捉伊因: 第九個鐘
相隔二十多分鐘再來到二樓，剛才遇鬼的驚慌情緒猶在，加上整層窗戶被密封，沒有一絲陽光能透進來，令我對這樓層的心理恐懼放大不知多少倍，然而人還是要找，game還是要over，所以鼓起勇氣逐間房尋找。
數小時前，這層是我負責探索的，所以大概的結構我也略知一二。我把每間房能匿藏的地方也仔細搜索，但還是看不到女星陳煒的蹤影，任務的notebook倒是找到兩台，是四號和十號，但我要做的是尋人，解任務的事先放一邊，我把兩台notebook放在兩間房內，分別打開任務，然後故意失敗，讓notebook發出警報，吸引鬼的到來，而我則趁鬼來查看的時候極速跑落一樓搜索。
警報響起後不出二十秒，鬼果然趕至，我看準他入房查看時跑落一層。當我來到一樓，剛好看到對面前梯有雙腿轉彎跑上去，是女星陳煒，我二話不說立即轉身往上跑，希望可以在她遇害前找到她。
當我跑到二樓時，眼前看到的一幕令我難以置信，我竟然看到鬼跪倒在地上，身體微微抽搐，就像是在哭泣，而女星陳煒則俯身安慰他，究竟發生什麼事？我狐疑地輕聲碎步上前，女星陳煒留意到我，立刻後退數步裝作無事發生，而鬼也慢慢起身轉向我。
此刻我心裡有十萬個為什麼：「佢絕對唔會係叛徒，係佢同鬼達成咗協議？隻game可以咁玩？我要自己走定帶埋佢走？難得女星陳煒有咁嘅行為而同時酒店炒散陳煒又昏迷緊，我應該點利用呢個千載難逢嘅機會好？」
我腦袋經過每秒一千萬轉的運轉速度終於得出結論──自己逃脫保命最緊要，我轉身拔腿跑上頂樓，由腳步聲判斷，鬼並沒有追來，應該是女星陳煒把他叫停了，也好，此事足夠我大造文章了。
來到廠長室，模型店老闆陳煒和會計師陳煒已經到達，酒店炒散陳煒也被他們找到，但她依然昏迷不醒。我深呼吸把呼吸調整好，再喝一口水，再把餘下的水分給兩位陳煒，他們把水一飲而盡，我的樽也變成了空空如也。
「仔，個仆街明星姐仔呢？揾佢唔到定死咗呀？」模型店老闆率先開口。
我擺出受驚嚇的表情，然後故意把說話速度加快：「佢……佢……佢先係叛徒！對唔住會計師，之前誤會咗你，原來個明星先係叛徒！」他們聽罷大呼難以置信，我則繼續補充：「我同你哋一樣都係唔信，如果唔係親眼睇到，我都好難信。啱啱我係二樓揾佢唔到，但揾到部notebook，安全起見我當然用notebook發警報引鬼嚟，等到隻鬼嚟我先走落去，點知我落到去就見到佢跑上二樓，我心諗：『今次仆街喇，佢走上去實撞到隻鬼，佢一定係咁先。』於是我都跑返上去，點知就見到隻鬼跪係度向佢俯首稱臣，而佢就摸摸隻鬼態度親暱，佢發現到我之後即刻扮到若無其事，仲指使隻鬼殺我滅口，好彩我跑得快先走得甩。」
兩人聽到後均受到一定程度的打擊，但很快便被理智挽回。會計師陳煒率先開腔：「佢果然係影星，演技好到呃哂我哋，但係我哋好似無辦法可以消滅到佢，咁落去佢哋實贏，我哋死撚硬。」
「叛徒只要殺哂我哋就贏到，唔駛解任務，佢個死八婆，唔怪得之嗰時會大叫引隻鬼過嚟，原來係要殺哂我哋。頂佢個肺，我要隊撚冧佢！」模型店老闆陳煒依然是衝動派。
