《日頭嘅我係個學生，夜晚嘅我就係個降魔師》: 《降魔師獵人篇》第一章 Ep.18
「無啦...海澄同Ivan都死左...阿詠阿峰又唔知去左邊...連我唯一嘅力量都無埋...」望住歐陽sir飛走，我就覺得自己好垃圾。
望住自己中意嘅人死係自己面前都救佢唔到，就好似Anson果次咁樣。我無能力保護到任何人，我...
「阿洛！你無事呀嘛！」我聽到後面有人叫我。
「你無事就好啦...」原來係阿峰同阿詠。
「你兩個頭先係邊呀？歐陽sir又話你地...」我問佢兩個。
「我地頭先比偉豪捉住左，歐陽sir逼我地睇住佢殺死學校入面嘅人...」阿詠講。
「乜係咁呀...Ivan同海澄呢...佢地比歐陽sir殺左啦...係我，係我無能力保護佢地，係我廢。」我不斷咁責怪自己保護唔到大家。
阿詠一巴星埋黎我度：「依加得你一個係咁咩，我地夠係咁啦，你又有冇諗過我地呀！我問你呀！」阿詠一路講，眼淚就一直咁流。
我同阿峰望到阿詠咁樣我地都無聲出。
「我地依加點好呀...歐陽sir接住仲會有其他行動架，我地要阻止佢。」我同阿詠講，我再一次振作，因為無論我點樣頹都好，大家都係唔會翻生。
「無錯，我地要阻止佢，所以要好好咁調查歐陽sir。」阿詠講。
「咁我有冇咩幫到手呀？我都想幫你地呀！」阿峰亦都希望助我地一臂之力。
「其實...好似附係我身上嘅修羅都比歐陽sir殺死左...」我突然諗番起佢地仲未知。
「咁咪得番我一個有靈力？」阿詠問。
「係...」我點頭回應。
「咁我地番去好好休息之後再諗下之後點好啦...」阿峰搭住我膊頭講。
一番到屋企我就攤左係張床上面，望著呢個天花板，我諗番起果次我比妖怪打低又係海澄送我番黎，但以後都唔會再有咁嘅機會...
點解...點解我連自己中意嘅人都救唔到，望住佢比人殺死我都無能為力...
我一拳打落自己塊面度，一拳、又一拳，我好希望呢一刻係發緊夢，好想由呢個惡夢之中醒覺。只可惜我只係自己呃自己，我都明清楚呢一點，我做緊嘅所有嘅都係無辦法令海澄、Ivan、Anson，因為係我身邊而死嘅人，大家都唔會復活。
「阿洛...」
我個腦入面聽到有把聲叫緊我個名，可能係我已經太攰啦，面對呢件事我真係用左好多好多嘅精神。
「阿洛...」
腦海入面果把聲又再一次出現，呢把聲真係好似海澄把聲。應該係因為海澄嘅死對我有太大嘅打擊，所以先有幻聽覺得聽到佢把聲。
「唔得啦，睇黎真係要休息一下...」一講完我就合埋眼。
「阿洛，我係海澄。」呢一次嘅「幻聽」非常之真實，就好似海澄係我耳邊同我講一樣。
「海澄！」我不自覺咁大叫出黎...
「算啦，又點會係海澄把聲...
我都未講完又再一次聽到：「阿洛，你無聽錯，你見唔見到我呀？」
「海澄，真係你？」我對住空無一人嘅房間回應。
「係，我係海澄。」
我即刻四周圍咁搵：「海澄你係邊呀？唔好玩啦，出黎啦！我好想見到你呀！」
「我咪係你前面囉...唔通你睇我唔到...」海澄答我。
「吓？咩呀？發生緊咩事，點解我完全唔明白係咩情況？」呢一刻我完全搞唔清楚發生緊咩事，點解我又會聽到海澄把聲。
「我呢...死左之後就發覺自己變左做靈魂飛左出黎啦...」
「...原來係咁...海澄呀...修羅已經比歐陽sir打低左啦，我已經再睇唔到靈界嘅野。」世上最遠嘅距離就係，明明海澄嘅靈魂就係我面前，但我就再無辦法可以見到佢。
「阿洛...我呢一刻好想攬實你...但我都一樣係無辦法掂到你嘅身體...」我雖然睇唔到，但我仍然隱若聽得出海澄默默流淚。
「海澄呀，學校有好多人都比歐陽sir利用明仔嘅怨靈殺死左...但我已經再無能力去阻止佢...」我同海澄講。
「阿洛，你已經好叻仔架啦，就算你睇唔到我，我掂唔到你，我都一樣會係你身邊陪住你架。」海澄安慰我內疚嘅心靈。
叮噹、叮噹、叮噹，突然間有人㩒左好多下門鐘。
