火花不等人: 她眼中的陳政

Neway CEO的大堂其實不比五星酒店差，特別時值聖誕，大灑金錢之下大堂被佈置相當華麗，四圍的燈飾如繁星般閃耀奪目，在這場景下，我不管袁頌婷打算帶我去哪，但我很想要求她放慢腳步，讓我好好記下這一刻，記下在這宇宙浮遊之間，我有幸拖過她的手。
 
步出Neway，橫過告示打道我們走進了維多利亞公園，聖誕夜自不然很熱閙，袁頌婷慢了腳步，似乎想找個較佳的位置，原本一直她都領前帶著我，就在她停下來的一下，我們就有這一刻的時間，這一個畫面，是牽著手而且肩並肩的，站在維園的人潮中。
 
我們繼續走，走到一個比較靜的地方，有張長椅可以坐下，雖然仍是避不了有途人路過，但我們不管。
 
「點解咁凍，你都咁多手汗嘅？」
「俾你拖住喎，唔緊張到出少少手汗，容乜易你話我落你面呀？」
「低B！」
「著翻件褸先。」




「唔該，你呢？你得件恤衫喎。」袁頌婷接過大褸，但沒有穿上，只蓋在身上。
「我一隻手被人脅持咗，得一隻手只係可以拎到一件。」其實我好凍。
袁頌婷笑而不語，並把頭慢慢靠在我肩膀上。
「你成日唱歌追女仔咖？」袁頌婷問我。
「頭先算唔算？」
「如果有男仔唱歌畀我聽，剩係唱畀我聽喎，我都會好開心，哈。」袁頌婷沒有回答我的問題。
「咁頭先即係算唔算？」
「咁你估你第時會唔會唱歌求婚呀？」袁頌婷沒有回答我的問題。
「都‧‧‧可以考慮‧‧‧」發展得如此神速？我未有心理準備。
「咁到時你唔好再唱得咁輕佻喇。」




「知道。」我會牢記著。
「陳政，講啲嘢畀你聽，不過唔淮嬲。」
「講喇，我幾時有嬲過你？」
「咁我地都唔係識咗好耐啫。邊有機會畀你嬲我呀？」的確，當時我跟袁頌婷相識不足四個月。
「好，總之應承你，唔嬲。」君子一言。
「我‧‧‧一直都‧‧‧有‧‧‧」有男朋友？有絕症？「搵你同佢比較。」
「就係咁？」有何大不了？我還以為一般情況下女人怕男人嬲，都是因為自己不再是處女。
「你唔介意？」有何大不了？我還以為一般情況下女人問男人是否介意，都是因為自己只有A。
「有咩好介意？你介意我介意？」其實如果袁頌婷有在意過我的感受，我己經感到滿足了。
「你就係咁咖喇，成日問你嘢，你都鐘意用問題答問題，點解你唔可以直接啲畀個答案我呢？點解成日都要反問我呢？」




「對唔
住，法官大人。」我不知道袁頌婷這算不算一個投訴甚至一個指控。「但既然你咁講，我又真係好想知道你點比較法喎，講嚟聽下。」
 
袁頌婷嘆了口氣，依然靠在我肩膀上的她開始演說﹕「我覺得‧‧‧你‧‧‧個人‧‧‧好複雜，我成日都‧‧‧唔係好知‧‧‧你諗緊乜。你個人好靜，雖然有時講嘢‧‧‧啍‧‧‧都幾好笑‧‧‧有時仲口花花，但係平時好少講嘢，好似講多粒字都驚蝕底咁，但係用SMS或者MSN又好多嘢講喎，其實我有時無聊睇下啲History，都‧‧‧‧‧‧幾sweet‧‧‧‧‧‧你個人又‧‧‧無乜表情‧‧‧唔知你係到底係‧‧‧諗緊嘢，定其實係發緊夢。你有時好‧‧‧姿柔淡定，淡定到我見到都覺得忟，有時又好認真好緊張，見到你好嚴肅個樣‧‧‧我會有啲驚。你又好似好大洗，成日買呢樣買個樣。周不時見你都係戴Headphone聽緊歌，其實聽咩咖？我有時啲嘢諗唔通‧‧‧就好鐘意聽你講道理，雖然又好似好多都係歪理，但聽咗好似又好啲，起碼感覺舒服啲。你鐘意‧‧‧飲可樂，唔鐘意食煙肉蛋，又唔同我講喎，又驚自己變肥仔，但係又唔做運動。你睇落好理智‧‧‧但係有時‧‧‧又會亂講嘢‧‧‧仲無端端‧‧‧錫人一啖‧‧‧痴痴地線‧‧‧平時好冷靜，但係原來你‧‧‧都會喊。你個人又‧‧‧好似好長情，又好似好花心，身邊好似好多女仔朋友咁。我又唔見你有咩興趣，但又好似識好多嘢咁，不過啲內容都唔真定假。你平時又好似‧‧‧無乜嘢做，又無乜節目，但又唔會聽見你嗌悶，你真係唔怕悶得咖？平時情願一個人去戲院睇戲都唔約Friend去，仲有‧‧‧呀！估唔到你會睇Harry Potter嘅小說喎‧‧‧‧‧‧」

袁頌婷毫無組織亦毫無掩飾地滔滔不絕一直說，其間有時會抬起頭望著我確認我有留心，知道我聽明白又會依在我肩膀繼續說，說得高興時自己在傻笑，說得激動時拍打我手臂，這樣聽著她介紹她眼中的我，心中有點暖意。

「又話比較嘅？點解剩係講我？佢呢？」