【恐怖，懸疑】那天清晨: 第一五零話

峰迴路轉！由剛剛引禍者變成能在鬼偶手上逃脫的奇人？但有可能嗎？

鬼偶有結界困人，被打散又能化身黑煙再度附身人偶，擁有這兩種能力根本就已經無敵，而它還有更可怕的禁聲與脫力場，連Joe面對這力場亦只能飲恨倒地，我又如何能逃脫？

「Joe都唔夠打，我點會走得甩？」

軒：「打同走係兩回事嚟，唔好撈亂。同埋走得甩可能係你好彩。不過點都好，你上次既經歷一定有參考價值。你要快啲記起。」

Joe：「我上次係輸咗。下次我唔會嘗試打散佢，絕對5秒內揼碎佢。」





Suki：「咁隻野係想要佢定點㗎？」

軒：「唔似淨係要諾一個。唔得，如果我地一開始就諗住妥協，一定冇好結果。」

Suki：「咁唔係點喎，再俾佢搵到我地點算丫？」

軒：「都可以試下溝通下既…」

Suki：「點溝通啊，隻野都唔知係咩鬼怪。」





軒：「起碼佢都係講廣東話先，有共同語言就有溝通既可能性。不過佢應該出唔到又一城既，總之我地唔好俾佢搵到。如果佢可以set細個結界，我地唔會走得甩。不過…講起上嚟，隻野似乎都唔係好醒，既然有結界，佢制服咗Joe之後基本上就等於捉晒我地啦。」

Kelly：「佢…咁樣就好似個細路咁，原本玩緊一樣玩具，跟住見到另一件玩具就放低手嗰件拎新嗰件咁…玩具係唔會有談判既權利。我地唔洗諗喇。」

我：「唔通我地只可以避開佢，冇第二條路？」

Joe：「如果有辦法解決啲黑煙，咁我地就可以反擊！」

軒：「唔…講起嚟又奇怪，點解變做黑煙之後要搵人偶附身咁麻煩？唔奪舍你地兩個既身體？你地嗰時好明顯已經油盡燈枯啦。咁好應該成虛而入啦。」





我：「係筋疲力盡，唔係油盡燈枯啦啊！屌你。」