《日頭嘅我係個學生，夜晚嘅我就係個降魔師》: 《難道我可以扭轉宿命篇》第一章 Ep.21
「起身啦阿洛！」蒙蒙朧朧之陣我聽到有人叫我個名。
但呢一刻我真係覺得好攰，唔知自己做緊乜咁：「比我訓多陣啦...好攰呀...」
「再唔行就無飯食架啦屌你。」我feel到有人一野拍落我後尾枕。
「邊撚個呀？」我係睡夢之中醒番，向上一望原來係Anson同阿峰。
我望一望錶，原來已經12回半：「乜夠鐘放飯啦？又唔早D叫我起身？」
「係你自己叫極都唔醒囉，關我蛋治咩。」阿峰拎起銀包電話走出課室門口。
「係喎，下星期就考試，你兩個溫成點呀？」Anson係個勤力讀書嘅好學生，唔似得我同阿峰睇成績如糞土。
「挑，溫佢老母咩。我連考邊都唔知呀。」阿峰用一個好輕挑嘅態度回應。
「唔可以咁樣架，你出年就考DSE，咁嘅態度唔得架。我就唔同啦，我知要考咩，但就無諗過去溫。」我伸手搭住阿峰膊頭。
Anson嘆氣：「你兩個有咩分別呀？阿洛你唔好講到自己好上心啦。」
「仲有成年先考，怕咩呀？」距離DSE仲係來日方長，我跟本就驚都未驚過。
「聽講數學阿廢Sir好似扭親腰骨番唔到學，呢排有個新嘅代課老師。」Anson突然間諗番起。
「抵佢死啦，教到屎片咁樣，早D扭親仲好啦，換個新老師教點都好過條廢sir。」阿峰一聽到呢個消息就好興奮。
「唔知新老師係點架呢？你話會唔會仲廢過廢sir?」我地開始估緊關於新老師嘅野。
「唔洗估啦，陣間果堂就係maths,番去睇下咪知咩料囉。」Anson就咁終結左關於老師嘅呢個話題。
我地去左平時去開果間茶記，阿峰一坐低就話：「靚女，3個豆火！」
「我今日想食牛河喎...」次次都食豆腐火腩飯，食得多我都開始厭。
「阿洛，有冇聽過男人嘅浪漫呀。」阿峰懶係認真咁講。
「浪你老味啦，三個男人你同我講浪漫？」我拎起辣醬係咁加落阿峰碟飯上面。
「屌你啦！」阿峰拎起茄汁起勢咁加落我碟飯度。
「好心你地咪咁小學雞啦。」Anson一邊食一邊講。
「咦，你碟飯咁乾淨嘅？」我拎住辣醬對Anson碟飯虎視眈眈。
「係囉，打孖上啦！」我同阿峰一人一邊夾攻Anson碟飯。
就係咁我地on99又食完一餐，準備番去上新老師嘅堂。
一入到課室，新老師就已經係入面準備緊。
係一個著suit，戴眼鏡，望落去好正經嘅人。
齊人之後，新老師首先就介紹自己：「好啦咁多位，我係你地嘅數學科嘅代課老師，你地叫我阿Rick得架啦。」
「阿洛，你放學之後過黎搵我呀，我係office等你。」阿Rick係落堂嘅時候無啦啦咁同我講。
「喂，點解佢叫你搵佢嘅？係咪有咩事呀？」Anson問我。
「我都唔知...可以我上堂訓教掛...」我心入面淆左一淆。
放學之後我戰戰兢兢咁行去office搵阿Rick。
「阿sir…你係咪有事搵我呀？」我問阿Rick。
「係呀，我地出去再講。」阿Rick起身行出staff room。
「係咪有咩事呀...係咪我做錯D咩？」我慢慢回想番頭先上堂做過嘅野。
阿Rick拍一拍我膊頭：「無呀，我唔係要話你，我有好重要嘅野想同你講。」
「吓？咩事呀？」好在唔係有咩事要話我。
阿Rick好認真咁講：「可能你會覺得我講嘅野好難接受，但我都希望你信我。」
我對阿Rick點一點頭，佢就繼續講：「其實我係未來嘅世界將所有嘅事拉番去到你而家嘅呢個時間。」
「姐係你係未來人？」我問阿Rick。
阿Rick諗左一諗：「其實都唔可以咁講，我係未來嘅世紀將所有事回帶番到而家呢個時間點，而我就仲記得未來將會發生嘅事。我只係知到將來會發生咩事，並唔係未來人。」
「雖然難D接受，但我信住你先。咁你番黎係想做咩？」我問阿Rick。
「你肯信我實在太好啦，你之後會遇見一個叫海澄嘅女仔，將來嘅你會中意左佢，但係你唔可以接近佢。」我feel到阿Rick絕對唔係吹緊水，但我乜都唔知嘅情況之下我都好難理解點解要咁做。
我問番阿Rick：「點解要咁做？」
「因為佢係將來會死，而唯一救佢嘅方法就係唔好認識佢。」阿Rick講。
「吓...」我對阿Rick講嘅野都係唔係好理解。
最後阿Rick將未來會發生嘅事通通都講曬比我知。
「姐係大家都會因為我而死？」我問阿Rick。
「無錯，但呢個唔係重點。最重要嘅係解決歐陽sir，趁佢未知嘅時候就要趁早解決佢。」阿Rick解釋。
「但係...」我個腦實在係諗唔到野...
