【屋村7-11驚魂】落樓下7仔食個叮叮飯，竟然咁可怕...: 24 (大結局+隱藏訊息+故事解構)
我用挑釁既語氣同阿叔講：「你講咁多廢話做咩姐？你擔心一下自己仲好啦，等我搞掂埋你條仆街，咁我就可以離開依度喇！」
依招激將法似乎有效，阿叔聽完我咁講，即刻變得氣沖沖，一步一步咁逼近我，仲伸手壓住把遮想「禁」低我，大大聲呼喝：「想搞掂阿叔我？下！下！！！」
而我一邊ｆｉｎｇ開佢作勢想反擊，同時又扮到俾佢既氣勢嚇親唔敢貿然出手，唯有一步一步向後遯。
阿叔見到我得個樣，慢慢放低戒心：「頭先你唔係好巴閉架咩！？？唔係想搞掂我架咩！？？仲唔快ｄ黎郁我？下！！」
阿叔以為自己控制晒大局，不斷向我逼近，只要繼續落去，就可以將阿叔引入黎我地既埋伏位置。
註：紅色＝阿欣，白色＝我，黑色＝阿叔
https://lh4.googleusercontent.com/-SvQ4xb67V3w/U0vnm5xCGwI/AAAAAAAAACc/TCLt2_SB3UU/w598-h448-no/new7.JPG
阿叔：「想搞掂阿叔我！？哈，你真係未死過呀死靚仔，一陣你唔好驚到叫阿媽黎呀！吼！！！！！」
阿叔總終都黎料，出盡力一野壓埋黎，我於是順住佢個勢咁向後退，但佢既動作忽然有少少奇怪，佢唔係單純想推我向後，好似想改變方向，將我壓向後面既零食架！！
「吼！！！！！！！！！！」
當我察覺到既時候已經太遲，阿叔來勢凶凶咁撞過黎，即使我想發力阻止都停唔到佢，然後佢一個跳起，成個人撲上我，而我已經無得再後退，成個人向後撞埋零食架，連人帶架向後冧低左！
「阿欣．．．！！」阿欣佢就係個零食架下面，俾個零食架壓住左！！
當我仲擔心阿欣既安危既時候，阿叔無放過依個機會，大力跳上個架再壓住我，然後一拳打落我塊面度：「傻仔！！想陰阿叔我！？我一早就係防盜鏡見到果個靚妹啦！！！」
阿叔講完之後，再黎一拳打落我度，跟住用手扼住我喉嚨，又起勢係零食架上面搖，不斷向零食架下面既阿欣施壓。
由於我好擔心阿欣既情況，所以咬緊牙關，出盡力頂開阿叔，試圖先挺番起身，阿叔擒係個架上面，要平衡身體有ｄ困難，所以當我一發力頂開佢，佢都即刻向後跌左係地下。
我趁個機會即刻轉身，見到阿欣個頭同隻手都伸出零食架，其他部份都俾個架壓住左，於是我馬上想拎起個零食架救阿欣出黎，但個零食架實在太重，我一個人無可能拎得唔起，眼見阿欣係下面痛苦掙扎，我就更加心急。
好死唔死，果個阿叔突然從後拉跌我，我成個人扒左係地下度，然後阿叔佢成個人訓落我度，一隻手扣住我條頸，另一隻手「禁」實個頭，我塊面就俾佢壓住係地下，完全反擊唔到。
就係依個時候，我發現原來我塊面唔係緊貼住地下，係地下同我塊面之間，有張報紙墊住左．．．我見到一張相，一個人既相．．．點解佢張相會係報紙度出現架呢？？
但我已經無時間諗其他野，俾阿叔佢咁從後扣住，我呼吸越黎越困難，唔通我就咁要死係依度！？．．．可惡！！．．．
我望到係零食架下面既阿欣，佢亦訓左係地下度望住我，佢口中吐血，面容好痛苦，佢下半身俾零食架壓實左完全郁唔到，係依個時候，我見到佢隻手開始有ｄ動作，我望真ｄ，原來佢隻手握住頭先我交俾佢既交剪，然後用最後一口氣，將交剪「冼」過黎俾我！
係千鈞一髮之際，我接住由阿欣「冼」過黎既交剪，再舉高向後一插！我即時感覺到有ｄ血係後面彈過黎，同時聽到阿叔既慘叫聲．．．
阿叔大叫既同時，亦都鬆開對手，我趁依個機會推開阿叔企左起身，原來頭先把交剪插左落阿叔隻眼度，佢塊面流左好多血，非常痛苦：「呀！！．．．呀！！．．．可惡！！我要殺左你！！」
