與直男共存史: 06 挑戰直男

曾經係Ocamp識左位組仔，但係我哋完全零交流。

直到一次類似House Meeting，我哋先有少少溝通，但係主因係因為嗰度冇熟人，大家都當左對方係相互嘅救生圈。

再唔捉住就會係寂寞中溺沉。

再之後因為各種House activity大家都有講兩句。

直到一次WhatsApp，我林大約係我感動到佢嘅契機。





「我成日講野都冇人聽得明。」佢，暫稱男友人W，係一位大陸人，前幾年先落黎香港，自然廣東話麻麻哋。

我睇到呢句，正係度林緊要點樣表達得好少少，無咁傷人，於是我就打左句：「其實好多時候可能係你唔夠信心，變左講野細聲，所以人吔聽唔到。俾D信心，講大聲D咬字清楚D就OKAY架啦！」

後尾加個笑哈哈。

之後感覺佢嘅態度親近左勁多，無咁客套。

有時人總係不停搵認同感，然而有幾多人係真心嘅呢？





後來佢不停約我打BALL，又自己Book埋場，要知道場呢D要早早起身係部電腦面前好似Sniper咁先Book到。

本以為我哋嘅接觸只會停留係BALL友。

點知佢Whatsapp同我講我哋上某科同一堂Tutor，佢話D notes同埋個老師都好好。

無可反駁，佢講嘅都啱，再加上我嗰位女友人A都係因為咁同我一齊上。

「你係度咩？我冇留意，見唔到你嘅？」





我笑左笑，從此佢坐係我右邊，開始一星期見幾次。

有次上堂，我向佢請教數學，後尾仲約佢教我數學。

「哇！好勁呀！咁都識！」我係發自真心佩服。

佢無講野，冇反應，不停打Keyboard。

點知後尾問咩數佢都唔識。

根據我父親大人所講：「佢唔係無反應，係唔識點俾反應你。」

無幾耐，呢位男友人W就話佢有一科都唔識，希望我可以教佢，因為我咁啱有讀嗰科。

「你唔識？你有冇呃我架？！」我係Whatsapp咁問，當然我冇林住佢會覆。





當我將呢件事話俾我姊妹們聽嘅時候，姊妹K詳細分析左呢位男友人W：「如果佢係對你有意思嘅話，呢個人嘅EQ一定唔低。」

我：「WHY?」

姊妹K：「對你提出援手，又對你提要求，令到你覺得係朋友之間互相幫助。」

我：「其實我之前問過佢數，佢都有教我⋯⋯面對面嗰種，佢唔知點解勁得閒。之後有約打Ball 。」

姊妹K：「我覺得佢係有心計又有耐性嘅人。」

我：「巧驚驚呀。」，「我心計都唔差架。」

姊妹K：「可惜你唔夠佢有耐性呢，」，「同埋你嘅心計都唔係用係呢方面。」





我：「巧驚驚呀⋯⋯我要被攻略啦⋯⋯」

姊妹K:「如果佢冇甘嘅意思就要同佢做朋友，得罪佢好大獲。」

其實姊妹K都講得幾啱，因為呢位男友人W真係不停給予我幫助，但係又奇怪地有一種疑似不求回報嘅感覺，當然呢種感覺係假嘅。

因為佢開始冇耐性。

而且我隱約感覺到佢係一種長線投資嘅心態，仲要係必求回報嗰種。

 我：「希望佢對我冇意思，如果唔係真係會係一個對手。」，「一個好厲害嘅對手，唔似其他人咁易甩。」

姊妹K:「點解你成日都惹埋啲甘嘅人⋯⋯」

我：「咩人？」





姊妹K:「唔係冇腦就係太有腦。」

【何謂聰明？智慧在你之上的人。何謂愚蠢？智慧在你之下的人。】