點解我會變左做靚女架？: 05-兄弟

Katrina行開左之後，Mary就問我：「你頭先做咩一聽到Jayden個名就咁大反應既？」

我：「無，無呀，我突然間濁親咋嘛。」我企硬咁扮傻。

而事實係前幾日Jayden先向我表白完，令我嚇到，但我唯有「一路扮無知，一路食米線。」

原來全台既人都知道Katrina鍾意Jayden。

但係我鍾意Katrina，Katrina鍾意Jayden，Jayden鍾意我。





呢個三角關係，究竟點樣先可以打破呢？

仲難過sin、cos、tan。Maths 真係 make me cry。

睇起黎，我唯有用美人計，勾引Jayden，收佢做兵啦。



Lunch完左，大家返到課室午休。





一返黎就見到俊傑俾人蝦，俾李卓楠抱起黎轉，飛機仲將佢書包裡面ｄ野倒哂落地下。

令我諗返起以前，我同俊傑一樣都係咁樣俾人蝦。

而呢個世界既我係靚女，佢地唔會蝦我。俊傑自然承受埋我原本應該受到既欺凌。

我記得有一次，係以前，係中三既時候。

李卓楠捉住我雙臂，扣起我轉黎轉去，再問：「簡素清，你以前讀精英班嫁喎，唔係好叻既咩？」





事關我中一中二既時候都係讀精英班，但後來成績唔夠好，調左落黎同李卓楠仲有飛機同一班。

飛機見狀，想玩埋一份，拎哂我ｄ功課掉落地下再踏多兩腳。

果陣時，我真係覺得好委屈，好想喊。

係呢個時候，俊傑走出黎捉住李卓楠隻手大叫：「停手呀！」

飛機即刻用雙手推開俊傑心口，質問：「死o靚仔，你係咪想玩野呀？」

跟住佢地兩個就打起上黎，李卓楠放低我，趁亂就一齊拳打俊傑。

到女班長兼風紀，Fiona見到佢地之後，大叫停手，佢地先至停低。

我扶住俊傑隻手，問佢：「痛唔痛呀？」





俊傑笑一笑，然後答我：「唔痛。」

由果時侯開始，我就認定江俊傑係我最好既朋友。



不過，到左今日，發生相似既一幕，而俾人蝦既係俊傑。

我睇唔過眼，走去同佢地講：「停手呀！」

飛機不屑咁問：「關你咩事呀？清姐。」

我：「俊傑係我朋友，緊係關我事啦！」





全班同學聽到之後係度起哄：「wuuuuu！」

飛機聽到之後，指住俊傑話：「你好野，今次有清姐幫你。」

佢地聽完我講竟然真係走左，俾著係以前既我，人微言輕，只有俾人蝦埋一份。

無諗過變左女仔之後，即刻得到好大既尊重，真係好唔公平。

飛機同李卓楠走左之後，俊傑過黎細細聲咁同我講左句：「多謝你。」

我聽完之後有ｄ心酸，不知所措。