《有否想過，這個世界只有你一個是真正的人類？》: (二十六)不知所措

(三十五)
我激動地說：「我估唔到個兇手就係你！你講，究竟點解你要咁做！」

周圍的人立即衝上來把我拉住，叫我冷靜下來，

可現在把整個世界都弄歪了的人就在面前，怎可能那麼輕易便平復心情？

阿偉在旁開口問道：「阿強乜你唔係已經搵到救援隊去左台灣架咩？點解你會係度架？」

我鍥而不捨地大聲嚷道：「個個根本就唔係我，依家呢個世界根本無咩救援隊，係佢尋晚拎左我部電話向你地發佈假消息咋！佢只係想將我地一個一個咁殺晒！」





我拉起跌倒在地上的阿賢，扯著他的衣領繼續怒罵：「琴晚你有心將我同惡霸留低係義莊，然後岩岩仲殺埋的士司機，我識錯你呀，吳浩賢！」

此時大伙兒均用疑惑的眼神望向我，小玲一臉無知地說：「咩話...惡霸點解會死架？！」

阿均接著話：「司機哥哥佢無可能會死左架喎，係咪有咩誤會呀阿強？」

我怒不可遏地答道：「尋晚我同惡霸行行下走失左，佢為左救我俾啲失常人襲擊而死，我岩岩仲見到司機條屍係青馬大橋度，司機就係俾呢條仆街用佢把生果刀銡死架！」

阿賢一手將我推開，說道：「你癲撚夠未呀！」





阿怡說：「唔係阿賢做架強！係個幾鐘之前司機哥哥突然話想係救援隊到之前返屋企拎返啲好重要既野，仲叫阿賢借把刀俾佢旁住身先，我地都覺得奇怪唸緊佢點解咁耐都未返黎......」

什麼...？

即是說的士司機，是自殺的？

怎可能！

阿偉接著話：「而且尋晚我同賢哥同你兩個走失個陣，我見唔到佢有拎住你部電話，當我地所有人都收到你個獲救既信息之後，就一齊趕左黎機場，唸住會有救援，雖然成件事係有人造假，但係我覺得唔關賢哥事。」





我猶疑了一會，鬆開了正抓住阿賢的手。

阿偉說：「阿強，我地係上面個層間Starbucks做基地，個度有道鐵閘會安全啲，有咩上到去再講啦，你睇下啲失常既人，佢地既動作係有規律咁轉換架，由靜止到重複動作，再變到具攻擊性，佢地已經開始係度重覆緊動作，好快就會黎襲擊我地，我地要快啲走啦。」

原來阿偉也察覺到這個失常人的活動規律，也對，我察覺到的東西，阿偉怎可能沒有發現。

我們登上仍緩緩運作的電梯，腦袋不停的想著：「阿賢不是兇手？我的判斷有錯？兇手竟然是另有其人嗎......」

不會的！打從兩天前阿賢已經很不妥了，我的直覺不會有錯的。

想到此時，我跟大伙說：「你地入去先吖，我想同阿賢傾一傾。」

阿偉回答：「好，但記住千其唔好去太遠同去太耐，會有危險架。」





然後，他們便拉下Starbucks咖啡店的閘門，只剩下我跟阿賢在外面。

現在就只剩下我們兩人，我無論如何都要在這刻弄清楚整件事情的來龍去脈，無論如何都要在這刻給我一個合理的解釋！

當閘門完全關緊，發出「啪！」一聲時，我跟阿賢再次四目交投。

我立即眉頭緊皺地說：「吳浩賢，老老實實，呢一切係咪都係你搞出黎既......」

他回答：「唔撚係我呀！我根本都無殺過人！」

我堅定地說：「但係點解由兩日前係義莊到依家，你就已經好似變左第二個人咁呀？！你唔洗呃我啦，我識左你咁耐，你一定有啲野係度隱瞞緊！」

他的語氣委屈中帶點激動：「你根本都唔撚明！個日你地係度討論緊我地都有個『否定他人』既共通點個陣，我就係度唸，

其實呢個世界既所有人會唔會一早已經係假象，早係三日前呢個世界未變個陣，佢地已經係假人，到依家變成咁可能只係有啲野發生左錯誤，





姐係好似地球係一部電腦，個程式突然亂左所以先會輕左機，啲人先會變到咁，

到有一日一切突然恢復正常咁又點姐？咪只係個電腦程式整返好左咋嘛！呢個世界既所有人咪又係假象？！

而且你又有無唸過，生還緊既人其實佢地都只不過係假象，只係佢地未發生錯誤先未失常咋！」

我反省思考了阿賢所說的話......

糟糕了，

一股巨大的絕望湧上心頭，阿賢將那個我年幼時「只有自己是真正人類」的想法，從腦海深淵裡，再次勾勒起......