[新手][愛情][排球]那天我成為女之後 我的人生不再一樣: 7.上學2

落到樓下既輕鐵站，都已經八點三，因為個個都返曬學既關係，成個站除左我一個學生外，都係Ｄ要返工既港奴。都正常既，如果學生遲到既話，
我諗都會去左食埋個早餐先啦。
 
當我企係度等緊車既時候，我發覺Ｄ男既行過都會望住眼金金咁望住我幾秒，我心諗毒撚有咩好望？
 
諗諗下，唔係喎！我依加係一個靚女黎架喎！咁樣比人望住，除左有Ｄ唔好意思之外，我居然覺得….有Ｄ爽？！點解？可能因為我毒撚格，比人望下都會怕醜，但同時因為我係一個靚女而比人望覺得幾爽。
 
好快架車就黎到，咁一如以往我都係企係車尾，因為貪車尾個位可以比我挨住嘛。然後岩先企我右邊果個毒撚就跟住我一齊，企左係後面挨住。有搭過輕鐵既人都知，輕鐵車尾個位係可能挨，加上仲可以係車尾位望返出去窗出面，所以我成日都會企係車尾。咁我就冇理到佢，我就挨埋左一邊望住窗出面既風景。望望下，我就好似見到有個身邊愈企就愈埋，於是我就擰頭望下。
 
過左無耐，我就發覺點解我隔離有個黑影既？於是我就擰個頭去望，一望……係個毒撚望住我對腳，望到眼都唔眨。唔知點解我依刻覺得有Ｄ嘔心，可能因為係比毒撚望？唔知啦，咁我都忍唔住講




 
「你……你望完未……」無錯，我講時係毫無覇氣，仲要愈講愈細聲。
 
「呀！Sorry……我無心架。」個毒撚紅都面曬咁講，然後手摸後腦咁縮返去
 
於是我扁一扁嘴，就望返出窗外既風景。無耐我就瞍(應該聽過，眼尾瞍到Ｄ野，唔知大家明唔明喇。簡單講，望到囉！)到個毒撚拎左個電話出黎……不過佢就唔係偷拍，而係開左新增聯絡人果一版出黎，仲要係度手指公捽手指公咁，我心諗唔係想抄牌掛？但我見架車準備埋站，我一於小理，架車一開門時我就一個箭步咁衝左出車。
 
我萬萬都估唔到毒撚既威力係如此可怕，佢居然跟埋我出車，之後仲企左係我前面擋住我，拎部手機問話
 
「唔好意思呀，介唔介意比你電話我呀？」佢紅都面曬咁問




 
然後我就諗左一諗……我唔係諗比唔比佢，而係諗緊…….我電話號碼幾多號！因為我依兩日都冇諗過依個問題。
 
「Er……Er……都係諗住同你做個朋友咁姐。」個毒撚再講
 
其實我真係一Ｄ都唔想比電話佢，一黎覺得個毒撚真係毒到出汁，二黎我仲係個直男，唔會對個男有興趣。可能你地會話，既然你話你係直男，咁男男做朋友有咩問題？因為我未覺得同佢可以做到朋友。
 
既然係咁我就反客為主咁拎自己部電話出黎，就話
 
「不如你比你電話我？」我問




 
「好呀好呀！」個毒撚聽到之後好似痴左線咁，好似隻流口水連登狗咁
 
之後佢比左佢個電話我之後，仲set埋自己個名就話「記得搵我」之後，就好開心咁走左。咁我都明既，拎到靚女電話，都好難唔開心既。
 
比個毒撚搞一搞，又遲多一個字，唉。咁我就急急腳咁行返去學校。
 
去到學校門口，我就禁一禁個門鐘等佢開門。開左門入到去之後，門口個校工就話「校防署記名先好上去呀」，然後我一聲唔該同點點頭就行左去校務署。
 
入到去之後個書記揭開本黑色既簿就話「寫返你個名，班，學號，然後寫埋你左邊果張紙仔，上去二樓搵訓導。」冇錯，我地學校有個好過癮既玩法，當你遲到，係唔會比你咁輕易過到骨。咁我地學校係有早會，如果你遲過早會返到的話，係要上去搵訓導比佢鞭屍。
 
你地可能會奇問，點解我會咁清楚？因為我係男仔果時有時都會遲到，就係咁簡單。
 
咁我填……又有另一個問題，學號係…..？係我有疑問既時候，我醒起枱下面有每班既人名表，於是我就拎左一張係拎搵。伍……伍……伍……伍……伍……呀！搵到，咁我填完之後我就拎埋張紙仔上去。
 




我行緊上去既時候，我突然諗起岩岩先搵學號果時望到既野……就係點解班D人既人名同我以前係男既時候係一樣……？