[真人真事][校園][純愛]《兩個我加一個妳》: 第二十六章

我:「到我問返你 」

芊靈:「問咩呀 」

我:「依家有冇邊個睇得啱 」

芊靈:「冇呀 」

我:「信唔信你呀



一睇就知你滿懷少女心事

睇小說睇上腦嗰啲呢 」

芊靈:「雖然我好鍾意睇小說

但唔係好似你講到咁囉 」

我:「成日喺度幻想幾時出現白馬王子嗰啲呢



又或者係唔知邊度成日叫春 」

芊靈:「冇囉好唔好 」

我:「明明白馬王子就喺你面前

咁你都見唔到 」

芊靈:「你呀 」



我:「唔通你咩 」

芊靈:「唔好意思未見過啲咁樣嘅白馬王子 」

我:「你真係唔識貨 」

芊靈:「自戀狂 」

我:「唔係呀其實唔係我自己講架

係啲人咁樣叫我

焗認 」

芊靈:「壹仔呀壹仔 」



我:「做乜撚 」

芊靈:「食咗藥未呀今日

未食嘅話不如姐姐帶你去配藥 」

我:「唉你你又唔信我

不過我點都唔信你冇情嘅煩惱

特別重要係女仔，

你話我呢啲毒撚就話啫 」



芊靈:「真係冇呀

暫時唔想再拍拖住 」

終於等到佢自己講

等我繼續八下料先

一於決定詐唔知

我:「之前拍過咩

邊個男仔你睇得上眼呀 」

芊靈:「有冇聽過xx偉



打籃球嘅 」

我:「有

聽講好似好高好勁 」

芊靈:「同佢拍咗一陣囉

不過最後不歡而散 」

我:「人地咁高大

重要運動型



你都唔啱 」

芊靈:「不過衰偷食呢

我都曾經諗過係咪自己俾自由度佢俾得太多

不過依家諗返起其實唔係好鍾意佢哈哈

只係嗰陣細個乜都唔識 」

我:「菩薩呀菩薩呀

你竟然咁都話係自己問題

擺明佢就衰鹹濕啦屌 」

芊靈:「應該都係啦哈哈 」

我:「佢冇搵過你箍煲咩 」

芊靈:「我俾過一次機會佢

但係點知好快就衰第二次，

咁就索性斬纜 」

我:「估唔到你咁狠

以為你係嗰啲吊兒郎當麻鬼煩嘅女人 」

芊靈:「聽你咁樣講，

就算我係都話唔係啦哈哈 」

我:「跟住就冇拍拖 」

芊靈:「係呀冇喇，

都係一個人 」

我:「你咁靚女

簡直係跌落凡間的天使

冇理由冇狂蜂浪蝶嘅 」

芊靈:「有呀不過唔接受囉

有啲好煩咪出到聲講

不過多數俾啲signal就會知難而退 」

我:「嗰條鹹濕偉有冇搵過你呀 」

芊靈:「有呀

不過冇理到佢。」

我:「會唔會係咁灑脫呀 」

芊靈:「講真真係已經冇野

分手嗰陣都係喊咗一晚，

跟住就已經冇問題 」

真心講我估唔到芊靈係呢類人

重以為佢係典型少女

成日都被困擾喺情情塔塔嘅野

我:「講真喎睇見咁多女仔拍拖

你知我地學校幾多架啦，

冇羨慕人地咩 」

芊靈:「冇你講到咁黑心囉 」

我:「講下笑啫頂 」

芊靈:「有咩好羨慕

唔係你就唔係你 」

我:「重以為你係嗰啲毒女人

見到有人幸福過你就喺度批鬥人 」

芊靈:「你真係睇得電視劇太多

唔識抽離睇壞腦 」

我:「真係冇咁樣諗過 」

芊靈:「冇呀 」

再傾多陣我地就走咗

佢返自己屋企，

我亦都慢慢行返去我住嗰度。

嗰晚我自己喺度諗，

既然芊靈自己講暫時唔想拍拖住

咁都無謂做咁多野去逼佢

雖然當時我只係一個毒撚

但係講真有邊個唔想同自己女神發展

我話冇諗你都唔信

只不過佢咁樣講，

似乎我唔應該係咁去主動獻殷勤

聽佢口氣佢都唔鍾意啲人煩住佢

咁我大約都知應該點樣做

就係唔好急唔好逼

順其自然就算喇，

或者咁講，

我寧願唔進取錯過突破性嘅時機，

都唔想太過進取失去相處嘅時間

係咪好懦弱？

我唔否認

但係對住啲愈鍾意嘅野，

愈保守唔係正常嘅咩

至少咁多年我都係咁睇，

兩人一狗咁樣去散步，

其實往後重有好多次

不過當時唔知架嘛，

嗰晚我成個腦都係呢啲畫面

可能係第一次同佢出街啦，

印象總係特別深刻

有時我都諗，

成日記住呢啲無聊野好咩，

但係偏偏就唔捨得刪除，

係咪好懦弱？

一樣都係唔否認。