《我還是救護員的日子》: 1.2 救護工作
「早晨阿寶！」抵達救護站，喺更衣室入面撞到某位同事。
「早晨呀益哥！」益哥喺呢行入面已經有三十年既年資。
扯一扯開話題先，我發現大部分人都唔知道，救護員其實係駐守救護站／消防局，而唔係醫院。仲有，救護員係隸屬消防處，而唔係醫管局。
關於呢點，十個人裡面起碼有八九個都唔知。
「今日遲咗喎！」益哥過黎搭咗我一下膊頭，佢既笑容依舊係非常親切：「今日無阿sir喺度，唔使集隊喇。」
佢口中所講既阿sir，係局入面既救護主任。
「收到！」我對益哥都係一如以往般恭敬。
雖然唔使集隊，但我用比平時快一倍既速度換上制服，白色制服上貼有我既紅色名牌。
點解咁急？因為喺開工之前，我想拿拿聲屙個屎先，開工前唔屙，我驚開工之後搵唔到機會屙。
正常情況下，我地每一日翻工都要集隊同點名。職級比較低既同事會著好制服列隊，而職級比較高既同事就會進行點名，同埋編配車更。
至於我地係點樣分職級？
睇膊頭啦！兩邊膊頭上面會有個臂章，而臂章上面會有顯示…關於職級呢樣嘢，稍後有機會再同大家解釋。
屙完屎，我就正式開始投入工作。屬於日更既我會接替夜更，而經已當值十二小時既夜更同事可以收工。
救護員係需要輪班工作，簡單黎講，我地既翻工模式係「Day Day Night Off Off」，即翻兩日日頭，一日夜晚，然後放兩日假…
都係唔明？
咁我不如舉個例子。
1月1日(星期一)1月2日(星期二)1月3日(星期三)1月4日(星期四)1月5日(星期五)DayDayNightOffOff 1月6日(星期六)1月7日(星期日)1月8日(星期一)1月9日(星期二)1月10日(星期三)DayDayNightOffOff(Day: 08:30 – 20:30 / 07:30 – 19:30, Night 係早晚時間掉翻轉。)
根據以上規律，如此類推。
所以剛剛放工既夜更同事就可以享受兩日假期，而今日係放假後第一日開工既我就要捱多個Day Day Night先有得再放假。
「燈凳燉鄧～」
剛剛先將啲裝備拎上車擺好，條氣都未抖順，局內既鐘聲就響起…
呢行其實真係好忙。
鐘聲一響起，就代表有市民報案求助，我地要出動救人。
「緊急輔助醫療救護服務，秋名山去123號救護車...」每次有行動，局內都會有呢種自動廣播，講述派邊一架車出動，救護車需要前去既地點，同埋係咩類型既案件。
我當然唔係駐守秋名山，個名只係老作，而救護車號碼都唔係真。
「女性長者，頭暈……緊急輔助醫療救護服務，秋名山去123號救護車...」然後自動廣播會重覆多次。
「我頂，一接更就要去車。」剛剛上車既益哥話。
佢係今日呢架救護車既主管，佢膊頭上面有三條柴。
「又係老人家…」我另一位年資比較淺，名字叫輝仔既同事抱怨。
佢似乎對又係做老人call感到有啲洩氣，而我就覺得無乜所謂，因為老人call通常都無乜嘢做。
益哥只係淡然回應：「有乜計？我地呢度聖誕老人村黎架嘛。」
「哈！」我笑咗一笑。
拍住益哥做嘢，當日既心情都特別舒暢，畢竟佢經驗豐富，為人友善又易相處，又好肯教啲新人。想申請假期，只要開聲，佢點都會幫你死掂佢，而唔會好似電視劇入面個三柴咁，講埋哂啲咩車更已經編好哂，好難調動人手之類既廢話。
作為一隊人之中既老大，請日假咁少事都阿支阿咗摩洛哥，你叫啲細既以後點樣順你？以後做嘢嗰陣，點樣同你拍爛檔上心啲？
對於益哥，一句講哂，就係好拍。
等大家各就各位，安頓好哂之後，身為司機既我打開車身既閃爍藍燈，調較好響號，救護車正式出動。
＃＃＃＃＃＃
病人係一位年約80歲既阿婆，由於佢係獨居老人，所以係佢自己打電話報案，亦都係佢親自開門俾我地入屋。
去到現場，我地立即為婆婆進行一啲基本檢查。
「Pulse 87…SPO2 98… BP 176/92… Temp 36.3 」輝仔一邊進行檢查，一邊將結果讀出，而益哥就將以上既指數抄喺紙上面。
(假如唔記得拎工作紙，我地就會好不羈咁抄喺隻手套上面，但我試過幫手抄，轉過頭唔記得上面原來係寫咗嘢，見對手套有啲污糟，然後除低掉埋…不過唔緊要，咪再檢查多次囉。)
「阿sir，我啲指數正唔正常啊？」婆婆問。
益哥回答：「除咗血壓高啲之外，其餘都正常啦。」
「我有無發燒啊？」
「無喎，體溫正常喎。」益哥問：「除咗頭暈之外，仲有無見邊度唔舒服？」
