[真人真事][校園][純愛]《兩個我加一個妳》: 第四十八章

之後就見到芊靈佢地幾個行商場

我當然要做返一個專業痴漢

就係一路喺後面

好彩佢地冇見到我啫

行行下大約過咗幾個字，



就見到佢地分開

得芊靈一個住得比較遠

自自然然一個去搭車，

呢個時候終於可以實踐我個計劃

落到去見佢喺巴士站排緊隊等車



呢個時候我梗係九秒九急步行去佢前一個站

點解要咁做上一回已經講咗

亦都好彩巴士冇喺呢個時間嚟，

我個計劃可以順利完成

依家可以做嘅就係等巴士嚟



講下講下巴士已經到咗，

咁我就梗係坐上層後少少嗰啲位

重要特登坐落啲，

費事一陣俾芊靈見到個頭

係咁嘅話我就會前功盡廢

部署咗幾個禮拜，

臨天光瀨尿嘅話我真係可以返屋企瞓覺

當然要小心啲啦



好快就去到芊靈嗰個站，

跟住我喺巴士上層望落去

就見到佢喺度排隊

天時地利人和全部齊晒，

只要佢一上車，

坐埋佢平時坐嗰個位，

咁樣呢個劇本就真係可以順利進行



唔知一陣佢有咩反應呢

照計應該唔會嬲丫

我又唔係呃佢啲乜野

都係同佢玩下啫

愈諗我就愈心急

好期待佢排完隊上車，

果然冇幾耐佢已經上到嚟上層

重要坐埋佢平時嗰個位，



右手邊由頭數落去第六個位，

呢鋪重唔好玩

跟住我就靜靜雞咁樣坐佢後面

好彩佢戴住耳機，

聽唔到由我發出嘅聲

安頓好喇，

我就拍佢膊頭



佢一見到我個樣成個人o晒嘴

重即刻除咗耳機

芊靈:「點解你會喺度 」

我:「臨時決定唔去外國嚕

喺度讀埋A-Level，

上埋大學就更加好 」

芊靈:「玩玩玩

好好玩咩 」

我:「玩乜野 」

芊靈:「你自己知啦

臨時唔去，

搵你又唔覆 」

我:「如果我覆咗你呀

咁樣個效果咪唔夠震撼囉 」

芊靈:「唔會再信你呀

知唔知我見你成個禮拜冇on，

我好傻咁樣以為你唔知有咩事

話咗俾我聽去外國但係未出發嗰陣，

我以為真係要幾年之後先有得見，

我以為呢幾年得我一個帶呀bi去散步，

我以為呢幾年冇一個人喺我隔離同我鬥氣，

喺度講埋啲無聊嘅野，

好喇到你人間蒸發嗰陣，

我重一路同自己講應該冇野嘅應該冇野嘅，

好似念經咁樣呀，

點解咁多野唔玩要玩呢啲

依家好好玩咩 」

死火佢好似真係有啲嬲

反應比我想像中大

跟住我梗係上前一行坐返佢隔離啦

我:「講真估唔到你咁大反應

唔好意思 」

芊靈:「我以為原本係講笑

但我諗應該唔會丫，

呢啲點會講笑

點知原來真係 」

跟住佢就一路側住個頭望風景嗰邊，

剎那間我就諗到一個極無聊嘅方法

講真依家一定做唔出

係以前戇鳩仔嗰個年代先會做到

我:「你唔好嬲住先啦 」

芊靈:「冇喎邊得閒嬲你 」

我:「你啲表情不嬲擺喺個樣度

有冇嬲一眼就望到啦 」

芊靈:「懶醒，

叫我唔好嬲咁你又玩 」

我:「都話唔係玩

我真係過到去再返返嚟 」

芊靈:「咁點解返嚟丫

就睇下你點樣兜。」

跟住我就用剎那間諗到嘅無聊方法去氹佢，

就係唱歌

我:「原來這裡沒有你 原來世界沒有那麼美，

就係咁樣我就決定返嚟 」

芊靈:「低b 」

話咗女人口不對心

佢講就講低b，

但係個嘴已經起咗一個半月形嘅彎角

但係又要扮嬲喎

的而且確呢個方法又無聊又尷尬

不過總算拎到我想要嘅效果，

幾無聊幾尷尬已經係後話啦

芊靈:「唔唱埋落去 」

我:「唔唱喇

一兩句就夠啦 」

芊靈:「唱啦唱啦

好想聽 」

我:「咁想聽返屋企search 」

芊靈:「咁串

哼 」

跟住佢又好似細路女咁樣，

望住風景咁樣黑面

不過依家一定係扮嬲

情況同頭先完全唔同

不過咁樣，

明知佢係扮蟹又有咩用

因為我都係再唱多幾句

我:「原來這裡沒有你 然而我渴望再抱擁你

而從前相依那滋味 如若我已不想接受

這刻怎會念記。」

芊靈:「邊個想同你抱擁 」

我:「唱俾邊個聽咪邊個囉

夠喇唔唱喇 」

芊靈:「副歌呢 」

我:「有緣先啦 」

芊靈:「無聊鬼

即係下次又想玩啦 」

我:「重邊敢玩呀 」

芊靈:「你呀，

今日同我同一個站落 」

我:「知道娘娘 」

芊靈:「好肚餓呀哈哈 」

笑返咪好囉

原來唱幾句歌就可以氹返佢，

乜都值得啦，

只係我估唔到，

呢一刻嘅我已經過咗咁多年，

仍然冇乜進步

都重係唱緊呢首，

真係好諷刺。