《我還是救護員的日子》: 4.5 升職
於我眼中，救護員主要分兩種，當然唔係紅牌同綠牌，而係「搏」同「唔搏」。
局務，又名功夫。除咗去車救人，救護員於上班時間係需要處理局內既一切事務，一般都係文書工作，或者一切與救護站有關既其他支緩工作。
搏，係指搏升職。唔搏，即係嗰啲安於現狀，唔求爭取表現去博上位既人，呢類人一般被稱為大師兄。
若然要搏升職，就要俾上司見到自己係「做到嘢」。點為之做到嘢，唔係指去車救咗及幫咗幾多個人，收到幾多封讚揚信，而係指究竟幫上司處理咗幾多局內事務。
聽落其實相當諷刺，救護員升職與否，無錯係根據工作表現，但呢種表現同救護工作係完全無關。
「咦…杰佬你今晚唔係請咗假架咩？返黎做咩？」今晚返夜班，剛換好制服既輝仔問。
「返黎做嘢呀嘛。」穿著便服既杰佬回答。
尚未正式成為兩柴既杰佬係其中一個搏緊既人，明明請假但返黎既原因當然係為咗處理局務…
都係既，平時返工九成時間都係去車，邊有多餘時間去處理文書工作，咪唯有趁放假時間特登返局搞，或者放工後留低搞。雖然係OT，但係唔會有任何補水。
加班都好講timing，話明係爭取表現，當然係要揀阿sir仲未放工既時間返黎加班…
點解？
因為要俾阿sir見到，要俾佢知道你係點樣犠牲休息時間都要特登返黎做嘢。若然只係一直默默付出，自己所做過既嘢並無人知道亦無人見到，效果會係事倍功半。
曾經聽聞過，唔少結咗婚而又搏緊既救護員都經常被老婆投訴，話個老公成日唔喺屋企，就連放假都要返工，好似無咗個老公咁。
工作途中，杰佬既手機忽然響起：「喂？老婆？係啊返咗公司喇，而家做緊嘢。」
杰佬傾電話期間，局內忽然響鐘…
「燈凳燉鄧～」
「緊急輔助醫療救護服務，秋名山去123號救護車...」
杰佬：「響鐘喇，我去車先喇，你早啲休息啦，拜拜！」
然後佢關上手機。
「咦…乜你老婆唔知你返黎係做局務咋咩？」輝仔問。
「唔知架！」杰佬回應。
「咁你今晚唔會做通頂架？咁你等陣去邊？」
「超！你理得我？」
「去車啦，唔好理人咁多。」我同輝仔講，今晚我地係同一車更。
我當然知道，杰佬做完局務之後係有「特別既地方」要去，第二朝先會返屋企。
升唔升職，搏唔搏呢樣嘢，我當然有認真考慮過，但我諗自己係偏向「唔搏」嗰種人。實不相瞞，其實我最近萌生咗一個連自己都感到好掙扎既想法，就係選擇唔做救護員，打算辭職。
呢個想法，我只係同細華一個人講過…
「其實我想唔做。」當時車上只有細華同我兩個人。
「原因？」
「因為我發覺自己想做既，原來係另一樣嘢。」
當初投考救護員，某程度係因為阿傑，因為我想救人，想憑住救人去消除自己心中既內疚。身為救護員既呢段時間裡面其實幫過唔少人，過程中獲益良多。但日子越耐我就越發覺，救護員其實並唔係自己既理想終身職業。加上，我發現無論幫幾多人救幾多人都好，我心中既內疚依然無法消除。
「哦…」細華並無追問我到底想做啲咩，所以我亦無講。
我想做啲咩？我諗要賣吓關子先。
細華又講：「無所謂既，最緊要自己諗清楚。」
「其實如果唔係呢個原因，我本應打算今年結婚，但我覺得自己既工作好似仲未穩定…」
「痴線！結唔結婚呢啲嘢，係睇份工穩唔穩定架咩？係睇個人穩唔穩定架者！」
聽完對方呢句說話，我彷彿有種當頭棒喝既感覺。
「哈…咁你呢？你又打算時結婚？」我問。
細華有個差唔多拍咗十年拖既女友，感情狀況穩定。佢女友係一名護士，重點係佢未做救護員之前就已經同呢位護士女友一齊。
「唔知架！或者唔結都唔出奇，可能同居住埋一齊就算。」
「你另一半得咩？」
「得啊，只係價值觀問題者，我同佢都唔係隨波逐流既人。就算真係要結婚都一定唔會擺酒，可能就咁簽張紙咪算。」
細華對於結婚既態度，就好似啲病人拒絕送院咁，只需要係簽一張紙。
有一點係無庸置疑，佢地係相當擁有自由及生活態度既一對。畢竟唔少人係因為要應酬兩邊屋企人既關係，所以結婚時要使一大筆錢去搞場大龍鳳。
細華問：「你嗰件唔得咩？」
「咁又唔係…我地本身都唔想大搞，加上兩邊屋企人無咩所謂。」
「咁就得啦…而家咩年代啊，結婚仲係兩家人既事？係兩個人既事！」
細華係唔係一個「搏」既人？
係，佢幾年前就已經由紅牌轉咗做綠牌，目前唯一要做既就係等升職。搏升職既人，除咗要做局務，其實仲有一個條件，就係病假要少，甚至係要無請過病假。
簡單舉個例子，假如有兩個同時搏緊升職既人，大家做局務既表現差唔多，高層會以「邊個請得最少病假」去決定升邊個人。
好諷刺呢？但呢個部門就係咁。
病咗當然要請病假，但由於個制度同規則係咁，所以大部分搏緊既人係情願病住返工，務求要做到「零病假」紀錄，務求要於最短時間內順利升職。
細華雖然係搏，但由於佢係一個有性格既人，不甘於完全屈服於呢個腐敗既制度之下…至少佢病咗會去請病假，而呢啲病假唔係一般既射波，係合理既病假。
試想一想，假如救護員抱恙返工，而工作效率及表現其實係會受到病情所影響，咁樣對傷者病人公平咩？
畢竟救護員係一份對人既工作，所做既一切係會由病人既身體去直接承受。
生病去睇醫生，然後請病假，本應係一件理所當然既事。
由於細華唔能夠做到「零病假」，所以升職既事一直被拖延。關於呢件事，上頭方面只有咁既回應：「我覺得你仲未適合做救護車主管囉！」
一句認為未適合，只係因為救護工作以外既表現唔合乎上頭既心水，職途就會出現阻濟。
呢個看似係一個正氣凜然既部門，但其實背後既一切只係得啖笑。