[真人真事][校園][純愛]《兩個我加一個妳》: 第八十二章

睇完之後即刻打俾佢啦

點都好啦有啲野都要親口多謝我覺得先有誠意

我都係啲舊派人嚟

我:「多謝你 」

芊靈:「係咪好勁呢咁都重記得你鍾意呢樣 」



我:「係勁嘅

我都估唔到你記得 」

芊靈:「唔好睇小我記性呀 」

我:「得啦冇人敢睇少你呀 」

芊靈:「張咭我寫咗好耐呀唔好扔呀 」



我:「我見你好似平時學校嗰啲簿咁樣

畫晒一格格勁撚完整

上次聖誕嗰張你都唔係咁 」

即係佢整到好似以前嗰啲作文紙咁樣

一格一個字



唔係講笑真係幾有心機

芊靈:「咁難得有個傻仔生日

咁難得我又記得呢個傻人鍾意啲乜

咁咪認真啲囉

警告你千祈唔好扔 」

我:「你講到咁我一定唔扔 」

芊靈:「得閒拎嚟睇下囉嘻嘻 」

我:「得閒先算



下次考作文嗰陣就望一望 」

芊靈:「低b

話咗我幾準時

你一生日我就俾禮物你

我份禮物你就幾個月之後先俾我 」

我:「係係係對唔住

我錯晒滿意未大人 」



芊靈:「哈哈差唔多啦

不過咁認真講句

今日真係幾開心

你又點呀 」

我相信每個男仔聽到同自己約會嗰個女仔講開心嘅時候

心情難免會飄飄然

我:「梗係爽啦有人幫我慶祝生日喎

不過最開心都唔係呢樣 」



芊靈:「下

係咩呀 」

我:「你開心囉 」

唔知點解以前細個嗰陣，

好容易就可以扮到好兒戲咁樣

講一啲咁核突嘅野

愈大個就愈退步



芊靈:「痴線關咩事呀 」

我:「氹到女神開心喎

乜唔係已經夠喇咩

重有咩開心得過呢樣 」

芊靈:「你呀冇句真呀

好彩識得你耐，

知道你平時都係吹水唔抹嘴 」

我:「又唔信我 」

芊靈:「係呀因為真係太假 」

我:「唔信就算啦 」

芊靈:「返到屋企未呀 」

我:「樓下喇準備搭𨋢 」

芊靈:「咁好啦唔阻你呀沖涼啦

記住唔好懶得滯唔吹頭就上床瞓覺 」

我:「我點瞓覺使你教 」

芊靈:「好心提你又俾你鬧

我錯囉唔好意思呀 」

我:「講笑啫講笑啫

嗱你依家睇住個錶，

照計呢我十一點半就沖完涼

咁我十二點搵你咁咪證明我冇瞓覺

有吹頭囉 」

芊靈:「你話咗呀講過要算數呀

費事你一陣整病自己又屈我 」

我:「我邊度似咁無賴

總之一陣搵你啦依家我入𨋢喇 」

芊靈:「拜拜 」

其實頭先我真係講真嘅

或者各位巴打絲打都會有個同感，

就係以前乜都唔識，

中學雞暗戀人嗰期

心情真係會因某個人而變得起伏不定

可能某個人只係做咗啲好皮毛嘅野，

甚至係連佢自己都唔記得自己做咗啲乜

但自己就會因為佢講嘅一句說話，

而變得沾沾自喜或悶悶不樂，

旁人唔會理解亦唔會明白，

係得自己先會知道點解咁開心又或者失落

總之情緒就唔係由自己管理，

以前細個可能真係特別戇鳩

就連關於自己嘅野，

都唔可以去操控

要交俾第二個人管理，

依家大個咗當然唔會諗啲天馬行空嘅野

可能明白到有啲野唔諗好過諗

冇期望自然冇失望聽落去好廢，

不過真係至理名言

當然啦，

曾經嘅我其實係有幻想過，

唔知自己有冇試過咁好彩，

有資格去管理芊靈嘅情緒

成日都諗如果呢一方面有對等咁就好

各位盡情恥笑啦

雖然都只係我ff，

但亦都唔敢幻想得太嚴重，

我唔期望自己可以操控佢一日甚至乎半日嘅情緒

但如果我知道佢心情，

曾經因為過我而起伏過一刻鐘，

旁人聽落去咁少都好啦，

其實都已經好夠

話說回頭，

17歲生日的確好難忘，

喺度點都要講一句，

多謝你，

芊靈。