《小松奇妙物語！》: 07

那爺子將我強行抱到附近公園去，力量無法比擬的我，也無謂作出反抗。


「嚟，落地，周圍行吓！」他終於將我釋放。


「嗒⋯」我著地到公園的小沙地上。


「天氣幾好啊，唔知衰仔幾時返嚟陪小松呢。」爺爺坐到長椅上。






「衰仔？」是誰。


「咦，你識應我喎！」爺爺和笑。


我也跳到長椅上坐下。






公園除了一位老人，一隻貓，就餘下一陣涼風。


「唔好怪我帶你出嚟啊，嗰個陰陽人同佢門生傾計重要事，我呢啲同佢唔同路嘅人，係要出嚟避忌吓。」爺爺說。


「你可以搵金毛出嚟。」我又說。






「哇⋯！你個樣睇落好不屑，我一陣開罐蕃茄濃湯罐頭俾你，你原諒我喇，自己一個出嚟好鬼悶。」爺爺調皮地吐舌。


獨自坐著的爺爺，忽然嘆了一聲：「如果我老婆仲喺到，或者坐喺隔離嘅會係佢。不過，小松都一定同我哋一樣咁孤獨，先會養咁多動物，包括你啊。」


「孤獨？」這個字，我很難從她身上看見。


「如果我可以好似佢咁，聽得明你講咩就好喇，嘻哈哈哈。」爺爺平淡地望住天空：「喺小松仲係小學個陣，佢媽媽⋯即係我媳婦，已經唔喺到，所以你哋要好好咁愛護佢，代埋佢阿媽嗰份。」


