火花不等人: 分組
「Alright, let’s take a 10 mins break, you may take your time to form your group and remember to submit a list to me by the end of today lesson.」
Mr Samson Yeung所提及的分組是為了學期尾的一份功課，主要內容是合力向Mr Samson Yeung推介一份建議書，建議書範圍不限，可以解釋一份保險產品、介紹一個樓盤、推銷遊艇會會員，總之內容並不相當重要，關鍵是在於演說技巧。當我還在伸懶腰，慨嘆兩小時的課只過了一半的時候，有幾位同學相當把握時間，開始以物色組員為名，獵食為實的行動。
「喂同學，我叫Alex呀，你有組未呀?不如我地form一組喇。」坐在袁頌婷前面的男同學轉身問她。
「哎‧‧‧你呢？」袁頌婷忽然問坐在她右手邊的我。
「可唔可以預我一份呀？」坐在袁頌婷左邊的男同學Steven搶答。
「我都未有組喎。」坐在Steven前的Kevin緊接。
「嗯‧‧‧‧‧其實成班得幾個男仔，如果剩係我地呢組都佔咗三個，會唔會唔係幾好呢?」Alex似乎己經假定了袁頌婷會同佢一組，並且暗示袁頌婷拒絕Steven和Kevin。狗公，從來都崇尚獨食。
入大學之前都聽聞過大學生的生活該是豐盛的，校舍是求偶勝地，宿舍是求愛性地，穿校服上學跟穿便服上學，除了外觀上有不同，心態的轉變也不容忽視，開放的程度遠勝從前，主動出擊積極進取才是硬道理，長輩教我們的一句「執輸行頭慘過敗家」潛藏在內心多年，成長後的今天終於領略到其真諦，就如在開學前的迎新營(學名O Camp)，我便親眼見證著一對入Camp時才剛認識男女，三天後出Camp回到城大解散後的第一件事，便是去爆房，充份善用了城大位處九龍塘的地理優勢。
「Alex你又講得啱喎。」袁頌婷和議，我見到Alex沾沾自喜的在偷笑，在旁觀察面前的這一台戲，其實亦頗具娛樂性。
「咁我都係唔好同你地一組喇。陳政，我同你再搵多兩個同學form一組喇。」作為觀眾的我突然被邀加入演出。
「下‧‧‧？」我驚訝地望向袁頌婷，她向我打了個眼色，同時看到Alex臉上像是被冰封了的笑容，以及在他頭頂上緩緩飛過的烏鴉。
「就咁喇，你快啲去搵喇，我去個洗手間先，記得搵女同學喎。」說罷就拿起自己的外套並拖展一身好輕功走出班房，瀟灑得不帶走一片雲彩，畫面就像她今早走到轉角後向右跑一樣，完全不給我機會作反應。
眼前就只剩下我獨自面對怒火中燒的狗公三人組。
================================================
「最威係你喇啦，第一堂就咁多狂風浪蝶。」
「下？我真係唔明，我連佢地係邊個都未知，點form組呀？話到尾都關乎到Sem尾個project，搵Group-mate梗係要小心啲喇。」
「哈，第一堂就梗係個個都唔識大家咖喇。
「連叫咩名都唔知喎。」
「人地好似有自我介紹叫Alex。」
「咁佢地唔知我叫咩名呀嘛！」開始有點火，原因不明。
「個陣成班得我一個知你叫咩名渣喎。」
「所以咪搵你同一組囉！」越來越激動，激動得來又很可愛。
「你仲要講到明搵女同學，斷咗佢地三個後路，絕到呢，無得頂呀你真係。」
「痴線咖，我真係好唔得個啲一嚟就咁主動出擊嘅男仔！」
「之但係‧‧‧我寫memo紙‧‧‧又算唔算主動呢‧‧‧？」
「‧‧‧等我睇下食咩先‧‧‧」
================================================
「點呀？搵唔搵到呀?」
「搵到喇法官大人，呢位Peggy，呢位Vicky。」
「Hi你地好，我叫Chloe。well done呀陳政！哈哈。」咦？袁頌婷好似有點在喘氣。
Peggy其實正是坐在我前面的同學，小小眼睛卻跟其他的五官組成了一副相當標緻的面孔，相信如果袁頌婷不在，她絕對是他們的頭號目標，所以當Alex被袁頌婷拒絕後，便轉移邀請坐在他身旁的Peggy，可能親眼目睹三人的行為感到不屑，所以在我茫然地置身在三名狗的怨氣之際，Peggy全完無視Alex的邀請，轉身過來主動提出入組。
「Hi，喺唔喺搵女仔？預埋我得唔得？」Peggy問我，我當然求之不得。
「嗯，咁我幫你搵多個女仔喇。」
然後她亦走出課室，身穿短褲的Peggy站起來後展示出一雙修長美腿，三人組馬上進一步獸化，差點吠叫出聲，我視線也跟隨她的身形直至她離開班房，我估她有一米七，如果穿上高跟鞋可能跟我平頭。
眼見連Peggy都加入了我組，我鐵定他們已將我定為頭號敵人，原本狗咬狗骨的三人，可能會因為我而團結起來。
而Vicky，是Peggy去洗手間時遇上並邀請她入組的。
下半堂的座位因為分組結果而有所改動，我、袁頌婷、Peggy的位置沒變，Vicky則坐在Peggy旁(即Alex原本的座位)，四人坐在一角。
================================================
「你都唔差呀，三個靚女圍住你。」
「再靚都無用喇，其實當時咁樣坐，我只會望住前面個兩個嘅後尾枕，你好啲，有後三七面。」
「咩呀？我有周不時拎過嚟畀個正面你睇咕喎。」
「係咩？」
「有！肯定！」
「咁都要拗一餐。」