[真人真事][校園][純愛]《兩個我加一個妳》: 第二十七章

跟住就開始放新年假

起碼兩個禮拜冇得見芊靈

老實講同佢傾計嘅時間都唔係好多

因為聽佢之前講

佢話新年會去旅行



所以我都冇喺msn搵佢

依家諗返讀書放假真係好正

嗰個新年假我同Cyrus每日就係咁打機打機打機

依家邊有呢啲日子

講真嗰句就算係禮拜六日放假，



要我打成日機真係頂唔嵮順

好容易頭昏腦脹

真係唔明點解以前咁好精力

即使唔使返學都係八九點就自動彈起身

唔認老都唔得



有時又要出街，

真係好耐冇試過放假係全日留喺屋企

依家先知原來頹廢都係一樣好野

起碼個腦唔使轉

咁就已經夠啦

趁芊靈唔喺香港，

不如喺度講多啲關於我自己嘅野啦

雖然我都知好廢



亦都知道冇乜人想知

就當俾下面啦唔該

嗰陣應該係我轉咗校半年

好多野都已經適應晒

話時話以前嗰批同學真係冇乜搵過我

不過諗返轉頭其實都正常嘅

有時真係邊得閒理你丫



重要人都唔喺度

你話好好朋友就話啫

好明顯我就未去到咁啦

同埋由細到大，

小弟都唔係話好著緊人地關心嗰種人

雖然我係一個毒撚

但另一方面就有啲唔同

對我嚟講，



只要覺得舒服就可以

有冇人理有冇人搵我唔係睇得好重

咁當然如果你話係芊靈就梗係唔同講法啦

不過自己都知自己咩事，

佢點會無啦啦因為關心而搵我

有時有啲野都係貼地啲好

離地嘅話去到最後咪盞搞到自己。



唔知大家重記唔記得

芊靈係三月二號生日

話說當我地放完新年假之後，

就已經係二月尾

即是話同芊靈生日好接近啦

我好記得係喺生日之前一日

我地係要去嗰個乜鬼野桌上遊戲學會

嗰陣我好搞笑架

知道佢就嚟生日，

所以同佢玩波子棋，黑白棋嗰陣，

成日都特登讓佢

等佢贏下開心下

同埋過程其實都好刺激

因為我要特登輸，

但又要扮到好認真咁樣諗

有幾步自己個腦真係轉唔切，

你知啦平時點會咁樣玩啫

好彩我都特登放慢手腳

咁起碼轉軚嗰陣都易啲丫，

又要擔心佢發覺到

大個諗返其實真係好無聊

都唔知以前點樣諗出嚟，

諗住咁樣就可以氹佢開心

芊靈:「又贏喎哈哈 」

我:「頂你係咪出術架

今日咁勁嘅 」

芊靈:「可能係你渣啫

講明先呀，

我冇自己偷雞練呀 」

我:「唔係邊有可能今日係咁贏

莫非你訓練呀bi陪你捉棋 」

芊靈:「你都傻傻地

狗又點會識捉棋 」

我:「唔係呀頭先咪有隻狗贏咗我 」

芊靈:「去死啦死人頭 」

我:「講笑啫講笑啫 」

芊靈:「好好笑咩 」

我:「其實都幾好笑架哈哈哈哈哈 」

芊靈:「唔好再笑呀

忍得好辛苦呀 」

我:「咁就走啦

出到去先笑 」

芊靈:「又好啫 」

出到去之後，

我:「係喎你係咪聽日生日 」

其實點會唔肯定丫

不過你知毒撚架啦，

總係鍾意扮作漫不經心

明明就唔知為乜

芊靈:「你又記得嘅 」

我:「靚女生日梗係特別記得啦

啱唔啱聽先 」

芊靈:「做乜咁好口呀 」

我:「痴線我有邊次話你唔係靚女 」

芊靈:「成日都喺度口花花冇句真

唔信你呀 」

我:「有樣野一定要信 」

芊靈:「做咩呀 」

我:「就係依家同你買個蛋糕慶祝 」

芊靈:「咁大個點食呀 」

我:「梗係唔係好大個嗰啲啦

將就下七仔買一個好冇 」

芊靈:「好 」