《日頭嘅我係個學生，夜晚嘅我就係個降魔師》: 《鬼學生篇》第一章 Ep.15
到左第二日嘅朝早，大家就好似平時咁，番學，唔交功課，等食飯，上堂玩手機，就好似琴日咩事都無發生過咁樣。日頭，同夜晚好似兩個唔關事嘅世界咁樣，明明大家琴晚都係工廠入面苦戰左咁耐，而大家今日日頭竟然同平時一樣。
大家都過住同琴日一樣嘅生活，而阿峰亦都同唔例外。對於Anson嘅死，阿峰仲係耿耿於懷。我行埋去佢身邊，搭住阿峰嘅膊頭，阿峰就好灰咁望上黎講：「阿洛？做咩事呀？」
阿峰連講野都好無精神，好無力氣，同之前講野大大聲嘅阿峰完全相反。
「阿峰...我地幫Anson報左仇啦...」連我自己講呢句說話嘅時候都無釋懷嘅感覺，我地大家都明白，就算報左仇都好，阿峰都一樣係唔會再番黎我地身邊。
「係咩...咁咪幾好囉...」阿峰好敷衍咁答，然後我同佢就一直dead air，直到有人拍我膊頭。
我另轉頭一望，原來係海澄搵我。
「海澄？做咩呀？」我問。
「歐陽sir叫我地放學一齊去雜物房果度呀，唔知咩事呢。」海澄答。」
「咁好啦，放學之後我同佢一齊過去吖。」
「嗯，好啦咁放學見啦。」約好左放學一齊過去之後海澄就轉身離開，番去自己班房，而我就另番過黎繼續同阿峰講野。
當我另番過黎，阿峰居然唔係趴係枱面，而係坐直對住我。明明頭先阿峰仲係一個頹廢樣咁趴係枱面度，做咩佢無啦啦又會彈起身呢？
「喂阿峰，你頭先唔係仲好頹架咩？」我問。
「係架，但我對你同海澄好有興趣wor。」阿峰好賤咁笑。
「咩呀⋯我同海澄有D咩呀？」我扮無野咁望住阿峰，面不改容咁講。
「咪扮啦屌，你夠膽講你唔中意人地？」阿峰一野拍落我膊頭。
「唉，算啦⋯⋯海澄又靚，性格又好，幾時輪到我呀⋯⋯」既然都比阿峰識穿左，我就將D野攤曬出黎同佢講。
「唔好咁講wor，阿洛你呢排成日都同人地一齊，係人都睇到你地有D野啦。」阿峰向住我果邊坐埋左少少。
「認真咩？但我只係同海澄一齊捉鬼咋wor⋯⋯都唔算得上係D咩姐⋯⋯」我同阿峰講，但聽到阿峰咁樣講，我心入面又有少少暗爽。
「咁你知唔知人地Status係咩呀？我等緊你餐飯架。」阿峰好似真係好想呃出pool飯。
講起上黎我又好似真係唔知海澄嘅status係咩，「我都唔知呀⋯⋯」阿峰講完我先醒起呢個問題。
「哇屌，你連人地status都唔知呀？你都得架啦，不過呢，我就估佢係A0啦。你問下人地先啦，如果人地唔係A嘅話呢個topic都唔洗繼續啦。」阿峰講。
諗諗下，其實阿峰都講得無錯，唔知人地status又點樣追人地呢？聽完阿峰嘅意見，我決定要搵機會問下海澄status係咩先得。
雖然我一心決定要問status，但點樣問先好呢？我又無理由突然間問海澄status架⋯⋯呢個問題真係好值得深究。但⋯⋯如果問完知道左海澄係O嘅話咁我又點好呢？呀，好煩呀！
就係咁，我一直比呢幾個問題困擾住，直到放學我都仲係度不斷諗、不斷諗。
「阿洛！」係我後面有人好大聲叫我個名，我嚇到成個人都彈起。
我另轉頭一望，原來係海澄叫我。
「海澄？做咩呀⋯⋯」我呢一下就好似做左虧心事咁嘅感覺，覺得海澄會睇到我諗緊乜野咁樣。
「你係度發咩吽逗呀，我叫左你幾次都唔應我嘅？」海澄行到我面前對住我講。
「無...無呀...無咩野呀？吖！係咪要搵歐陽sir呀，我地行啦，依加過去啦。」我半拉半推咁就帶左海澄出課室，希望將呢樣野蒙混過去。但我諗諗下，海澄又唔係真係知我諗緊咩，我點解又要驚呢？我突然又覺得自己on9左。
