風水佬講鬼: 古曼童
作者：風水佬 / 編輯：波子頭
真人真事改編 / 已獲事主批准公開
「風生，你知唔知有咩方法可以請走古曼童？」吸塵機。
「咩係古曼童？食得嫁？」我。
「唔係啊！古曼童係泰國佛教高僧加持過既聖物黎，用黎養住墮胎或者意外死既細路仔。」
「哦...姐係鬼啦！呢方面你應該問阿花！因為我唔太熟呢尐野！」」我。
「我有問過啦，佢都唔肯幫我。」
「吓！？點解既？」
「佢話...由銅鑼灣搭車去沙田好遠，所以我哋冇乜緣份...」
「...」
其實，緣份就好似時鐘既三枝針，每日都會重複運行，雖然平時都冇乜交集，但總會有重疊既一刻。所以，機會黎到，我就逆向思維，叫佢落黎銅鑼灣...
吸塵機係我哋page既忠實粉絲，由開始到依家都一直支持，佢曾經畀自稱可以驅邪既師傅呃過錢，但佢都選擇信我哋，大概係因為唔使錢掛...
雖然我哋之前冇見過，但大家都好熟。有次阿花仲叫佢send相睇下有冇鬼，但尐相美圖秀秀過，所以乜都睇唔到...
當真正見面，我就發現其實真人同相差唔多，佢紮起個髻，着住淺綠色外套加藍色牛仔褲，戴住一對銀色圓片耳環，五官端正、杏眼鼻直、嘴角微微向上撓，除咗排牙唔齊，基本上都算半個靚女。
但從相學黎講，佢運程唔會太好，父母緣薄，又容易早婚，而且好難同另一半溝通。
周圍既人不停咁穿插，而我哋企喺地鐵站口一左一右對望，可能平時隔住個mon傾計，真人見面反而變得好尷尬。
可能吸塵機同阿花真係冇咩緣份，阿花電話一直冇人聽，我哋只好到茶餐廳邊食邊等。不過除咗問食咩，基本上都冇乜交流。試問一個咁怕陌生既人，如果唔係事態嚴重，都唔會千里迢迢走過黎。
「吸塵機，你放鬆尐就得，不如你講下，發生咩事？」我見佢成程唔敢出聲，忍唔住開口問。
「其實之前都冇乜特別，只係我兩個女既玩具好似畀人玩過，明明睇住佢哋收好咗，但轉頭又出現返喺廳。」吸塵機飲咗淡水，繼續慢慢講：「我開頭都以為自己搞錯，直到半個月前，我見到兩個女無啦啦同空氣玩得好開心，我就知出事...其實搞我唔緊要，千其唔好搞我兩個女...」
佢本來想講落去，但侍應走埋黎，放低兩個飯，就冇再出聲。
而我都冇繼續追問，只係專心切豬扒，但食食下就覺得奇怪，平時味道都好濃，唔知點解今日成個飯都冇乜味。
再望一望，吸塵機個邊，食到皺晒眉。
「做咩停晒手？個飯係咪好難食？」我。
「唔係，係冇乜味...不過我成日都係咁...」
我又諗返阿花講過，如果食物冇乜味，有機會係畀鬼食過，我拍一拍額頭，繼續問：「我都唔記得問你點解要請個咁既野返黎？」
「唉...個時我聽人講，養古曼童生意會好尐，所以就買咗個，冇耐我老公發現咗，發脾氣話我迷信就扔咗個古曼童...但入面個細路就返黎搵我...」吸塵機。
可能係我錯覺，當聽到佢講扔咗，就感覺到好大負能量，空氣仲變得有尐壓迫，我即刻打斷佢：「有冇你老公張相睇下？」
吸塵機停一停，打開手機，搵咗張全家福，佢同佢老公坐喺梳化拖住手，兩個女各自坐大脾，梳化下面仲有隻法國老虎狗。
「隻法鬥好趣致！」我指一指個電話，但聽到「鏗」一聲，枝匙羹無啦啦跌咗去吸塵機個邊。