「冷靜啲，你隊冧佢你都會死，唔可以自相殘殺嘅，我覺得可以利用吓你哋整嘅陷阱，咁就可以殺咗佢呢個叛徒，然後我哋先再慢慢解任務都未遲，畢竟我哋有三個腦，實無問題。」我嘗試提出自己的看法，一如我所料，他們兩人均點頭同意，不知不覺間我成了他們的領袖，酒店炒散陳煒只要一直乖乖躺著就好，那才不至於影響全盤計劃。
「應該點引佢哋去陷阱？」會計師陳煒問。
「唔駛急住，我想知你哋兩個陷阱係點，可唔可以致命？」我問。
「係用我哋兩個嘅道具整，我嗰個會令到啲仆街睇唔到嘢，而會計師嗰個係會彈枝筆出嚟直插喉嚨。啲機關係我諗同設計嘅，整就由我哋兩個分別整各自嘅，哈哈！」模型店老闆陳煒搶著邀功。
「得，明白，但我覺得要分開佢哋兩個好啲，先解決明星，會計師陳煒你去帶佢去陷阱，佢對你應該警覺性最低，因為佢啱啱見到我，知道佢哋嘅秘密；而模型店老闆陳煒之前一直同我哋行動，同佢又有過節，未必會信佢；但你之後無同我哋一齊行動過，而且佢知你係假叛徒，對你無顧忌，佢都唔知你知佢係真叛徒，所以只有你去先係最好，而且你識執生，唔會爆響口漏口風，本身應該酒店炒散陳煒去，可惜佢仲昏迷緊……」我拿出各種理據說服貪生怕死的會計師陳煒，出奇地他竟一口答應。
「而家要引佢嚟，隻鬼一定係佢附近監視，所以一開始我哋唔駛刻意分開佢哋，直到佢到咗三樓先將佢哋分開。而家要你去巡樓揾佢哋喇，我哋會係後面吊住你尾，放心。揾到佢之後你要執生呃佢上去。」我向他下達了指令，他立刻執行，我和模型店老闆陳煒也遠遠跟在他身後。
「打開蚊帳，打開蚊帳，有隻蚊，有隻蚊……」密閉的工廠再次揚起音樂，我的頭再次疼痛不堪，另外兩位陳煒也停下來互望一眼，眼神就是在表達：「我係咪幻聽？」而答案是沒有，因為音樂真的響起，我的頭痛便是證明，又有新的記憶碎片在我腦內出現，是戰場，我拿著軍刀獨自面對數個敵人；另一碎片是有人給我一個統計表，然後在討論一些事情。
「點解仲有呢啲片段，我唔係應該記返起哂所有嘢喇咩，仲有啲咩未記起？」我在心裡自言自語。
「係時候認真喇！差一個喳、差一個喳！女星陳煒好活躍，又解多個任務，睇嚟大家就快走到，不過我都不厭其煩再提醒多一次，可以安全走到出去嘅只得一個人喳，你哋唔表現好啲就取悅唔到我哋嘅觀眾嘅喇，叛徒好努力做緊嘢，唔知可唔可以改變現況呢？呵呵呵，我拭目以待。」CW的聲音永遠都是討人厭。
「可惡嘅CW，講得太多喇！」我嘀咕，小聲得只有我自己才會聽到。
「佢唔係叛徒咩？點解仲會解任務？唔通佢都唔係叛徒，真正嘅叛徒另有其人？好亂呀，發生咩事？」會計師陳煒開始陷入混亂。
「咪戇鳩！一定係故意，咁佢先可以脫離叛徒嘅嫌疑，係奸計！最毒果然係婦人心，太多心計，想動搖我哋無咁易！」模型店老闆對她的恨意看起來真的很大，也好，省去我解釋的時間。
我補充一句鞏固各人的信念：「隻鬼係佢隔離，點解佢可以咁安然解任務唔受騷擾？咁仲唔係佢哋係一夥，想引我哋去嘅計謀？我知佢哋係邊，一於將計就計，仲可以慳返我哋揾佢嘅時間。」
我們一行人悄悄走到三樓前梯，我把兩台notebook的所在位置告訴他，再示意會計師陳煒獨自下二樓找她，我和模型店老闆陳煒則從遠距離觀察。