[真人真事][校園][純愛]《兩個我加一個妳》: 第六十一章

佢今日比我想像中著得更加靚

黑色褸但係中間嗰啲鈕扣好搶眼

八粒白色圓點

下身見到係一條黑色裙

當然嗰陣係冬天



自自然然就著咗黑色legging啦

再加一對黑色boot

即係話成身都係黑色，

如果係男仔實俾人話毒撚啦

不過靚女待遇當然唔同得多啦



啱唔啱先

再戴咗一頂米白色冷帽

講真識咗佢年幾

今次真係執得最正一次

當佢愈行愈近嗰陣真係有少少呆滯唔識俾反應



未去到心跳加速咁誇張，

但係的而且確嗰陣我淨係眼定定咁望住佢

直至佢出聲先至將我個魂魄叫返返嚟

芊靈:「今日好型仔喎 」

我:「唔好講笑啦

同今日嘅你比我拉去打靶就得

唔係吹水今日你真係艷壓四方 」

芊靈:「多謝喎



不過淨係今日咋咩 」

我:「娘娘平時都靚

不過今日真係出類拔萃 」

芊靈又例牌喺度偷笑

老老實實其實佢都幾撚蠱惑

明明就好鍾意俾人讚

但係又扮撚晒野唔在乎



最抵死又忍唔到笑

所以上到小巴嗰陣即刻摸佢頂冷帽

事關小弟好鍾意一啲毛毛嘅野

講明先我唔係基佬

但唔知點解由細到大都好鍾意摸呢啲野

芊靈:「做咩整我頂帽 」

我:「懲罰頭先有人等車嗰陣喺度偷笑囉 」

芊靈:「痴線偷笑都要懲罰



得罪你咩呀 」

我:「如果係第二個就唔需要被人懲罰嘅

不過你嘅笑容有淨化嘅能力

點知你竟然咁孤寒偷笑

唔光明正大俾我睇 」

跟住佢又偷笑

我:「嗱嗱嗱



又偷笑喇 」

芊靈:「冇呀冇呀冇呀 」

我:「有邊次你係認丫 」

同佢搭車有度好

就係唔會掛住做自己野

我覺得兩個坐埋一齊，

如果冇互動嘅話不如分開坐啦

我好唔鍾意一齊坐但係各自做自己野嗰個感覺

但問心呢啲野點講得出口

我冇資格阻住人地做乜野架嘛

冇理由因為我唔鍾意就要人地就我

人地一句撻埋嚟關你撚事

我點樣答佢呀

不過好彩一向同芊靈搭巴士都唔係咁

唔會各自為政

再者嗰陣巴士上層都冇乜人，

細聲傾幾句計無傷大雅丫

大約七八個字之後就喺長沙灣廣場落車

唔係講笑

一路同佢芊靈拍住行真係幾有優越感

出面啲人戇鳩鳩，

就咁睇一定以為佢係我女朋友

當然我知真相係點

但係起碼可以呃到人先啦哈哈

有啲mk仔行過都特登望佢

最撚抵死有個mk仔

明明行過咗，

特登跑返返嚟喺我地面前扮打電話

好死唔死俾我地見到

有電話掣嗰一面向咗外出

你知以前啲電話係有電話掣架啦

屌你真係假撚到

當然我唔敢笑佢啦

陣間行埋嚟打我一定輸

輸都唔緊要最慘重要芊靈喺度

已經唔講自己會唔會傷

到時真係做柒姑碌

我又點會用許呢件事發生呢

我:「睇下你幾有魅力

人地特登行返轉頭搵你 」

芊靈:「你唔俾人地係睇你嘅 」

我:「好野喎咁都講得出口 」

芊靈:「可能真係呢 」

之後經過有間賣小食嘅野

我都唔知依家重喺唔喺度嚕，

原本想話食但係今晚打邊爐

同埋有時啲小食好撚頂胃

咁就話唔食啦

行到冇野行嗰陣就行去深水埗

其實就好易行

你出到去一個位，

嗰個位可以望到個七人球場嘅，

然之後直行就可以

行三四個字到啦

跟住轉左就會見到西九龍中心

你知啦帶住芊靈一個女仔，

去高登，黃金咪真係搵笨柒

冇理由因為我想睇野搞到佢要戇鳩鳩漫無目的咁樣行

所以就話去西九算啦

其實我地好無聊，

都係上到最高跟住落返嚟

原本我想去揸水

但係諗諗下西九廁所係世界級

所以都係唔去

各位冇睇錯呀，

07年西九個廁所都已經係好犀利

真係唔可以睇小

芊靈:「係喎你鍾唔鍾意溜冰呀 」

我:「唔好搞 」

芊靈:「唔係今日喎我話遲啲出嚟呀 」

我:「都係麻麻地

你要做運動打羽毛球算啦 」

芊靈:「打得多都悶啦 」

我:「你搵第二個陪你去啦

一係我去到齋坐淨係你溜好冇 」

芊靈:「咁樣就唔過癮啦 」

跟住再逐層逐層，

行完就走，

嗰陣都四五點

於是下一步就經太子去旺角喇。