【恐怖，懸疑】那天清晨: 第四十話

於是我們緊張沈默地在這寂靜空曠的商場慢慢的走着，幾經辛苦，終於穿過了賣童裝的恐怖地帶。望着身旁的中庭底部，像一個大空洞般空盪盪，會是接駁地獄空間的通道嗎？

一邊行腦裏不斷想着麥當勞門口的鬼影，商場的突然停電，和foodcourt的怪異電話，不論如何又沒法把這些事物串聯一起。如果這是鬼怪的世界，又怎麼會有那部電話？然後，我走得更慢和軒一起墮後到離大家三四米左右的距離。

我：「哩度真係有可能係實驗場？」

軒：「都有可能㗎，我一直係度諗，哩幾年出現咁多3d既野，3d電影、電視、電話，前排Sony先出左部虛擬實境眼罩，而且佢近排啲機仲好興玩AR tim。」

我：「咁其實既係點呢？學你話齋，『簡單啲』咁講好唔好？」





軒：「好，我覺得我地對眼俾人植入咗類似google glass既野。」

我：「頂你，嗰舊glass咁大舊，有乜可能啊！」

軒：「以我地所知既就冇可能，但如果係軍方，或者係其他世界頂尖既研究組織呢？就好似foodcourt部電話咁，乜野插頭都冇，我諗佢叉電，過data都係要wireless咁去做，而哩個亦都係近幾年見到既現象。可能係超前市場幾年既劃時代產品。」

我：「有冇咁誇張啊？」

軒：「一啲都唔誇張，電話曾經係冇可能既幻想，而飛行亦曾經係不切實際既夢想，當科技進步到一個地步既時候，就可以將冇可能既事奇跡一樣咁實現。而家人類既夢想已經唔止飛行，仲要衝出太陽系添。」





我：「我硬係覺得係有鬼怪，而唔係實驗場囉。」

我又再想起那個麥當勞鬼影，心中有一股恐懼不安的感覺，每次想起那黑影和紅眼總有一種奇怪的感覺，好像有些恐怖的事情會發生一樣。

軒：「如果係，咁我寧願相信我地係俾人植入咗終極版既google glass 囉。」