「歐陽sir話有驚喜比我同你wor，懶係神秘咁樣，唔知有D咩呢？」海澄好期待呢個驚喜。
「吓？有咩驚喜呀？我唔知嘅？」我問。明明呢排都無人生日，又無咩事發生，唔通係打低死靈術士嘅慶功？
「乜我無同你講咩？哈哈，唔緊要啦，總之依加過左去先啦。」海澄越講越興奮。
「哦...好呀。」本來由我拉住海澄行變做我比海澄拉住我行。
「行快D啦，我好心急呀！」海澄加快腳步。
終於都行到雜物房嘅門口，就係我地諗住推門入去嘅時候，阿詠就係入面行出黎擋住我地。
「做咩呀？海澄佢好心急呀，比我地入左去先啦！」我同阿詠講，而海澄亦都不停點頭和應。
阿詠慢慢望上黎，好凝重咁同我地講：「你地做好心理准備未，你地陣間見到嘅野可以會好震撼...如果頂唔順嘅，你地都係番去先啦...」
比阿詠咁樣一講，氣氛即刻變到好緊張，唔知入面究竟有D咩呢。
「唔好懶神秘咁啦，比我地入去啦，好心急呀。」我兜過阿詠打開左雜物房道門，同海澄一齊行左入去。
「阿洛、海澄，你地真係準備好？」歐陽sir好凝重咁同我地講。
「無錯，我地已經準備好架啦。」海澄答。
「好，你地唔好嚇親就得啦。Ivan，拎比佢地啦。」歐陽sir示意將某樣野交比我地。
「好啦，呢樣就係要比你地嘅野啦...」Ivan慢慢咁將雙手係背後拎去前面。
「呢兩萬蚊係屬於你地架！」Ivan突然之間大叫，我同海澄都比Ivan突如其來嘅叫聲嚇親。
「做咩無啦啦比咁多錢我地呀？你中撚左六合彩呀？」我問大家。
「乜你唔記得左啦？我地之前接左個委託架嘛，呢D咪係我地嘅酬勞囉。」歐陽sir解釋。
「乜捉鬼可以搵到咁多錢架？又真係幾震撼wor，咁我地快S繼續接Job啦。」我拎住D錢好興奮咁數。
「唔係次次都有咁多錢架，係今次先有咁多架咋，下次未必有架。」阿詠講。
「咁姐係點呀？我地接嘅委託係點樣計錢架？」我問。
「其實我地每做完一單委託都會有人去評核任務嘅危險性、難度、影響力，再用呢D資料去計算酬勞。今次死靈術士事件嘅危險性好高，我地差D都無命。我地一共殺左好多隻鬼先降伏到死靈術士，而敵人亦都好強，所以難度都算幾高。我地今一次委託嘅級別係屬於A級，酬勞都有番咁上下架。」歐陽sir解釋。
「哇，一人兩萬，咁我地五個人，咪即係一共有十萬蚊？」原來一次A級任務係有咁多錢收，我真係心陏陏想即刻接多幾份job。
「唔係次次都有A級委託架，我地平時其實多數係接D級或者C級嘅委託，好多時都係得一百幾十架咋。」Ivan講。
「咁A級任務係咪最高級架啦？」海澄問大家。
「咁又唔係嘅，A級上面仲有S級SS同埋SSS級，不過我都只係做過一次S級，而且果一次仲唔少死傷。」歐陽sir開始認真咁同大家講。
「好啦，唔好講呢D啦，我地興祝一下海澄同阿洛成功完成左第一單Job啦！」歐陽sir一秒變番興奮mode。
雖然已經收到歐陽sir嘅驚起，但我心入面仲有另一樣野困擾住我，就係海澄嘅事。最衰都係阿峰，如果唔係同佢講起，可能我都唔會發現自己原來係咁在意海澄
「阿洛，你係咪有咩心事呀？你好似好煩惱咁嘅？」Ivan拍一拍我。
「吓？無呀？我邊有姐？無呀...無D咁嘅事呀。」我口疾疾咁答Ivan，但Ivan就好似睇得穿我諗緊咩咁。
Ivan拉住我再同我講：「係咪呢度唔方便呢？不如我地出出面講?」於是我就同Ivan行左出雜物房出面。
「你地兩個去邊呀？係咪做衰野！」阿詠捉住Ivan問。
「我地去柯尿呀，你去唔去呀？」Ivan挑逗阿詠。
「屌，核突。唔理你地啦。」阿詠轉個身就繼續食野，歐陽sir望一望我地之後都無咩反應。
