[真人真事][校園][純愛]《兩個我加一個妳》: 第十一章

第二朝朝頭早，

我要比平時早啲返學校

點解

因為有功課未做晒囉

打電話抄功課我又覺得唔方便，



咁就索性早啲返去算數

各位明架啦，

有邊個未試過抄功課丫

亦因為咁，

我就搭早咗兩三班車返去



聰明嘅讀者實估到，

點解要無啦啦講呢件事出嚟

話說當我上到去嗰陣，

竟然見到芊靈

可能佢feel到有人望住佢啦，



跟住就望返住我

個樣好驚愕

微微瞪大對眼

跟住就微笑

咁我就梗係順理成章坐過去啦

既然佢都知道我上咗嚟咯哈哈

佢都重係坐返喺嗰個位，

架車嘅右手邊由頭數落去第六個位



今次應該係我第一次係朝早見到佢，

一定有運行

最衰未夠秤買唔到六合彩

芊靈:「早晨呀 」

我:「早晨 」

芊靈:「係喇

點解你會知我叫咩名架 」



我:「你咁出名係人都知啦 」

芊靈:「你係咪同級 」

我:「唔知喎 」

芊靈:「哼

你以為唔講我就會唔知咩 」

我:「哈哈

你講呀咁易 」

芊靈:「又睇下點



喂你嗰條iq題好難估呀 」

我:「諗下先啦

諗都未諗就話難 」

芊靈:「其實尋晚上到張床瞇埋眼嗰陣我真係有諗

點樣諗到啫，

究竟考第一要做啲乜 」

我:「放學開估好唔好 」



芊靈:「又喺度吊人癮 」

我:「諗多陣先啦 」

芊靈:「咁好啦

放學喺巴士站等呀

今日放學冇野做應該會早啲 」

我:「好

但係我唔知你幾點喎老友 」

芊靈:「咁呀，

如果你四點三之前唔見我就走啦 」

我:「睇死你咪係估唔到 」

芊靈:「返到去問人先嘻嘻 」

我:「你都傻嘅咁易俾你問到 」

芊靈:「幾個一齊諗就唔信諗唔到 」

我:「聽住先啦 」

就係咁，

我因為一條iq題，

就成功約佢放學

你話有時有啲野幾兒戲。


落到車我地就一齊行去學校門口，

老實講個心梗係有啲飄飄然啦

同自己心目中嘅女神一齊行去學校喎，

大個睇返其實冇乜特別

不過嗰陣自己見識少，

鍾意乜都放大嚟睇，

咁咪覺得好出奇囉

加上重係第一次，

種種因素加埋就令到我有啲緊張

好彩喺我隔離嘅芊靈唔知啫

芊靈:「係喎

一陣有早會嘅話咪見到你排邊班囉 」

我:「小姐瞓醒未呀

今日禮拜四邊度有早會 」

事關我地學校逢禮拜二同埋禮拜四就冇早會嘅

咁多年都係咁，

芊靈:「又係喎哈哈

咁咪同你一齊行樓梯上去囉

傻仔嚟嘅 」

我:「傻嘅

我依家去廁所

唔等你嚕 」

芊靈:「懶巴閉

反正今日放學我都會知

避唔到好耐咋嘻嘻 」

跟住佢就上去班房，

我就去廁所，

其實我都唔知自己點解要咁樣做

可能貪好玩掛

同埋我都係嗰啲傳統思想嘅人，

喺學校入面唔鍾意俾其他人見到同女仔咁friend，

成日都覺得咁樣會為我帶嚟麻煩

特別佢重要係靚女

一陣俾佢啲觀音兵鄙視就唔好啦

唔好煩到我平靜嘅生活，

諗返起真係好鬼毒

講開又講佢好似好有信心咁樣

唔通真係咁有把握知道我讀邊班同埋叫咩名

見到自己有好感嘅女仔對自己啲基本資料咁上心，

你話冇暗爽就呃你，

縱使佢喺我面前扮野

好似好緊張但其實只係用緊交際手腕都好啦，

我已經唔理咁多

成個腦都係ff，

有啲人就係咁傻，

淨係諗啲自己鍾意嘅野，

喺度呃自己。