「阿洛！你有無睇新聞呀？好大件事呀！」阿峰上氣唔接下氣咁講。
「咩呀？我唔睇電視架，新聞做咩呀？」我一臉疑惑，黑人問號咁望住阿峰。
「你睇左先啦，我...我好難解釋比你，你一睇就明架啦。」阿峰扯曬蝦咁講。
既然阿峰咁講，我都唯有打開電視睇下。
「哇...果然係大件事....」睇到電視播緊嘅新聞，我真心嚇左一嚇。
「果然真係大單野wor…」我另轉頭同番阿峰講。
「係呀，我頭先睇到都嚇親，突登沖過黎過話比你知架。」阿峰佢跑到成頭都係汗，不停咁拎我D紙巾抹汗。
「不過我真係估唔到，歐陽sir所做嘅野竟然會比新聞報出黎，咁而家所有人都知到靈界同降魔師嘅事啦？」我指住電視上面嘅新聞報導員講。
「無錯，連政府都公開承認左有靈界同降魔師嘅事，仲話會設立一個特別機關去負責呢方面嘅事，有關詳情會係所有事都安頓好再同公眾交代。」阿峰休息左一輪終於都抖順番條氣。
「咁但係公開呢樣野唔會引起恐慌咩？」我又係度諗。
「今次歐陽sir單野整死左咁多人，點都蓋唔住架啦。」聽到阿峰咁講，我又諗番起海澄，眉頭一皺。
「咁政府會點樣處置我地呢班降魔師呀。」我呢一刻一定要冷靜D搞番清楚個情況，千其唔可以亂。
「頭先咪話會有特別機關嘅，果個就係一個降魔師組成嘅機關，暫時淨係知降魔師將會推行發牌制度，無牌用靈力嘅話就會被降魔師當敵人通輯。」阿峰將政府嘅政策解析比我知。
「原來係發牌，但我已經無左靈力啦，我唔再係降魔師啦。」我始終都要接受修羅已經代替我死左一次嘅事。
「咁阿洛你諗住點呀？我可以學架，你教我吖一係！」阿峰好積極希望幫我分擔一下。
「唔好啦，唔可以拖埋你入黎，我唔再身邊嘅人再離開。」無錯，Anson已經死左，唔可以再比另一個兄弟都踏入呢個領域。
「一係我地去搵阿詠，而家就只係得番佢有靈力。」我同阿峰提議。
「你可以用你個腦幫我諗野，但我真係唔希望你接觸呢一方面...真係好危險架。」我再一次提醒阿峰。
「好啦...我明啦，你話乜就乜啦。」阿峰都死死地氣接受左。
「咁行啦，我地去搵阿詠啦。」我捉住阿峰嘅手臂將佢拉起身，起行去搵阿詠。
行到門口之際，有兩個男人企左係我屋企門口攔住我地，呢兩個究竟係咩人，唔通係歐陽sir嘅手下黎殺我地嘅？
個兩個男人都係著suit嘅，一個後生仔，All back頭，同我差唔多高。
另一個就係大隻佬，光頭嘅，睇落似中年男人。
「你係咪就係阿洛？」All back男問我。
「係...我就係阿洛。我已經無左靈力，我唔會夠你地打，要殺我就殺啦...」雖然把口就話要殺就殺，但身體卻很誠實，一講完就腳都震埋。
「你講乜呀？」大隻佬用雄厚嘅聲線輕描淡寫咁講左一句。
「乜你地唔係歐陽sir派黎殺我架咩？」我碌大對眼望實佢地。
「吓？你係咪痴左線呀？點解老細要我地搵個咁嘅人番去。」All Back男一臉不爽咁講。
「我地係政府派黎嘅，係新成立嘅降魔師協會嘅人。我係二級降魔師，佢就係高級降魔師。」大隻佬將政府發比佢嘅降魔師執照show出黎比我睇。
「咁點降你地會黎搵我嘅？」我諗起頭先佢話老細叫佢搵我，呢件事一定唔簡單。
「詳細嘅野其實我地都唔知，我地淨係收到order要過黎將你呢個細路帶番去。」All back男繼續用臭串態度講。
「果個係咪你朋友呀？」大隻佬問。
「係呀，佢啱啱黎搵我。」我指住阿峰同佢地講。
All back男突然係個公事包度抽左一把劍出黎指住我屋企入面：「唔係佢，係佢！發現飄泊嘅孤魂，一定要好好清理。」
無錯，佢地見到嘅就係海澄。
「我唔會比你傷害佢！」我伸手攔住All Back男。
「吓？細路你都幾大膽下，你知唔知我大可以一刀砍死你。」All back男用凌厲嘅眼神望住我。
「唔好咁啦...帶佢番去咪算囉，無謂搞咁多事啦。」大隻佬制止住All Back男。