阿叔係依個時候，仲想撲過黎置我於死地，於是我即刻用腳撐開佢，而佢就一個企唔穩，轉身向後跌，成塊面仆向地下，啪一聲！．．．阿叔訓左係地下，郁都唔郁，成灘血係佢塊面既位置「標」出黎．．．
我一邊坐係地下，一邊抖大氣，終於，終於都完結．．．未！仲有阿欣！我一諗起阿欣，就即刻企番起身走到零食架果邊。
「阿欣！！你點呀阿欣！？！？」
阿欣就咁訓左係地下度，面無血色，一ｄ反應都無．．．已經太遲喇，阿欣佢已經無左呼吸．．．
我無能為力咁跪左係地下．．．最衰都係我，係我累死左阿欣．．．
正當我不斷自責既時候，突然間，７仔門口開始吹起大風，將頭先地下果份報紙吹左埋黎我側邊，望住份報紙，我再一次見到報紙上面果張相。
我帶點疑惑拎起份報紙，望住張相，再望住標題：「連環扑頭黨通緝多月未果，昨晚再犯案少婦不治」
係內文側邊果張相，正正係果位師奶，師奶張相下面寫住「受害人」。
就係我滿腦子疑問既時候，７仔門口果邊就傳黎沉重既腳步聲，我擰轉頭一望，發現７仔外面漆黑之中，透射出幾道明亮既白光，慢慢，白光既覆蓋範圍不斷擴大，最後令到外面變成日頭一樣，不過濃霧依然無散去。
唔通就好似之前估計咁，對方唔知用咩方法困住我地係度，而目的就係等待最後一位生還者出現？？
腳步聲越黎越近，係我仲未諗到點應對既時候，一個身影已經穿過濃霧走左入黎７仔。
我曾經幻想過，假如對方咁厲害困住我地係依個奇特既空間，咁怕且對方應該係果ｄ老土科幻片入面，著住件全白色既研究員大袍，一頭白髮，一邊奸笑一邊實行d咩邪惡陰謀既科學家。
但事實並唔係咁樣，走入黎既人，不單冇果種令人生畏既感覺，反而仲令到成個氣氛變得有ｄ滑稽有ｄ荒唐。
如果要我形容佢，我第一樣聯想到既野就係「速遞員」- 佢一身短袖制服裝束，再加對黑色工人鞋，拎住個「斜咩袋」，點睇都好似成個普通既速遞員，而較為令人注目既地方就係佢果個光頭。
光頭佬一入到黎７仔，就用一種淡淡然既眼神望左我一下，跟住佢又望一望地下既阿叔同埋阿欣，感覺就好似佢對依ｄ場面見慣見熟咁。
「唉，終於可以收工喇！」光頭佬第一句說話，令到我無所惜從。
「你．．．」由於眼前既狀況已經令我個腦一片空白，我究竟係想講「你係邊個？？」定還是「你想做咩？？」，就連我自己都唔太清楚。
我都仲未組織好自己想講咩，光頭佬就伸手，示意我唔好講野住：「得得得！未到你，一個輪住一個，唔洗心急。」
佢究竟想點？？面對佢咁古怪既言行，我又應該點做好？？
由於唔知對方係咩頭咩路，我下意識遯後少少，同光頭佬保持一定距離，而光頭佬無理會我既反應，自顧地係「斜咩袋」度拎左塊寫字板同埋枝筆，寫字板上面有疊類似送貨單既紙。
佢望一望地下既阿叔，又望一望寫字板上面張紙，口ｕｐｕｐ咁，似係核對緊ｄ野，但由於佢講得唔大聲，所以我聽唔到佢講緊咩，佢一邊講一邊搖搖頭，直到最後一句，我終於都聽得到，如果我無聽錯既話，佢最後一句係：「嗯，北韓。」
佢一講完，就係張紙度寫左ｄ野，然後撕左張紙出黎，貼左係阿叔個頭上面。就係依個時候，我見到阿叔個身體開始出現變化！
我仲以為自己眼花，於是捽一捽對眼再望真ｄ，點知原來我冇睇錯，阿叔個身體慢慢變成「半透明」！
阿叔身體既變化真係嚇左我一跳，我即刻驚到彈開，究竟依個光頭佬係咩人黎？？佢頭先對阿叔佢做左ｄ咩？？
正當我唔知點算之際，光頭佬就經過左我，走左埋去零食架果邊。
我係咪應該趁依個時候逃離７仔呢？
係我仲猶豫緊既時候，光頭佬又好似頭先咁，不過今次目標係阿欣，佢望一望地下既阿欣，又係手上塊寫字板寫左ｄ野，然後撕左張紙出黎，準備貼係阿欣個頭度。
「咪住！！你究竟想點呀？」一時情急，我衝口而出咁喝停左光頭佬。
