[新手][愛情][排球]那天我成為女之後 我的人生不再一樣: 28.破冰

然後我地握完手，拎齊野之後就行左上上一層，依個情景真係好似曾相識，以前既我就係輸左比教練鬧，依加贏左喇，唔知Miss會講咩呢。
 
「好啦，坐一坐啦，都係講幾句姐。」Miss講
 
咁我地坐底左望住Miss喇
 
「你地今日打得一般，好老實講。我唔知你地發生咩事，今場打得最好既係呀潔同Eva，Eva本身反應都幾快，救左你地幾球架喇。同樣，呀潔今日開頭發揮一般般，但之後發揮得幾好，攻擊力比起以前更強，但我覺得你防守意識就差左小小，加油啦，你以前都做到。而其他人，我唔知你地點喇，咁我理唔到你地咁多，遲Ｄ四強賽事，你地好搞返掂佢，我都想你地贏，贏輸對我黎講唔重要，贏既係你地，想今年學界拎咩結果，想唔想打精英賽？你地自己諗。好喇，我講既係咁多，好好返去諗下啦。」Miss講，講完就轉身走左
 
「Wow呀潔，勁啦Miss都讚你喇。」Antonia雙手搭住我膊頭講
 




「邊係呢，Miss都話我意識唔好。」我講
 
「操操下就可以架喇。」Antonia講
 
「下話？！再慢慢操返啦…..」我講
 
「呀！係呢，其實今日贏左波，我地今晚去食返餐好唔好呀？」我再問
 
「好呀好呀。」個個都好開心咁講
 




然後我就見到Eva就拎起袋，打算自己走時我就叫住佢
 
「Eva，你想去邊？」
 
全場人都望住我
 
「今晚有冇咩做？」我再問
 
「下？！……Er……」Eva呆左咁
 




「喂喂，你真係想咁？」Antonia問
 
「算啦，其實我都放低左，中學識到既朋友真係好難得架，既然Patrick佢自己咁揀，我都應該專重佢。」我講
 
「呀潔……」其他人講
 
「你點諗呢？Eva。」我問
 
「你唔嬲我喇咩？」Eva問
 
「邊有嬲一世架，咁你今晚黎唔黎，如果我約今晚食飯。」我問
 
「咩……咩佢地唔嬲我咩？」Eva愈講，對眼愈紅，仲有Ｄ淚水係眼框度浪黎浪去
 
「呀潔唔嬲，唔代我地唔嬲既！但呀潔咁大方原諒你，我地都冇可能咁小氣咁嬲你既。」其他人講




 
「大家……嗚嗚嗚」Eva雙手掩面咁踎左係度喊
 
「唔好喊喇，仔死仔還在，下個更有趣，老實講我開頭有Ｄ嬲，但諗深一層，佢都未必係咁好姐，唔係話踩佢，但咁易就變心既，好極有限啦。作為朋友，我都提你一句，小心Ｄ啦。」我踎低，一隻手搭住Eva膊頭講
 
「呀潔……嗚嗚嗚……我…我…我真…嗚嗚…真係…….嗚…好對唔…唔…住呀……嗚嗚嗚」Eva就攬住我喊
 
「唔緊要啦，唔好再喊喇，今晚食飯果時，再傾下啦好唔好呀？」我問
 
「嗯……」Eva講
 
「……一齊去廁所換衫洗面？」我問
 
「好呀，一齊啦，呀潔。」Eva企起身，然後拉一拉我行
 




然後我地落返樓下既女更衣室，一邊換衫一邊傾計，都係講好對我唔住咁上下既野，我就話今晚見時一齊傾下開心野啦咁。
 
換完衫之後我地拉大隊去搭車返去沖返個涼，咁行出女更衣室之後，行去到大堂位時，有幾個男既就行左埋黎我度。
 
「你好似係頭先場女排賽既6號？」Ａ男問
 
但我冇理佢繼續行，跟住佢地又追上黎
 
「我地頭先有睇你打波架，見你人又靚波又正。」Ｂ男再講
 
「下？波又正？」Bianca問
 
「呀……你都係一個靚女，你係頭先個3號？」Ｃ男問
 
「你地想點呀？」Carrie就行左上前問佢地




 
「呀……冇呀冇呀，都係想識下人，做個朋友姐。」Ｃ男講
 
「算啦Carrie，唔好理佢地啦，我地行啦。」我講
 
「呀6號小姐，不如你講你叫咩名丫，你姓吳？」Ａ男問（點解佢會咁問？好簡單，因為我地今年男女排都係用自己名做波衫名，好似我咁，就係K. Y. NG咁，同樣地，Ada就會係H. S. AU咁）
 
「下……其實……我地又唔識，你都係咁岩睇波睇到我，見我靚女先想識我姐，你又知我份人係點？」我問
 
「呀……靚女，你又知我想溝你？咁快講到你份人係點。」Ａ男問
 
「車！」我講
 
然後當我想行既事候，果三個男又再上前攔住我地話
 




「比個電話號碼黎做個朋友先啦，都係電話號碼姐。」
 
「你都識講都係一個電話號碼姐，唔比都冇所謂啦。」Eva突然講
 
唔單止我地，連果三個男都呆左咁望住Eva，比佢既舉動嚇親，估唔到佢會咁講。
 
「咦，Katrina？」一把熟悉既男聲係後面傳出
 
我聽到之後擰轉頭一望，原來係Desmond，佢又想點……
 
「hel….hello Desmond。」我講
 
「你著住波衫……你岩岩打完學界？」Desmond問
 
「呀……係呀。」我講
 
「咦咦咦，喂Desmond你識佢架？」Ｂ男問Desmond
 
我心諗：唔係掛，同一伙架？
 
「係呀…..哈哈」Desmond摸摸自己後腦係度笑，我心諗你個毒撚都識到Ｄ咁MK既Friend既，仲話自己毒……等同一個MK話自己係真毒咁
 
「你地…..識架？」我問Desmond
 
「係呀，佢地都係我同班同學黎，同你介紹，Alex（Ａ男），Bobby（Ｂ男），Calvin（Ｃ男）。咁依位靚女就係我之前講既果位Katrina，呀潔喇。」Desmond講
 
「WOW，你就係呀潔？你好呀。」佢地三個聽完Desmond講之後就衝左上黎捉住我隻手係度握
 
「嗯……無咩事我走先喇。」我縮手之後就想走
 
「呀潔，你今晚有冇咩做呀？」Desmond問
 
「Sorry，呀潔今晚唔得閒。」Eva講完之後快快腳拉左我走
 
之後我地去到輕鐵站，跟住我地先鬆返一口氣。之後女排Ｄ人先跟到上黎
 
「嘩呀潔，佢地咩人黎架？夏…夏…夏…」Carrie索住氣問
 
「講識我果個咪就係之前係樓下無啦啦問我拎電話既毒男囉，而果三個真係唔識。」我講
 
「都話呀潔Market勁抽架啦，行出街都有人想識，嘻嘻。」Antonia講
 
「算啦，唔好理佢地啦，諗下今晚食咩好過啦。」我笑一笑講
 
佢地聽完奸一奸笑，之後都聽我咁講，係度講下食咩，之後無耐車就黎到，咁最後我地話Group講，就各有各上車。