點解我會變左做靚女架？: 04-平行時空

唔知大家有無聽過平行時空，或者可能宇宙呢？

據說，一件事如果有兩個可能性，就會分裂成兩個平行宇宙。

套落我度，即係有個宇宙入面我係男仔，而另外有個我即係女仔。

我冷靜沉澱左四月一日發生既事，得出以下結論：我係學校跌親暈左，醒返既時候已經去左第二個時空，而呢個時空既我一生出黎就係女仔。

另外就係，Jayden同Carson都鍾意我，但係我靈魂仲係直男，接受唔到佢地既愛，只係想收佢地兩個做兵。





如果我想返返去原本既時空，做返男仔既話，我應該點做呢？係咪要跌落樓梯多一次呢？

呀妹同細佬岩岩放學返黎見到我，就問：「家姐，你無事啦？」

無，無事，只係突然之間變左做女仔，有ｄ唔慣姐。

以前佢地連一聲呀哥都唔會叫，而家真係受寵若驚。







4月4日，我終於都要返學啦，今次係我第一次著女裝校服返學，靈魂仲係直男既我，著裙既感覺好奇怪。

總係覺得自己好似易服癖，行出街非常之緊張，但又好興奮，因為我終於可以試下做一個美少女既感覺啦。

晨早就返學，襯未有人，我睇一睇坐位表，同以前個世界一樣，坐我隔離既同學叫江俊傑，係男版世界，係我既Best Friend。

我叫：「早晨呀，呀傑。」

俊傑返左黎，但我叫佢都無反應，佢好靦腆咁坐低左係我隔離。





今日係學校Day4，高年級係班房入面早會，俊傑就一言不發咁坐係度等上堂。

睇返我本日記，其實甚少提到俊傑，而女版世界入面，我既Best Friend係Amy，佢坐係我前面，係一個其貌不揚既普通女仔。

到左Lunch Time，我先發現，做女仔真係好多朋友。

因為邀請我一齊食飯既係一大班女仔。

「六位呀，唔該。」

我地去左「痰仔山哥米線」等位食Lunch。

六個人入面，有我、Amy、Mary、家寶、家欣，仲有我女神Katrina。

不過係男版世界，我同佢地只係傾得兩句，並唔算係好friend。







痰仔呀姐：「六位，日黎坐呀。」

今次算係「我」第一次同我女神Katrina一齊食野，所以我好緊張。

我：「一碗腩肉清湯，走韭芽，飲凍檸茶，唔該。」

除左落單叫野食，我都唔係好敢講野。

家寶：「你地話啦，果個Tina係咪發姣啦？成日痴住班男仔。」

家欣：「係呀！係呀！」





岩岩坐低就係度講人是非，女仔真係好恐怖。

痰仔呀姐：「一碗懶肉千湯，走韭芽。」

我：「呢度。」

我食食下米線，突然間，Mary問Katrina：「琴日愚人節有幾多人向你表白呀？」

Katrina：「七個，可惜我最想果個人無同我表白呢。」

我即刻搶住問：「邊個呀？」

Katrina：「Jayden囉。」

「噗！」我一聽到Jayden個名，就即刻噴左啖米線出黎，向住Katrina噴射出去。





Katrina一臉都係，佢呆左陣，然後尖叫起黎：「呀！整污租哂啦，我塊臉呀。」

「對…對唔住呀，我無心嫁。」我「射」完Katrina之後，見到佢狼狽既樣，有少少暗爽，好想笑。

Katrina：「我去廁所先。」