光頭佬聽到我大叫，擰轉頭用好唔耐煩既語氣同我講：「你等多一陣又唔會死既，趕住投胎都唔洗咁呀？佢地同你一樣等左成個星期有多架喇．．．」
光頭佬講左一堆我完全聽唔明既說話，然後佢繼續將手上既「送貨單」貼係阿欣個頭上面，仲講左句：「好，你就去北京．．．」
佢講完之後，阿欣既身體就同頭先阿叔一樣，變成「半透明」。
然後，光頭佬佢就擰轉身對住我，睇黎佢要對我出手喇！我即刻變得好緊張，我已經有晒心理準備同佢死過，點知佢突然同我講：「莫子嵐，恭喜你先，你獲派去你既心水志願，下世投胎可以再做香港人喇！」
光頭佬突如其來一句說話，令我完全唔識得點反應，成個人呆左係度。而光頭佬並無理會我，佢係佢手上張「送貨單」寫左幾隻字，跟住就想將張「送貨單」貼係我個頭度，當佢伸手過黎之際，好彩我回一回神，即刻擋住佢隻手，好驚咁向後遯左幾步：「你究竟想做咩呀？？」
光頭佬：「喂，你玩夠未呀？你等左成個星期，唔係好心急架咩？？」
對於光頭佬果種回應，我自己都開始有少少慶：「咩等左成個星期！？你究竟係度講咩呀？？我完全唔知你係度講咩！」
光頭佬突然好似醒起ｄ野：「唉．．．係ｗｏ，我差ｄ忘記左添．．．你自己唔記得左係好正常既，你呀，已經死左成個星期架喇．．．」
光頭佬又係度發咩ｕｐ瘋！？
我越聽就越嬲：「死左！？你話我死左！？你ｕｐ咩春呀？？」
光頭佬好無奈咁話：「你宜家依個狀態就係所謂既『中陰身』，即係指人死左之後直到投胎之前既時間．．．」
我無等光頭佬繼續講落去，即刻插咀：「痴撚線！你講咩呀！？咩陰咩身呀！？我琴晚係屋企打完機之後就落黎食飯，點鬼知一食就走唔番出去，最後就見你條『ｍｏｋ契』走入黎發up瘋喇，咁借問聲我幾時有死到呀！？」
光頭佬反問我：「咁你又記唔記得，你琴日起身之後，發生左咩事呀？」
被佢咁問埋晒ｄ無聊問題，我真係唔知好嬲定好笑：「哈，屌你老味，我又點會唔記得琴日做過咩呀！？琴日起身之後咪刷牙洗面出門口ｌｏｒ，出左門口之後．．．出左門口之後，我去搭Lift，之後．．．咪．．．應該．．．好似平時咁返工ｌｏｒ．．．應該．．．應該係．．．我每一日都係差唔多架啦．．．應該係呀．．．」
越講，我個心就越慌．．．點解我唔係好肯定琴日做過咩咁既？唔止琴日，係依幾日既事都有少少模糊。
光頭佬：「你琴日，呀，唔係，係上星期五之o岩，你上星期五早上去搭Ｌｉｆｔ，就再無之後喇，因為你最後墮Lift身亡。你座大廈，五年前改左用強國製造既Lift，用料極之差，直頭想收買人命。凡係死於非命既人，由於死得太突然，所以變成『中陰身』之後，都唔記得自己已經死左依個事實，仲會每日重覆一樣既生活，仲以為自己無死度．．．」
．．．無錯．．．我終於記番起．．．終於記番起所有野．．．果日架Ｌｉｆｔ突然向下急墜，然後就漆黑一片．．．我死左．．．我已經死左．．．死左成個星期．．．
光頭佬指住係地下逐漸變成透明既阿欣：「你地咁多個人，其實已經係上個星期唔同日子先後死去，每個都死得好慘呢．．．就好似依個女仔，好地地搭火車去補習，竟然因為個月台太多人太多自由行，逼下逼下就突然逼左佢出路軌，俾個火車一野輾過！真係陰公．．．」
阿欣！？阿欣佢都一早就死左？？
光頭佬：「香港依個地方真係越黎越危險呢，已經唔適合一般人居住，香港豆腐潤咁大，但衣食住行咩都要同人爭一餐，仲要越黎越多人同你爭，搞到宜家要住係幾十呎地方既人又有，搵果雞碎咁多仲要養大一家四口既人又有，若然適應能力差ｄ既話，就算唔逼死人都會搞到痴線呀．．．」