我同Ivan行左出去雜物房出面一齊挨左係欄杆上面，Ivan對住我講：「點呀，依加講得啦？」
我望一望Ivan，而Ivan亦都對我點一點頭，我就開始講：「Ivan呀...我呢...我中意海澄呀...」我一直望住地下，但又聽唔到Ivan應我，我就再次抬頭望一下。
我只係見到Ivan對住我微微一笑，Ivan開口講：「到左呢個年紀係咁架啦。」
「屌，你咁樣同講廢話有分別咩？」我忍唔住對住Ivan舉中指。
「咁阿洛你有咩煩呀？同我分享下啦。」Ivan成個人挨在落欄杆，托住個頭。
「我唔知海澄status係咩呀...」
「吓？你連呢樣都唔知你就...」Ivan大叫，我就一手掩住左佢個口。
「佢係入面架...你咁大聲佢實聽到啦！」我講。
「好好好，咁你諗住點呀？」Ivan拎開我隻手。
「我諗緊有咩辦法問海澄呀...」
「得啦，我幫你啦。」Ivan拍一拍我膊頭。
「係咪呀？咁靠曬你啦！」我講完之後Ivan就開門入番去雜物房入面。而我一開門嘅時候就聽到Ivan問：「海澄、阿詠，你兩個status係咩呀？」
見到呢個畫面，我心入即刻屌左出聲。。
我兩對眼望實Ivan，用眼神同佢講：「你做乜撚野呀？」
然而Ivan只係對住我單左一下眼。
「哇，Ivan你無啦啦咁樣問人地嘅？」歐陽sir講。
Ivan聽到歐陽sir咁講又另過黎望一望我，然後講：「無呀，我先猜輸左比阿洛，所以咪要問你地囉。」
「哦，咁樣呀？我咪A2囉。」阿詠好爽快就講左出黎，我諗Ivan係廢事海澄自己一個講會尷尬先問埋阿詠，但都有可能係Ivan自己想知。
「咁海澄呢？」Ivan見海澄唔出聲就追問海澄，究竟海澄status係咩呢...真係好想知...好緊張...呢一刻個心跳得好快，如果海澄係O嘅話咁點好呢？
海澄無出聲，只係不停咁深呼吸，紅都臉曬，而海澄望落去又欲言又止咁樣，究竟佢講唔講架，我真係等到好肉緊。當大家嘅焦點都落係海澄身上，歐陽sir偷望左我一眼，然後就微微一笑，唔通比歐陽sir睇穿左我中意海澄？
歐陽sir突然出聲出海澄講：「海澄，阿詠都講左啦，你又有咩好怕呀？」
歐陽sir咁樣一問，海澄塊面比頭先仲更加紅，而海澄終於都開口講：「唔...唔係呀...我..」海澄講得好快，好細聲，但因為雜物房入而好靜，所以大家都叫勉強聲到海澄講咩。
「怕咩醜呀，講啦海澄。」阿詠係海澄背後推一推佢。
海澄再深呼吸一下，然後就好用力咁捉實拳頭同大家講：「我...我...我係*%+##*^」就係海澄終於肯講出口嘅時候，出面就傳黎一聲巨響，將海澄把聲遮住左。屌那星呀，明明只係差少少就知道海澄status係咩，如果比我知道係邊條仆街我實call修羅出黎砍柒佢。
Ivan另轉身對我展露左一個「我盡左力架啦」嘅眼神，然後就奸笑左一下。就算Ivan幫我幫到咁出面都係唔知道海澄嘅status，唔通真係要靠自己？
「我地出去睇下咩事先，可能會有危險。」歐陽sir打斷左我嘅思考，而我地亦都跟住歐陽sir出去睇下發生咩事。
我地係走廊望落去操場果度，就淨係見到有一堆人圍住係操場中間，因為實在太多人圍觀，所以我地都無辦法係樓上睇到發生咩事。
「呢度睇唔到呀，我地落去睇下啦。」歐陽sir一講完就轉身跑落去。歐陽sir實在跑得太快，我地都跟唔上佢嘅速度。
落到去嘅時候比起頭先有更加多人圍觀，我地都好辛苦先至逼到入去。當我地終於逼到入去嘅時候就只係見到有個同學訓左係地下，而周圍都係佢嘅血...