原來小松的母親，真的早已不在。






難怪一直沒見過她。


「唉！坐喺呢啲公園，又落葉又吹陰風咁，搞到我好似就快老死咁款，去啲青春啲嘅地方先！」爺爺又抱起我，走到別處。


又走了一段路，爺爺把我帶到石澳沙灘。


果然，這裡跟公園有著很大差別。


燒烤網上的肉扒、沙灘上年輕的女性、海上肌肉健壯的男子，都是比荒涼的公園活力多。但可能不是假日的關係，人流也算是疏少。






一到來，爺爺就坐在沙灘，觀看美女。


一看，就看了大半天。


住在石澳這裡環境雖好，但必須要有承受寂靜的能力。


因為比起城市，這裡實在悶得要多。


靜得，我和那爺子能在沙灘上呼呼大睡。






只有海浪和海鷗的聲音。


我們睡醒回家時，經已是七點多，小松老早也回來了。


「爺爺，你帶咗葵出去？」小松聽見門聲，就步落樓梯。


「係啊！」爺爺展牙大笑：「佢比啦啦好少少，至少識喵兩聲。」


小松已由今早的童軍制服，換上大鼻與鋼牙的圖案T-shirt。






「原來佢叫葵啊？」抱著我的爺爺，拉開我倆的距離：「咁小松，幫我問吓葵佢今日開唔開心？咁難得我帶佢出街。」


「葵，開唔開心啊？」小松又刻意裝幼稚聲線，問。


「都係咁，日日無所事事。」住在溫室是好是壞？


由於不用再找糧食，我們能做的事都失去。


「佢話好開心喎。」小松在欺騙。


「哈哈哈哈，下次爺爺再帶你出去。」爺爺用手指戳戳我的頭，才轉手交由小松抱住：「返去床到休息吓先！」


見爺爺一走，小松立即慰問：「陰公豬囉⋯⋯你係咪悶咗成日？」


「呢啲，就係老人所謂嘅退休生活？」我望著爺爺離去的背影。


「係啊，阿爺同外公佢哋鬼好悶嫁，日日喺屋企都冇嘢做咁。」


「難怪你要咁多寵物陪住你。」我抬頭望著小松。


「唔係寵物，係家人。」小松更正。


「你父親呢？」至少，我好像見過他一、兩次。


「佢成日要出去開夜，都得唔閒見我哋，未見過咁辛苦嘅獸醫。」小松嘟嘴，有點不是味兒。


「即係你大部份時間，都係陪兩老渡過。」


「係啊，為咗保持活力，唔俾佢哋同化，變成咬住煎餅睇電視嘅阿婆，我都好努力嫁喇。」小松滿懷力量，緊握拳頭：「葵！準備好出街未？」


「出街！！？」


「去結識新朋友！」說畢，小松把我抱到樓上，強行為我穿上蜜蜂服裝。


我有些不知所措：「！！！？？」望住全身原本漂亮的毛髮，都給衣服掩蓋住。


最重要是，那頂小帽子戴在頭上時，會翌起兩條觸鬚的問題。


「哇哇哇哇，好可愛啊！」小松馬不停蹄地為我瘋狂拍照。


「呢件咩嚟，幫我除咗佢！！」我跳到小松後腦、瘋狂拍打。


「唔得啊唔得啊！！！好得意呀！著一陣先啦！」小松掩住頭部抵擋：「一陣我帶你出席貓貓同好會啊！」


「乜鬼同好會！」我不斷搖頭，想擺脫這頂羞恥小帽子：「唔需要、唔需要！」


「打風都打唔甩嫁喇！葵吖！你嘅生命入面，唔係得生存。」小松按住我身子：「仲有生活！」


「⋯⋯」


「你啊，要好好享受呢個貓生先啱嫁嘛。」


「享受⋯？」


「唔。」她點頭，甜蜜一笑：「我帶你去體驗吓，咩係「生活」。」


一人一貓，在客廳打鬧了一番，總算平靜下來。


小松好像敲亮了，我的腦袋。


我沒必要，讓自己活得太過刻苦。


但我也⋯⋯


不敢快樂。


雖然生死乃常事，我亦都司空見慣。


可一想到破廟的同伴，就實在無法高興起來。


每天追尋芳的下落，是我唯一的謝罪。


「有時唔開心呢，同朋友傾吓計、一齊欣賞吓風景、一齊品嚐吓美食，都幾好架。」小松莞爾而笑：「放鬆吓喇，我知你未放得低，但唔可能二十四時都記住傷心嘅回憶。」


「你幾時⋯⋯」我別過面，說：「連讀心術都學埋。」


「唔洗讀心嫁～」小松也別過面，輕描淡寫地說：「關心吓都知。」


「嘖，但可唔可以幫我除咗件衫先。」我要求。


小松一口拒絕：「唔得喎，你咁可愛，我唔捨得。」


「⋯⋯咁你個乜嘢同好會，到底係咩嚟。」


「我沿路解釋你聽～」說罷，小松又上房，進行快速更衣。


是晚，小松穿著牛仔工人褲，配以格仔的襯衫和一雙白波鞋。


整個感覺，就像農家女孩一樣。


「出發！」小松攜同籃子出外。


原來，小松所謂的同好會，是她在石澳村由小至大就一起玩耍且有養寵物的朋友組成。


目的，只有一個。


就是每星期到海邊，一起聚舊，順便當閒日活動。


因為要出去市區實在太麻煩了。


在此之前，我一直區分不到生存和生活的分別。


待小松把我帶去後，才得悉另一種的生活。


沙灘那裡，有個小營火。


旁邊坐著幾個人，大家都是年青人，跟小松年齡相約。


「哈囉！」小松一去到，便揮揮手。


營火的溫光，映射在小松的臉龐上，特別有種溫暖的感覺。


夜空上，是數不盡的繁星。


平日市區不能看到的星夜，在石澳可以一覽無遺。


海浪聲和微微的風，也讓人倍感放鬆。


「你嚟啦，今次唔帶阿毛嚟？」頭戴蝴蝶結的女生，說。


「係吖，屋企有新家人，當然帶佢嚟見吓世面先。」小松將我抱起，面向大家：「葵！同大家打聲招呼。」


「小松係白痴。」我說。


「哇⋯」那女生不可異議地張口：「佢真係識喵我哋⋯打招呼喎⋯⋯」


證實了，他們都不懂聽貓語。
這裡有人彈奏結他、有人負責哼唱、有人會看小說、有躺在沙灘欣賞星夜。


七、八個年青人，聚首一堂做自己事。


當然，也有像小松的，愛說過不停。


「太可愛啦，我一定要同瘋狂合照啊啊啊！！」蝴蝶結女生興奮地摸我：「佢叫葵啊？」


「嗯啊。」小松抿笑，坐在旁做旁觀者。


「我叫美香呀，你好。」她強行握握我的手：「佢隻短手巧打耳呀！！小松，佢咩品種啊？」


「呃⋯」小松輕咬食指，思索著：「似係英國短毛⋯？但又似沙特爾，我都唔清楚。」


「哇，好少你唔知嘅品種。」美香吃驚。


「總之葵係隻黑黑地嘅好貓！佢好重情義嫁。」小松說。


「情義？例如你倒糧個陣，佢會等埋其他寵物先食？」


「唔話你知～」小松伸個懶腰，躺到沙上。


「話說呢，你有冇興趣陪我去旺角睇個表演啊？」美香一邊與我自拍，一邊問小松。


「表演？「My Little Airport」啊？」小松問。


「個啲奇怪歌得你先會聽！我要聽嘅，係「中彈少年團」嘅表演啊！」


「中彈少年團？」小松又擺出那張，不感興趣又覺無奈的表情：「咩嚟。」


「你唔知都正常嘅～因為佢哋仲係地下偶像。」


「地下偶像？」


「即係因為名氣或者機會不足，無辦法喺媒體上曝光，但又努力想成為藝人嘅人！」


「Sor喎，無興趣。」


「吓！你陪吓我都唔得！？」美香越說，淚光就越亮：「我鐘意「中彈少年團」好耐！！由佢哋冇粉絲人氣，到呢家就快可以出道⋯⋯」


「唓，嗰到有咩好玩先？」小松反問。


「有好多大大小小嘅地下偶像團隊！實有個啱你心水嘅。」美香指住小松，意氣地說：「仲有好多靚仔添。」


「哈哈，咁咪啱哂你囉。」


「但同時⋯⋯」美香擺出有話說不出的神情：「都有好多毒撚嫁⋯！個會場又咁迫，我一個女仔驚嫁嘛。」


「唔～」小松悠悠地點頭：「我考慮吓啦～」