光頭佬一輪咀講野，但我一ｄ都聽唔入耳，因為我仲未接受到自己已經死左，我好似變成一個發悔氣既小朋友，想透過問題去反駁光頭佬，想證明其實所有野都係假既：「你究竟想講咩？你講咁多野同我地有咩關係？？」
光頭佬：「你知唔知呀，宜家內地好多鬼都爭住投胎做香港人呀．．．僧多粥少，我地咪唯有將你地放埋一齊，睇下邊個適應力最強，最適合投胎去香港ｌｏｒ．．．你地唔知道自己死左，每一個人都仲以為自己生活係上個星期，於是我地就將上星期五既便利店複製過黎，引你地入黎．．．」
一方面我根本唔願意接受自己死左，另一方面亦覺得我地成晚好似俾人玩弄股掌之中，所以聽到依一度，我真係無明火起：「搞咁鬼多野，就係為左睇下我地適唔適應係香港生活！？我地每一日都係香港生活緊，洗你黎考我地！？」
光頭佬：「我要更正，我係要睇下，你地邊個適合生存係將來既香港。」
我：「你條撚樣又發咩up瘋，咩將來既香港？將我地困住係間７仔度，同適應將來既香港有咩撚關係呀！？」
光頭佬進一步解釋：「就係因為你地香港政府實施人口無上限既政策，不斷輸入內地人，按照我地估計，係三十年內，大約每四個人當中，就有一個係內地人（***７仔入面既情況作比喻***）。香港人將來要係擠迫而資源分配不足既環境生活，到時甚至會出現為左爭支水都打交既情況，依間７仔，其實正正係將來香港既縮影。」
我即刻反駁：「就算你困得住我地係間７仔度陪你玩飢餓遊戲咁又點？就算第時香港真係變到好似你所講咁恐怖又點？大不了咪離開香港ｌｏｒ！」
光頭佬聽到我咁講，帶點輕視咁笑一笑：「哈哈，離開香港？係十幾年前，當時香港將要回歸，要面對政治上既不明朗（***７仔外面既情況作比喻***），你地ｄ香港人係點既反應？有Ｄ人但求安於現狀，永遠唔敢離開（***四眼仔／師奶作喻***），有Ｄ人好想離開，但又無能力離開（***阿叔／阿欣作喻***），有Ｄ人本來離開左，但離開左之後，又會因為害怕陌生環境，驚係出面搵唔到食，最後紛紛走番晒黎（***主角作喻***），依ｄ就係香港人既特質，要困住你地係香港，仲容易過困住你地係間便利店入面！如果唔係，我地頭先都唔洗開口阻嚇你地啦．．．」
原來，我地經歷左成晚，就係為左係我地當中揀一個最適合既人投胎做未來既香港人，特別進行既一場強者生存比試。
如果將來既香港，就好似依間７仔入面咁，我打死都唔想投胎再做香港人！
我：「咪住！我幾時話過我要投胎做番一個香港人？？唔制！！我死都唔制！我依一世仲未捱夠咩！？我依一世仲未同人爭夠咩！？點解要我再做多一次香港人，再一次同其他人爭過？？」
光頭佬笑笑口拎住將「送貨單」：「每個人生前既一言一行，都記係依張紙度，我地就係根據你地過往既紀錄，推測你地想投胎去邊度。你地香港人好得意，尤其係ｄ高官，把口就話好愛香港，但生前早就去申請外國護照，咁我地先知原來佢地將來想投胎做外國人．．．」
我：「咩話！？即係話，果班仆街做咁多衰野，你就送佢地到第二ｄ地方將來嘆世界，我地ｄ蟻民，就要留係香港繼續捱苦！？我都冇話過我想留係香港！？」
光項佬望一望手上張「送貨單」，皺一皺眉：「但起碼，我無見過你話你唔想ｗｏ．．．ｏ拿，依度寫住架，好多人遊行反對香港政府，你無去，好多人企出黎講自己既意見，你又無去．．．等我仲以為你好滿意香港現狀添．．．你唔怪得我地誤會架ｗｏ．．．」
係依一刻，我無言以對．．．的確，有好多問題，我一直都見到，我一直都知道，但我從來無為自己企出黎，就連做一個鍵盤戰士都懶．．．
一諗到依度，我就開始忍唔住流眼淚．．．阿爸，阿媽，對唔住，未能夠好好孝順你地．．．我好後悔，我真係好無用，你地咁辛苦養大我，都係想我有好日子過，但我就從來未為過自己既未來去爭取好日子，就連企出黎表態都無．．．
