聖嗜殺書院: 第九章： 生還者
「呢首歌，我聽過」阿權露出一個嚴肅嘅表情「你地知唔知邊個係萊索·塞萊什？」我同Joyce 面面相對，然後向阿權搖搖頭，而耳邊嘅音樂越來越大聲，音樂嘅旋律相當詭異，但聽落又有似無咩特別。「個作者你地唔識係正常，但個歌名就一定聽過，首歌就叫做《黑色星期天》。點樣？係咪有聽過吓呢？」音樂伴隨住人們合唱嘅聲音，為附近了無一人嘅環境增添了一份恐怖、陰森。「我知喇！」Joyce 突然茅塞頓開「之前個音樂project 我地組都係做呢首，但已經係2年前嘅事，唔記得嚕。」「《黑色星期天》呢首歌係1933年發行，但就係一首歌，係匈牙利就令到幾百人因為呢首歌自殺死。係1968年，就連個作者都跳樓自殺死埋，最後呢首就成為左世界聞名嘅邪歌。」阿權解釋完，但首歌仲loop緊。「咁大鑊？我地啱啱仲聽緊喎，會唔會……」Joyce 變得更加驚青「放心，只要控制到自己，就唔會比首死人歌影響到自己，佢要播就由得佢，我地當佢無道。」相比之下，我覺得阿權做領導者嘅潛質比阿志更好。之後我地亦做番當初上嚟嘅目的：搵資源，但折騰左咁耐，不知不覺間已經去到夜晚8點幾，而首歌亦都係不知不覺間播完。我地係一間雜物房裏面搵到充足嘅物資：食物、水、急救包，甚至係槍……「有左呢啲嘢，我之後嘅路就更加易行啦。」阿權攞起背囊，行出雜物房。「估唔到連化學品都有，但志佢都唔係到，連唯一一個知化學嘅人都走埋……」Joyce 忍唔住差啲又喊出嚟，好彩阿權及時安慰番佢。「真係咩都有齊喎……不如試吓溝毒氣啊？阿志之前都……」「你有病呀？你都識講係阿志啦，人們讀化學梗係知點整啦，我地乜都唔識，溝錯左嘅話咪一鑊熟？」阿權立即糾正我嘅睇法，但的確係唔可行。「我諗大家都攰啦，我地去搵地方休息啦，過埋今晚。」我地行番落4樓，同樣，牆上嘅血漬多左，但屍體依然唔見左。奇怪，我地唔係已殺死實驗室嗰個人喇咩？點解仲係咁？唔通屍體失蹤係另有其人？落到五樓，一轉角就見到一個身材矮小嘅男學生同領頭嘅阿權迎面撞上，因為阿權比較高大，所以個男學生比人撞到訓左係地。佢立即爬起身，動作相信狼狽，跪係地下拉住阿權嘅衫尾。「你……你地要救我呀！我比人追殺呀！救我……」佢苦苦哀求，要我地救佢。「你起身先，慢慢講，到底咩事？邊個追殺你？」阿權雙手搭住個男學生嘅膊頭「慢唔到啦！佢地就嚟追到啦！」說罷，一陣腳步聲從遠處傳來，越來越接近我地。「華仔你保護住個男仔同Joyce ，我去同佢地隻揪隻。」阿權攞左支槍企左出去，扣下板機，將槍口指向走廊盡頭，等待對手嘅來臨。同時，腳步聲亦越來越接近。我地係阿志後面窺看，走廊盡頭出現左一班身穿深藍色大褸嘅人，大約有六至七人，個個都戴住面具，個個手上都攞住開山刀。「哈哈哈……成班on9仔，多人又點呀，一陣咪又係比我用槍一下轟死，come on， bitch 」突然，佢地個個都將手上啲刀丟係地下，係背後攞左支長槍出嚟，嚇到我地瀨屎。「Oh shit……」阿權都唔敢相信，原本槍對刀嘅有利形勢一下子被扭轉，我地成為不利嘅一方。「Feuer（開火的德文意思）！」一名應該係領導嘅人一聲令下，對方立即向我地開火，槍林彈雨。「快啲匿埋呀！」阿權同我地立即匿係轉角嘅牆壁旁邊「呯！呯！呯！」對方明知道我地匿埋左，仍然向我地開槍。「佢地咁射法，啲子彈遲早會用完，我地等佢地停落嚟先。」等左足足2分鐘，對方終於停火，阿權望一望對方嘅情況，發現對面慢慢向我地嘅方向移動，阿權趁機向對方開左幾槍，但只係打中一個。「死啦死啦，佢地嚟緊啦！」個男學生非常慌張，而阿權就沉住氣低頭思考。「喂仔，嗱，依家有個任務比你，佢地嘅目標係你，你快啲衝落去下層，兜到佢地後面，用一個令佢地唔會傷到你而又可以引到佢地去我地呢到嘅方法，成王敗寇就睇你啦。」「係嘅！」個仔即刻衝左落去「佢地行得咁鬼慢，起碼一分鐘到先過到嚟，加上佢地重要係下層行番上嚟，時間足夠有餘。」阿權係背囊裏面攞左支消毒火水出嚟，將消毒火水倒入先前阿志準備好嘅玻璃樽裏面，將急救包裏面嘅綿條放入去，令綿條吸滿火水。同時對方亦掉轉頭，追殺嗰個做誘餌嘅男學生，但速度明顯加快，似乎個男學生先係佢地真正嘅目標。「搞掂！」阿權拍拍手，地下放左三支類似燃燒彈嘅物體「一陣一人一支，等個仔到左之後我會點火落條綿條到，一點就要即刻掟班友仔，明白未？」「明白！」形勢似乎再次被扭轉。話咁快個男學生就極速跑上嚟，後面係剛才向我地開火嘅同一班人。「掟落去！」我將點左火嘅燃燒彈掟向對方，由於火水係易燃液體，班人全部變晒火人，一陣陣慘叫聲係耳邊徘徊，阿志將佢手上嘅掟埋落去之後就叫我地走人。我地落到四樓，搵左一間空課室休息過夜，阿權開始問男學生有關佢嘅嘢。「點解佢地無啦啦要殺你嘅？你啲同伴呢？死晒？」「無錯，當時我地同樣係間課室裏面，點知班戴晒面具嘅人衝晒入嚟，我班同伴將我收埋係個木櫃裏面，我係裏面匿埋左起碼半日，出番嚟佢地已經全部死晒。」「咁點解佢地要搵六條友嚟捉你一個人嘅？」「原因好簡單」「因為我知道晒成件事嘅真相。」
（待續）