「哼，如果唔係老細要見你我砍撚死左你啦。」All Back男好不屑咁收番埋把劍。
「原來降魔師協會嘅總部係設係政府大樓入面架？」我望住窗出面嘅政府總部講。
「我地而家起緊一座屬於我地嘅總部，起好之後我地就會搬過唔，唔再留係呢度架啦。」負責駕駛嘅大隻佬答我。
「唔好理佢啦，咁佢都死唔去真係可惜。」All Back男處處都針對我咁講，而大隻佬亦無再多講。
入到去佢地office之後,由All Back男帶路去到一間房嘅門口。All Back男敲敲門就講：「我帶左個𡃁仔過黎啦。」
本身我仲諗住房入面果個會係個好奇怪嘅人，但相比起帶我黎果兩個人，房入間果個人睇落就似係一個普通嘅文員feel。
「坐啦，唔洗咁緊張wor。」佢笑一笑再示意我坐低。
我坐低之後佢就繼續講：「我係降魔師協會嘅總降魔官，我想你過黎幫我做降魔官。」
聽到佢話想請我嘅時候我真係諗都無諗過：「吓...咪住先，點解你會揀我呀？我已經無左靈力架啦。」
「你唔係無，修羅只係沉睡左，你需要透過降魔伏妖吸收佢地嘅靈力再一次喚醒修羅。」總降魔官解釋。
「Btw我個名叫Rick，你叫我Rick就得架啦。」
「但以我而家呢個情況，我都無能力去開片啦。」我諗真D就發覺其實阿Rick講嘅野跟本就做唔到。
「阿洛，我比D野你試下。」阿Rick拎左一個好大嘅長方形盒出黎。
「呢個係咩黎架？」
「呢把係其中一件遠古神器，傳說話呢把係羅剎所用嘅劍。」阿Rick將個盒打開，盒入面嘅劍就好似修羅果把刀咁嘅樣，似乎佢地本身就係一對嘅神器。
「呢種神器有一個特點，就係無靈力嘅人都可以用佢。」阿Rick再解釋。
「咁我之前果把都係咁？」我問。
「無錯，修羅嘅刀同呢把一樣都係遠古神器，所以其實你呢一刻用唔到自己嘅靈力都可以用到呢把劍。因為所需要嘅靈力已經注入左係呢把劍度。」Rick將個盒推前去我果邊。
「即係你想我用呢把劍？」我雙手捉住個盒嘅兩邊，望住阿Rick。
「無錯，我就係要你用佢。你用得掂修羅嘅刀，一樣可以駕馭到羅剎嘅劍。」阿Rick用堅定嘅眼神望住我講。
「咁...姐係你想我去阻止歐陽sir繼續搞破壞？」我又問。
「呢個唔係最重要果樣，不過都係你要負責嘅事之一。我想你幫我搵一件遠古神器，創世沙漏。只要得到呢件神器，我地就可以將所有事扭轉去以前，阻止一切。」阿Rick終於都講出請我黎嘅真正目的。
「你嘅降魔師執照我都準備好架啦，只要你話得嘅就可以即刻做野。」Rick係佢櫃桶拎左印住我個名同相嘅執照出黎。
「我想再諗下先....」我刻意避開阿Rick嘅視線。
「你無咩時間再諗。農曆七月鬼門關之時，個女仔就要番過去果一邊，如果唔係嘅話佢就會變成你平時所砍殺妖魔鬼怪。」阿Rick將個盒蓋埋，挨前個身望實我對眼同我講。
「你係話海澄？佢會變成果D怪物？」一聽到阿Rick咁講我就變得好緊張。
「無錯，你仲有時間諗咁多？」阿Rick再問多我一次。
「咁我明白啦，我做。」為左海澄，我點都要接呢單野黎做。
「你明白咁就實在太好啦，咁我解釋一下先。頭先送你過黎嘅係二級同高級降魔師，而你就係降魔官，係高級降魔師對上一級。而我就係你對上兩級嘅總降魔官，我之上就係主席同副主席。不過果兩條友係廢嘅，跟本就唔識捉鬼，只係D政治撚黎架姐。」阿Rick將成個降魔師協會嘅架構同我講解一次。
「咁我實際上係要點做。」我又問阿Rick。
「跟據古書嘅記載，當修羅同羅剎相遇嘅時候，就會指引出所有神器嘅方向。呢個係最快速去搵到呢件神器嘅方法，要你去儲夠靈力喚醒修羅點都快過我地漫無目標咁搵啦。」阿Rick又再解釋。
「咁我明白啦，好，我跟你講嘅做。」我最終都決定左加入降魔師協會幫阿Rick做事。只要搵到創世沙漏，所有野都可以變番以前咁。唔止海澄，Anson、Ivan、比歐陽sir害死嘅人都會變番以前咁，我都希望如果所有野都從來無發生過。