我烏低身執返，望一望就成個人毛管棟...枝匙羹個鏡面入面，有個手掌大既細路仔，掹住吸塵機個髮髻。
再擰轉面望下吸塵機，日光日白咁多人...會唔會咁猛啊...成隻趴喺個頭度？
點解頭先又睇唔到！？
飯都未食完，我就急急腳帶佢搵阿花，蹬咗幾層樓梯，冇咗半條人命，個細路仔仍然趴起佢個頭上面，仲對我依起排牙。
畀個細路仔嚇一嚇，我係咁拍門：「喂！阿花！我啊！快尐開門啦！」
好快就有開鎖聲，但一開門就有兩把尖叫聲，同時喺我耳邊響起。
「啊！」
「啊...！」
阿花用雙手遮住上半身，下半身著住波點孖煙𠧧，好快就「嘭」埋門。
我再望下吸塵機，佢用雙手遮住塊面，但手指隙就露出對眼，不過個細路仔就唔見咗！
唔通...孖煙𠧧可以驅鬼？
隔咗一陣，阿花先著返好衫打開門，好哀怨咁望住我同吸塵機，我無視佢既眼神大搖大擺行入屋。
佢間屋冇乜大執過，本祖書仍然用黎墊枱腳，個木櫃仍然有幾個公仔，成間屋仍然陰陰涼。
「吸塵機，不如你自己同阿花講咩事啦！」我望一望佢，發現佢掐住自己個額頭，個樣好似好暈咁。
阿花就係呢個時候，喺櫃桶拎咗把刀出黎，抆咗吸塵機左邊隻耳環。吸塵機「啊」咗一下，就唔敢再出聲，仲下意識向後縮。
我見阿花拎住把刀，喺隻耳環上面，刻緊一尐野，再仔細望下把刀，上面有個泰國古僧雕刻。刻完之後，阿花對隻耳環吹一吹，隱約可以見到上面有個有個人形圖案。
「嗨！泰仔！沙挖啲吸！納叭啪噠～納摩呠噠噎...」阿花一邊唸泰文，一邊摸住吸塵機個頭，另一隻手就揸住隻耳環，當第三次重複唸既時候，個細路仔順住阿花隻手，好開心咁跳入隻耳環入面...
「嘩！阿花！今次咁快既？你趕收工啊？」我。
阿花舉高手示意我唔好嘈，靜靜咁企喺吸塵機前面，隔咗好耐先開口：「你可唔可以講我聽，你隻狗既故仔啊？」
「隻狗係我老公送畀我...」
「唔係呢隻，我同呢隻冇緣，我想知好為食個隻！」阿花。
「肥...肥豬...係我養既第一隻法鬥，當我知佢同我一樣出世無耐就冇父冇母...我就決定養佢。佢好鍾意圍住我轉，唔開心就會趴喺度陪住我，人人都話佢同我好似...」吸塵機邊講邊喊，係咁用衫䄂抹眼淚：「不過當我陀住大女個時...佢病咗，個時我哋唔係好夠錢，所以有一日我老公襯我唔喺屋企，就將肥豬送咗畀人...」
「咁如果有機會！你會唔會再養返佢？」阿花抆埋吸塵機另一邊耳環...
「會...我絕對會！」
「咁你聽到啦！你主人從來冇唔要過你！」阿花眼定定咁望住我後面...
咪住先！！
點解...次次都係我既...
...
事後，阿花畀返兩隻耳環吸塵機。
我問個把咩刀黎，佢就話係魯士刀，喺個黑贊手上「借」返黎，可以用黎驅魔鎮鬼，仲借咗小小力量去暫時幫個細路仔。而個段泰文係控鬼咒，之前個有個泰國女朋友教佢，個黑贊係佢老豆。
當我問點解會見到個細路仔，阿花就話肥豬趴起我個頭度，可能想畀我睇咩事，因為佢一直都守護住吸塵機，唔畀個細路仔搞佢。但點解肥豬會去咗我度，阿花就答緣份。
不過咁既緣份我唔想要囉！
至於孖煙𠧧係咪可以驅鬼，我都唔知呀。但自此之後，我就無再著三角底褲，轉咗著孖煙𠧧。