正如光頭佬所講，一切都係我自己選擇，即使我無死到，我都只會繼續盲目接受現時既社會狀況，繼續一粒聲都唔出咁生活落去，既然係咁，同我死左再投胎做一個「港奴」根本無分別．．．
我望住地下就黎消失既阿欣，問光頭佬：「咁其他人呢？佢地會去邊呀？．．．」
光頭佬：「投胎ｍａ．．．佢地本黎同你一樣，「心水志願」都係香港．．．不過宜家輸左，所有輸左既人都無得揀，會被我地隨機送到少人願意投胎既地方．．．」
光頭佬拎起張「送貨單」望住我：「你地死得太突然啦，無機會見家人最後一面．．．頭先你應該都打過電話俾父母，係咪？始終人鬼有別，唔能夠擾亂佢地既生活，俾你聽到佢地把聲，都總算了左你一件心事吧．．．好啦，你都係時候要上路架喇．．．」
於是，光頭佬就將手上既「送貨單」，貼左係我頭上。
廿四個月後，我係香港某間醫院留醫，當時我係一歲多ｄ．．．
我出世之後，第二任父母因為搵唔到奶粉俾我，最後唯有番強國買奶粉俾我食，食左成年，結果患有腎結石．．．
「若知前世因 今生受的是 若知來世果 今生作的是」
－－－－－－全文完－－－－－不過，仲有隱藏訊息同埋解構（當然大家好關心既女人頭）！
隱藏訊息同埋解構：
１）成個故仔，其實分左三層layer
第一層：最表面，就係主角佢地以為自己被困７仔
第二層：中間果層，就係主角佢地其實己經死左，要進行投胎前既輪選
第三層：作者層，由我既角度，將香港既情況同埋轉變，放入７仔同埋每個角色身上
當初有讀者話，故事入面既線索／伏線，好難諗到當中既關連，係因為故事入面有ｄ野其實係第二層既線索，有ｄ野其實係第三層既伏線
２）「女人頭」係故事入面，其實有兩個作用
第一：「女人頭」其實係孤魂野鬼（下面有詳細交代），暗示７仔依個空間，期實係重疊係真實世界既陰地
第二：係故事初段，好多讀者都會估，究竟依間７仔既真實地點係邊，寫故仔既時候，為左唔想引起大家不安，我將７仔出面都內部既結構做左少少改動，等大家唔會馬上聯想到係邊一個屋村既７仔．．．不過，我依然留低左一道線索，就係「女人頭」，唔知大家記唔記得，係幾年前某屋村，發生一單慘案，有一個少女既頭被斬下，警方搵左好耐都搵唔到（我唔記得左最後點），而命案既地點就係果頭，即係話，「女人頭」係用黎暗示故事入面間７仔既真正地點
３）恐怖Madam，一方面好似光頭佬所講，目的係想阻嚇大家，要大家留係７仔入面快ｄ進行投胎前輪，但另一方面，其實恐怖ｍａｄａｍ係比喻作一個高壓政權，係７仔（香港）入面定位左一套規則（政策），務求逼使大家去你爭我奪（不斷輸入內地人去分薄資源）
４）７仔出面被濃霧包圍（香港回歸），然後強國夫婦先番入去７仔（輸入內地人政策係回歸之後）
５）角色解構
每個角色，當然係代表左社會上唔同年齡唔同心態既人，而大睇上，７仔入面既人分為三個意識形態，有ｄ意識形態比較多人擁有，有ｄ比較少，因為數目上，係經過刻意安排
a)主角／阿欣／西裝友／師奶／四眼仔：代表一般香港人，係故事入面，佢地既行為並冇讀者希望咁去殺人（強國夫婦），因為香港大部份人既意識形態，都係較為文明，會限制自己既行為，即使係一個陌生既環境，亦正正係依個原因，香港人好易比大陸人食住
b)阿叔：自私自利到一個到步，係會去出賣整個社會既人，依種人，就係ｄ高官
c)強國夫婦：代表部份強國人果種咩都霸一餐既心態，動物既本能好多時候會高於人性
完左依個故，又要開始resume繼續寫＜癲才殺局＞，依個幾月入面，無論高登定紙言，都係咁俾人問我＜癲才＞幾時繼續，宜家讀者們可以如願以償啦?