【恐怖，懸疑】那天清晨: 第一一七話

「我以前好衰㗎，成日都蝦蝦霸霸，小息嗰陣就搶同學啲野食，間唔中又問同學借錢，不過從來未還過，睇人唔順眼就打佢一獲甘。」

Kelly：「睇唔出喎。」

「係啊，我變咗唔少。唔知你地覺唔覺，去到邊一個地方都好，總有一個人係特別容易俾人恰，可能係佢樣衰啦，講野黑人憎啦，特別瘦好恰啦，chem chem 地啦，總之緊有一個喺你左近㗎啦。」

Suki眼角望向May的方向說：「你咁講，又好似係。」

軒：「簡單啲講，嗰個人同其他人格格不入，所以咪俾人蝦囉。」





「冇錯，就係軟弱同格格不入。而相反亦一定有個技安喺你身邊。嗰年中三，『佢』轉校嚟到，我就好似平時咁逗下佢，問他拎啲錢洗洗，嗰時我買完野，用晒啲零用錢，好錢洗。點知打到他黃膽水都嘔埋出嚟，他都係一毫都唔肯俾，佢唔俾我就更加大力打，攪到佢入廠，好大獲。」

Kelly：「點大獲法啊？俾人踢出校？乜你舊時咁衰㗎。」

「嗰時既我真係好唔掂。世事既野係好奇怪，明明係我打人我唔啱，但結果係佢轉校，而唔係我俾人踢出校。佢走之前我仍然係咁恰佢，冇停過，佢亦都冇怕過我。」

我：「你係班中既『技安』，咁佢係咪就係特別好恰嗰個？」

「緊係唔係啦，好恰嗰個係偉雄，我地成班都會恰佢。係得『佢』先會挺身而出，唔俾人恰偉雄，其實『佢』一見有啲咩睇唔過見都會出手，從來冇退縮過。一次都冇。」





「命運真係好神奇，我竟然升到高中之餘，『佢』亦都升咗返嚟，仲成個人唔同晒。起初我都唔覺有咩問題，我仍然照舊係度蝦蝦霸霸。有一日，我又係如常咁去恰偉雄，點知『佢』…」