點解我會變左做靚女架？: 02-愚人節

故事由2019年4月1日愚人節開始。

每年都有唔少人用愚人節做借口，去同人開玩笑，甚至表白。

但我想唔到，老天爺同我開左個好大既玩笑，就係將我由男仔變成女仔。

我地學校有個規矩，功課要係第二個小息完結前，放係樓下既老師簿櫃，否則當成遲交功課。

身為Deadline Fighter既我，臨急抱佛腳，係最後限期先完成功課，唯有跑樓梯落去交功課。





因為一時貪快，我連跳幾級而下，但突然間失去平衡，跌落樓梯，我頭大力撞地。

「呯」一聲，我就暈左。



咦？眼前係雪白既天花，嗯，呢度係病房。

咦？點解我身體感覺怪怪地咁既？我摸一摸自己心口，竟然有兩團肉。





唔通我變左做女仔？

「你醒啦？」路過既護士見到我就問。

唉呀，俾佢見到我摸自己個胸。

我靦腆咁講:「係呀，點解我入左醫院既？」

咦？點解我連聲線都變埋做女聲。





護士：「你唔記得啦？你係學校跌倒昏迷，懷疑腦震盪，係醫院訓左大半日呢。」

我：「真係架？咁廁所係邊呀？我想去廁所。」

護士：「呢邊直行轉左。」



到左廁所，我望住塊鏡，裡面個女仔真係好靚。

個樣靚得黎，又好似Angela Yuen咁Pure，連我望住自己都覺得有Ｄ心動。

我捏一下自己塊臉，鏡入面既女仔又捏一下自己塊臉。

果然無錯，我真係變左做女仔！





而且唔係發緊夢，因為我捏自己仲會痛。

不過，究竟點解會變成咁既？

點都好啦，女仔版本既我，真係好靚。

擁有烏黑秀麗既長髮、白晢既皮膚、水汪汪既眼睛、細細既鼻，櫻桃小嘴。

係我班入面計既話，絕對可以成為一個班花，甚至校花。