「無其他唔舒服喇，剩係覺得頭好暈…」婆婆一直用手輕搥前額。
「幾時開始架？」
「今朝一訓醒就好暈。」
「有無食早餐？」
「剛才食咗啲粥，但唔係好食得落。」
然後益哥示意我地驗埋血糖，於是我就幫婆婆拮手指，因為無食嘢而頭暈都好常見，但血糖機上所顯示既讀數係6.7，屬於合理範圍之內。
「血糖都正常喎…仲靚仔過我。」益哥：「好啦，同你入醫院檢查吓啦。」
然後，我扶婆婆坐上我地所帶備既救護車輪椅，準備送婆婆入醫院。
點解唔用床，因為張床連升降機都入唔到。邊啲大廈入到床，邊啲入唔到，真係要有經驗先知。
其實頭暈既原因可以有好多，血壓高或者血糖低都會引致。嚴重啲既，頭暈亦都可以係中風前既跡象，所以無得估，最好就係入醫院作個詳細檢查。
況且，叫得救護車一般都係想入醫院俾醫生檢查吓，雖然呢個世界上總係會有例外。
上到救護車，我地會俾婆婆訓喺床上面休息，然後開車將佢送去醫院。
去到醫院，幫婆婆辦好登記手續之後，院內既護士姑娘會接手處理，而我地既工作亦都完成，救護車會駛回救護站/消防局，等待下一次既出動。
可能你會問，乜救護員既工作睇落好似好簡單？
其實唔係，因為每次遇到既案件都唔同，只係今次既個案係普通頭暈，而病人既身體無出現任何特殊情況，我地既設備同埋技術都幫唔到佢啲乜，除咗俾吓氧氣，同埋架車盡量唔好開得咁快咁搖。
若然要作進一步既治療或者檢查，必須入院交由醫生去處理。
救護員究竟喺社會上飾演緊一個咩角色？
試想一吓，假如有人喺街上面受傷，當係骨折或者流血不止，醫生護士係唔會有可能去到現場為傷者處理，除非佢地咁啱路過，但就算係咁，佢地都唔會有工具可以幫到病人。
所以係要由救護員將傷者運送去醫院，而過程中亦會為傷者提供初步既護理。
至於發生嚴重交通意外，天災人禍之類，救護員就會擔當拯救生命既角色。
基本上，救護工作可以話係屬於急救，喺任何有人受傷或需要救護服務既情況下，去現場為傷者病人提供治理。
＝＝＝＝＝＝＝＝＝＝＝＝＝＝
救護日常：
Vital Sign，維生指數，包括脈搏，血壓，血含氧量等等…
學術上既嘢唔想講太多，但一般成年人既心跳會處於 60-100次不等(一分鐘內)，心跳過快過慢都唔係一件好事。做開運動既，通常心跳會無咁快。
血壓分上壓/下壓， 最理想當然係120/80。
血含氧量，最高最理想係100，一般人都有95或以上。
SPO2唔理想，譬如低過90咁，就俾氧氣，期望數字能夠回升。(氧氣當然唔係人人都俾，嗰啲A4紙割傷手指，睇落仲精神過啱啱翻完夜既我，點俾得落手？)
透過參考呢啲維生指數，去決定提供對方一個適合既治療，例如當血壓超出某個範圍，就唔可以俾一啲同心臟病有關既藥物。例如當發現對方原來有某種疾病，就要用另一種唔同啲既面罩去供應氧氣。
關於綠牌紅牌分別：
柴有分三柴，兩柴，一柴。
三柴係總隊目，即老總，正常情況下一隊人裡面只會有一個，兩柴會有幾個。做得三柴兩柴，都係綠牌。三柴對上就係兩粒花，即救護主任，一粒花未過試用期，過咗會變兩粒花，再升先係三粒花。
綠牌即係EMA II (EMA = Emergency Medical Assistant)，每架車至少要有一名擁有有EMA II 資格既人。兩柴一定係綠牌，但綠牌又唔一定係兩柴，因為個綠牌未輪到佢升職，升到職先會係兩柴。真係色即是空，空不是色。
做夠一定年資，就會有機會去上course，上完course就會變綠牌。綠牌有資格用到好多唔同種類既藥物，包括打針落藥。
綠牌有機會做救護車主管。
但好多時都會見到綠牌係司機，因為同車入面已經有個升正既兩柴。
一個無兩柴既綠牌，就係處於一個唔上唔落既情況，主管又未真係輪到佢，但有時又會被安排去做主管。當另外兩個分別係一個三柴同一個兩柴，佢又會做返最細嗰個，即車籠，當然呢種情況唔多，畢竟人手短缺。所以佢地又被俗稱為「萬能插」，因為插佢去咩位都得。
至於紅牌，由於只係EMA I，藥物方面既嘢基本上好多都無資格用。
假如問我綠牌同紅牌有咩唔同，我會答係年資同級數既分別。仲有，當要叫下午茶嗰陣，如果係都要有人請，一定唔會係個紅牌出錢囉。
一柴就犀利喇，呢個人唔升兩柴，只係紅牌一名，但因為佢做夠十八年，部門會俾一條柴佢。由於呢個人年資深厚，呢條柴亦叫做「防撞欄」，至於防撞欄背後有咩意義，就要自己參透吓。