風水佬講鬼: 男朋友
「阿花，係咪上世有過姻緣既人，今世好易一齊返？」我。
「又唔一定既，不過上世有姻緣既人，今世會易見返大家！」阿花。
「咁有冇話上世做錯事，所以今世會剋死另一半？」我。
「會...」阿花停咗一下，個樣皺晒眉：「好多人一出世係為咗剋死另一半！呢種懲罰叫世罰！」
「嘩！咁神奇？咁你查唔查到呢種世罰 ？」我。
「查得到！不過要睇返我本祖書，但如非必要，我都唔想再掂個本嘢！」阿花。
「點解既？我仲諗住問你借黎研究下！」我。
「你諗都唔好諗！一來借畀你都唔識睇，二來本書入面...有鬼！！」阿花認真望住我...
...
話說近排請咗卜卦師兄黎宣傳玄學文化，搞咗個「送我一個故事，還你一個答案」既活動，雖然反應唔係咁好，但都有個T小姐留言講故仔。不過卜卦師兄卜咗支『歸魂卦』就話唔玩，因為『歸魂卦』同鬼有關，佢話巧驚驚就賴皮唔找數，搞到我要親自接手T小姐件事。
了解成件事先知道，T小姐之前同一位男士一見鍾情，拍咗幾個月拖，雙方已經去到談婚論嫁既地步，但有一日男朋友冇啦啦喺街暈咗，隔咗一個禮拜仲離開呢個世界。
T小姐既生活一下子冇晒方向，佢好想知點解個天畀佢哋相遇、相識、相愛，但咁短間就要分開佢哋。
佢係咁搵方法開陰陽眼，試過遊地獄，搵法科師傅，吸通靈水晶既能量，不過副作用係身體開始變差，個頭會經常痛。
...
或者前排阿花喺個page 搗亂得太勁，驚我話佢，搵咗幾日都唔肯聽電話，我只好死死氣去佢屋企。
一朝早就搭車去銅鑼灣，我都幾肯定阿花未起身。不過時間太早，經過鵝頸橋都冇人打小人，再行過幾條街去到一條掘頭路，先搵到阿花住既唐樓。
驟眼望個屋頂，棟唐樓得幾層高，外面尐建築物一棟比一棟高，形成一個凹既形狀，將附近既氣流困住，尐陰氣有入冇出。
真係唔明佢點解揀個陰氣咁重既地方黎住，風水又唔好，十有八九死過人。
蹬咗幾層樓梯，行到我喘晒氣，我大大力拍阿花門口：「喂！阿花！開門啊！係我啊！」
隔咗一陣，阿花先打開門，我見佢着住條孖煙通，個頭亂到成個雀巢咁，個樣仲未訓醒。
唔知係咪錯覺，每次上阿花屋企都覺得有尐寒。佢間屋好細，一眼就可以望晒全間屋，入面冇乜擺設，得一張床，一張枱，其中一隻枱腳下面墊咗本又殘又舊既書。
廳中間有個木板櫃，下面放咗尐雜物，最高個層放咗幾個香爐，周圍擺咗好多玩具。褪後尐睇會望到，香爐後面幾個玻璃罌，每個罌入面都有一個畀油浸到半身既人形公仔。
「你係咪唔使訓嫁！咁早就剷上黎...」阿花講講下打咗個喊露，又攤返喺張床上面。
「有件事得你先幫到手，我哋page有個粉絲...」我慢慢將T小姐件事話畀阿花聽，佢就一直合埋眼，但當我講到開陰陽眼，佢就突然彈起身，碌大對眼望住我。
「唔得！唔理！唔幫！」阿花。
「點解啊？人哋好慘好可憐，我仲睇過佢八字，黎緊十年都過得好差！仲有，佢既經歷同你有尐似。」我。
「冇用嫁！幫唔到嫁！就算勸佢，都唔會聽得入耳！萬一個結果唔係佢想要既！佢一定會自殺，你咁樣會害死人！」阿花。
「唔會啦！T小姐話感覺到男朋友返過黎，叫佢唔好自殺。」我。
「唉，你信我！佢經歷過既，我都經歷過。就算畀佢開到眼咁又點！陰間有咁多個，佢點知自己開完，係咪一定會見到佢男朋友。」阿花講完就點起枝煙，個樣變得好患得患失。
見到佢咁我就冇再追問，不過我偷偷哋將阿花電話號碼畀咗T小姐，等佢自己搵阿花，話唔定阿花會心軟幫佢。
過咗一陣，就聽到阿花電話係咁震，讀咗幾個訊息，佢就怒啤我，我順住電話方向望，正正係T小姐既whatapp 對話：
「你好啊花！風水佬話已經將我既故事話咗畀你知，仲話你心腸好好，叫我親自搵你，希望你唔好怪佢。