「唔係要你做D咩，只係為左保護你身邊嘅人，唔好接觸另一個世界嘅事，得唔得。」阿Rick望住我對眼。
「好啦...我明啦，我盡量啦...」但一時之間我對阿Rick所講嘅未來我真係唔係咁易接受到...
「點呀點呀，阿Rick同你講左咩呀？」原來阿峰同Anson係側邊等緊我。
「無咩野呀，咪係...」正想講出口之際我突然停住左，如果我同佢地講未來嘅事應該會嚇親佢地。
我最後都係求其作左D野同佢地講：「佢話睇番我地之前嘅卷，覺得我好有潛質叫我努力D咋嘛。」
「乜只係咁咋？仲以為會有D好爆嘅野添。」Anson得悉之後覺得有D失望。
「會有D咩呀，你地諗多啦。」我同佢地講，估唔到我第一次呃兄弟係為左一個自稱知道未來事嘅老師，佢仲要殺死歐陽sir…
「無咩野就唔好諗咁多啦，去我度啤啤佢，飲佢老味啦！」阿峰推住我同Anson兩個人行。
「好啦，反正聽日唔洗番學，你想飲幾多就陪你飲！隊啤又點少得邊爐，一於打埋佢老母個邊爐啦。」一諗起D啤酒肥牛我就口水都流曬出黎，對於阿峰嘅提議我舉腳贊成。
「你地真係諗住今晚玩？」Anson望住我地，眉頭一皺，好似有好多心事咁。
「做乜春呀，叫你黎玩都咁愁嘅？又比女飛呀？咁就更加要啤啤佢啦。」阿峰一邊講一邊拍Anson塊臉。
Anson就算比阿峰咁樣拍落塊面度，都一樣係望住我地無出聲，無表情⋯⋯
我地之間嘅氣氛突然之間變到好沉重⋯⋯
「今日農歷七月一，鬼門開呀！」Anson忽然大叫。
「我屌你呀，無啦啦咁大聲叫乜春呀，比你嚇撚死啦仆街。」我對住Anson施展出打孖一陽指。
「咪臭係，差D嚇到標屎呀。」阿峰摸一摸自己個屎忽。
「屌，唔係咁樣叫一下都驚呀嘛？又話十月點去萬聖節，你地去條春咩。」Anson串7 7 咁講。
「仲講咁多，閃人去買野啦。」阿峰好興奮咁捉住我同Anson狗衝出去。
一去到超級市場，阿峰二話不說就拎左三pack大裝1664。
「喂你拎咁多飲唔飲得曬呀？一人飲成兩升wor。」我指住D啤酒問。
「得啦，你飲唔曬咪我包底囉。」阿峰拍曬心口咁講。
「飲咁多睇住今晚比鬼搞呀你。」Anson笑笑口咁同阿峰講。
「啱呀，真係寧可信其有...」我同阿峰講。
「咪玩啦，揀左野食先啦，咩鬼鬼怪怪就唔好理啦，食野緊要呀大佬。」阿峰摸下自己個肚腩再同我地講。
「唔係呢...」我講到一半阿峰就行左去揀肥牛。
買完野都已經成七點幾，我地拎住D肥牛同啤酒急急腳咁行番去阿峰屋企準備打邊爐。
我諗番起阿Rick話我會係今日遇見果個叫海澄嘅女仔，但去到阿峰屋企都無遇到佢，唔通會係今晚撞到佢？
「阿峰呀，不如咁晚係你度訓呀？」我同阿峰提意今晚係佢度過夜。
我好好咁諗過，只要我係阿峰度過夜就唔會係夜晚嘅時候見到海澄。
「無所謂呀，睇你地咋。」阿峰好爽快咁同贊成我嘅提意。
食到一半嘅時候，Anson係咁望向窗出面，好似有D咩睇咁樣。
「做咩呀Anson，出面係咪有D咩？」察覺到呢點嘅我就開口問Anson。
「出面係咪有人掉錢落街呀？」Anson行去窗邊睇清楚D。
阿峰望一望之後就話：「去執錢啦仲望，陣間比人執曬呀！」講完之後就捉埋我同Anson行去門口。
「唔好啦，我唔落去啦，陣間執左比人拉呀。」我為左唔遇到阿Rick講嘅果個女仔，我打死都stay係阿峰屋企唔落去。
就算我咁講都好，阿峰都係一於少理：「行啦，你陪我地去，你唔好執咪得囉。」
我都無藉口可以再堅持唔出門口，死死地氣都係比阿峰捉左落街。唔通我始終都要遇上海澄？唔通就算阿Rick將時間倒轉番黎我都係無辦法扭轉宿命？