（短篇）每一口煙，都有個故事: 《一支煙的時間》（十三）

吃過晚飯後，見時間尚早，我們便在街上閒逛。
 
「有無興趣飲杯嘢？」Adam忽然問道。
 
「吓？」我霎時間反應不來。
 
「嗰間酒吧有live band㗎，正氣嘅，放心。」他急忙澄清。
 
「好呀！」我不敢跟他說我從來未去過酒吧之類的地方，也不敢跟他說我不喜歡喝酒，但我想去去他喜歡去的地方。
 




我緊緊跟隨着他的步伐，終於來到他所說的酒吧。
 
推開木製的酒吧大門，映入眼簾的是充滿美國西部風格的裝潢，牆壁和椅桌皆是木製，店舖面積不大，座位亦不多，卻幾乎坐滿了人。所有座位都圍繞着左邊的大表演台，一隊樂隊正在賣力地演奏着抒情的藍調。
 
我們好不容易找到了一個角落的位置坐下來，那位置雖然看不到整個表演台，但相對地樂聲比較細小，不用扯開嗓子都能夠跟其他人說話。
 
「啤酒啱唔啱？」Adam問我。
 
「OK呀。」我點點頭，反正我又不懂甚麼雞尾酒。
 




於是他向侍應要了兩杯啤酒。
 
「你係咪第一次嚟酒吧？」他忽然問道。
 
「呃⋯⋯係呀。」我像是被揭穿謊言的小朋友，感到很害羞。
 
「你唔鍾意可以直接講嘛。」他認真地望着我。
 
「唔係呀唔係呀，嚟見識下都好嘛！其實都唔錯呀！」看着四周別具特色的裝潢，我倒是開始喜歡上這個地方。
 




「你唔反感就好喇。」他看似鬆了一口氣。
 
此時，侍應端來了兩杯啤酒，我跟Adam乾杯，然後淺嚐了一口。
 
老實說，我不太懂得欣賞苦澀的啤酒，不太明白為何要把如此難以入口的飲料灌入嘴巴，但正如吸煙一樣，我想是因為我未有一個讓自己喝啤酒的原因吧。
 
表演台傳來柔和中帶點憂傷的音樂，觀眾們都屏住呼吸靜心欣賞，一時間酒吧的氣氛稍微凝結，彷彿連空氣都因為憂傷的藍調而慢下來。
 
Adam一口氣喝掉了三分之一杯啤酒，然後嘆了一口氣。
 
「你有心事？」看着他喝酒喝得如此急，心裏滿是擔心。
 
「俾我飲多幾啖先。」他又拿起酒杯往嘴裏狂灌，淡黃的酒從他的嘴角緩緩流出，但他毫不在意，直至把酒杯放下，才用手背拭去。
 
「呢間酒吧，我已經好耐無嚟，正確啲嚟講，係唔敢嚟。」Adam的聲音變虛，語調顯得飄忽，感覺是淺醉了。




 
「我以為自己只要唔嚟就無事，但原來除咗呢間酒吧，仲有好多嘢會令我諗起佢。」他說着一句句意義不明的句子，令我摸不着頭腦，但隱約聽得出是關於他埋在心底深處不堪回道首的過去，因此我也不敢亂說話，只是靜靜地等待他繼續說下去。
 
「我以前一直覺得只要唔好接觸同佢有關嘅一切就可以放低，但原來越係去逃避，反而越記得清楚，越會諗起，因為要時刻提醒住自己有咩係唔掂得，唔見得，好辛苦，所以，我都係嚟咗呢度。」
 
「咁你宜家⋯⋯覺得點？」
 
「我覺得，無論我嚟唔嚟，我都係一樣忘記唔到，既然係咁，不如大方啲，俾自己去記住佢。」酒杯在不知不覺間只剩下沾在杯內殘餘的泡沫。
 
「都啱呀，當你知道自己唔可以再擁有嘅時候，唯一可以做嘅，就係唔好忘記。」我徐徐回應。
 
「估唔到你都講得出嚟啲說話喎。」
 
「無呀，睇戲學返嚟嘅。」
 




「你唔好奇嗰個係邊個咩？」Adam問道。
 
「你想講嘅，自然會講㗎啦，唔係咩？」我反問。
 
「你啱，咁跟住落嚟，唔知你有無興趣聽一個故事呢？」
 
「洗耳恭聽。」
 
「不過喺我講之前，我想你做一樣嘢。」Adam用食指敲敲桌面上盛滿啤酒的杯。
 
我舉起了酒杯，喝了一大口啤酒。
 
然後，我開始走進了Adam的內心世界，一個頹垣敗瓦的世界。