嘅自己冇依家咁攰咁殘

老實講我就唔覺得依家嘅自己殘嘅

最重要最重要最重要一點，

就係以前身邊總係有一個咁嘅人

點解要懷念？

唔需要多講啦。