自從我試咗好多方法去感應靈體，屋企就有尐奇怪事發生...嗰晚返到去，廳盞燈好似變暗咗，我以為係自己錯覺，因為我返工返到好攰，我行入房，聽到廳出面有聲，行到出去，我好似感覺到間屋有第二個人喺度，我個心入面問咗句：係咪你呀？而佢好似聽到咁，喺我個腦浮現咗佢個樣，之後我尐眼淚叭叭聲咁流出黎，不過佢出現既時間唔長，好快就消失咗。
之後佢黎探過我三次，每次我喺心入面都問好多野：今世點解我哋會相愛？究竟係咪我剋死你？咁下一世你會唔會再愛我...」
然後T小姐send咗佢本人既一張相過黎，佢既外表普普通通，藍色頭戴住眼鏡，但佢既左邊，有一團好糢糊既影。
阿花冇回覆T小姐，坐咗喺度發呆，隔咗一陣，佢問我拎T小姐同佢男朋友既時辰八字，然後對住幾個玻璃罌口噏噏講咗幾句嘢，上咗幾柱香。
之後佢喺枱腳個度，拎起個本又殘又舊既書，望住我陰陰嘴笑：「等陣你自己執生啦！」
話口未完，佢就打開本書既中間，左邊頁寫咗一個「乾」字，右邊寫咗一個「坤」字，佢望一望T小姐既八字，就一直揭向右邊，直到第九頁，寫滿密密麻麻既字，佢數住第九行第九個字，就拎起筆寫低，之後佢又揭返去中間，不停重複同同樣既步驟。
慢慢周圍既氣溫有尐下降，光線都變暗咗，我望住本書有種不祥既預感！
當阿花第六次揭返去中間頁，周圍既景色變咗，就好似一個戰場咁。佢理都冇理，只係加快揭書速度，但佢額頭已經流晒汗，面色仲有尐灰暗！
嘶！！
突然，周圍有陣好強烈既血腥味，有一個人頭喺書伸出黎，戴住日式軍帽！成面都係血！好怨恨咁望住我！
好快個日本兵喺本書入面爬出黎，佢既心口位置開咗一個窿，可以好清晰咁喺個窿度望到後面幅牆。
個日本兵望咗阿花兩眼，就無視佢，然後轉過頭望住我，仲衝向我個邊。
「點解次次都係我！」我諗都唔諗就褪後跑，好快就迫到去牆角。
個日本兵就一步一步行過黎！
好近！！
好近！！！
個陣血腥味臭到我透唔到氣！
「Yamate！！Iyada！！！」我只好學某尐日本片既女主角係咁講唔好，不過好似冇乜作用。佢好快掐住我條頸，點掙扎都整唔開。
當我就黎窒息，就聽到阿花把聲：「喂！細路！幫拖啊！」
嗰幾個玻璃罌震咗下，就有幾團煙飛出黎！佢哋飛到日本兵後面，係咁將個日本兵向後拉，不過個日本兵好大力，死掐住我唔放手，連我都拉埋一份。
當個日本兵拉到埋阿花度，阿花就放低筆，扤埋成本書。個日本兵就唔見咗，就連班細路都唔見埋。
只係得返幾隻睇唔明既字喺枱面。
...
事後，阿花將個幾隻字仔拆開，寫咗幾世關於T小姐同佢男朋友既前世同來生。不過大部份都係擦身而過，最重要既一世，男朋友係個日本兵，而T小姐只係一個行過幫佢埋屍既路人。
而來生佢哋會照樣糾纏落去，因為T小姐埋屍既時候，拎走咗三樣野，一把槍、一本日記同一對鞋。
今世還既係個本日記，一份思念。
至於本祖書，阿花再講多次，如非必要，都唔會再掂。但點解隻鬼淨係追住我，阿花就話因為我太黑人憎，一早就走黎嘈住晒。
之後阿花好認真回覆T小姐既whatapp:「你好T小姐！我知道點勸你都冇用，因為我都曾經用十年時間，去搵我死咗既太太，所以我好明白你既心情。
睇完你張相，我見到你左邊有隻鬼，我估嗰個應該唔係你男朋友，因為個樣都四五十，同你男朋友八字有出入。隻鬼應該係鹹濕鬼黎，佢望住你流晒口水，如果佢搞你，你求度符就可以趕佢走，因為佢只係一隻普通鬼。
我可以畫隻鬼個樣畀你睇下。
至於風水佬！你就放心啦！我冇怪佢！不過我打算喺佢屋企放鬼三日。」
我望一望阿花個表情，好認真唔似講笑，再望一望櫃上面個幾個玻璃罌，唔知點解個額頭標晒冷汗...