【屋村7-11驚魂】落樓下7仔食個叮叮飯，竟然咁可怕...: 23
係濃霧入面奔跑，後方所傳黎阿叔既呼叫聲開始越黎越遠，而７仔散發出既光線亦逐漸變暗，唔洗好耐，四周圍就變得漆黑一片。
相信阿叔佢已經睇唔到我地既身影，不過由於擔心佢會繼續追係我地後面咬住唔放，所以我同阿欣依然好似受驚既老鼠，一味想逃避野貓追捕，我地兩個冇確實既「目的地」，亦都唔知道跑到幾遠先為止安全，只係知道我地要同阿叔拉開距離，跑到咁上下，阿欣就拉一拉我隻手，示意我地要向另一個方向繼續跑，令到阿叔冇咁易搵唔到我地。
由於剛才阿叔既攻擊，我依然覺得後腦隱隱作痛，再加上好緊張既關係，有好幾次我都爭ｄ差錯腳，不過好彩阿欣都及時拉住我，但最後我地都被一ｄ野「ｋｉｃｋ倒」，雙雙仆左係地下。
「呀．．．阿欣．．．你有冇事？」
「冇．．．我冇咩事．．．應該只係擦傷左少少．．．你呢？」
「我都冇事．．．」雖然把口係咁講，但其實本來個頭都仲有ｄ痛，宜家咁仆一仆，又痛多幾錢重。
「呼．．．呼．．．呼」正當我同阿欣仲坐係地下度既時候，我地就聽到有一陣好微弱既呼吸聲，呼吸聲既來源就正正係我地兩個隔離，嚇到我地即刻彈開左。
我同阿欣忍住無大叫出聲，雖然係漆黑中，但我地都好快意會到對方既諗法，我地決定先以靜制動，感受一下周圍有咩古怪再作打算。
當我地冷靜落黎之後，唔難發現果陣微弱既呼吸聲係由一個固定位置傳出，而且距離唔遠，根據呼吸聲既節奏同埋深度，聽落去唔覺得係殺氣騰騰，反而似係一個垂死病人既呼吸聲，顯得有ｄ辛苦。
當確定呼吸聲既來源係冇危險性之後，我就拎我部手提電話出黎當係電筒，慢慢伸向聲音來源，一照之下，我同阿欣就見到，有一個人背住我地訓左係度，從果個人既背影，我好快就認得佢係邊個，佢就係頭先唔知點解走左出７仔既師奶！
阿欣：「係佢！！」
我將電話遞俾阿欣拎住幫手照明，而我就靠近一ｄ，我地見到師奶個前額瘀左一大忽，然後我就用手搖醒師奶，原本合埋眼既師奶亦睜開左眼，依個時候，我留意到師奶嘴邊有少少痕跡，似係剛剛嘔完黎咁。
阿欣同我一樣，都留意到依一點：「可能係腦內出血，我以前睇過ｄ書話，腦內出血其中一個徵狀就係嘔吐．．．」
若果係咁，就更加肯定師奶佢走出黎既時候係非常之好驚，即使係撞親個頭，仍然想遠離７仔，究竟佢當時見到ｄ咩呢？
由於燈光既反射，師奶佢好似對我地兩個有反應，試圖開口講野，但聲音好微弱，而且眼神好飄忽，睇黎佢神智唔多清醒。
「唔洗急！慢慢講，你慢慢講．．．」
我坐係地下，將師奶個頭墊係我大腿上面，而我同阿欣就將個頭靠近師奶，細心聽下佢想講咩。
「．．．天堂．．．？．．．地獄．．．？」睇黎師奶佢以為自己死左。
阿欣：「你唔洗驚，宜家我地係７仔出面，頭先你自己一個跑左出黎。」
「．．．係我錯．．．唔應該．．．我唔應該．．．」
「唔洗急，你想話你唔應該咩？」
「唔應該．．．扮．．．扮睇．．．唔到．．．」師奶既呼吸越黎越短促，而且講野越黎越細聲。
阿欣：「扮睇唔到？．．．」
我嘗試問師奶：「你係咪係７仔入面睇到ｄ咩？？」
不過師奶並無理會我既問題，只顧繼續講，好辛苦咁吐出幾個字：「唔應該．．．唔．．．出聲．．．係我錯．．．」
扮睇唔到？唔出聲？究竟師奶想講ｄ咩？？
另一方面，師奶表現得好似好後悔咁，係單純因為佢係７仔所見到既野，定還是因為神智不清所以胡言亂語？
好可惜，無人可以解答到我同阿欣既疑問，因為剛才師奶佢用埋最後一口氣，講左頭先果番說話，之後就斷左氣。
望住師奶既屍體，我同阿欣已經無咩太大感覺，可能因為頭先７仔所發生既事更加震撼，我地只係坐左係地下，保持沉默，而師奶既最後一番說話仍然留係我腦中，但無論我點諗都諗唔到咩頭緒。
由於坐係度休息左一陣，頭暈暈既感覺開始減退，狀態總算叫做回復番八成，而阿欣就拎住部手機照一照自己手腳，好彩只係普通皮外傷。
阿欣：「我地宜家應該點算好．．．？」
我：「．．．我地總唔能夠一直係霧入面亂跑．．．依度咩都無，就算唔俾阿叔殺死，我地最終都會缺水而死。」
阿欣：「你係想返去便利店！？．．．如果見到阿叔佢點算呀？？同埋咁大霧，你知道點行返去咩？」
我：「頭先我地衝出７仔既時候，聽到果個阿叔應該追左出黎，如果好彩既話，話唔定佢宜家都係濃霧入面盪失路，咁既話，依個會係我地反擊既唯一機會！．．．雖然我都唔知宜家我地係咩位置，但根據我之前一個人走出７仔既經驗，雖然依個空間好奇怪，但總覺得係依個空間入面，無論你點走，好似最終都會走得返到去７仔咁．．．若然我地比阿叔早一步返到７仔，咁就可以係７仔入面步署反擊！」
阿欣：「咁．．．但如果頭先阿叔佢無繼續追出黎，一早返左入去７仔呢？又或者，即使佢係霧入面盪失路，但如果佢早過我地一步番到去便利店呢？．．．」
我：「我地已經無得揀，趁我地宜家仲有氣有力，仲可以同阿叔佢搏命，如果等到我地又餓又渴，到時想反擊都已經無機會．．．」
阿欣：「嗯．．．不過．．．頭先你話，困住我地係度既人，係想等待最後一個生還者出現．．．」
原來阿欣係擔心，就算我地對付左阿叔佢，依然會難逃互相撕殺既命運。
我將自己個身移一移，正面坐係度對住阿欣，我希望佢能夠認真聽一聽我既諗法，我希望咁講能夠安撫到佢：「放心，到時得番我地兩個人既話，我係唔會對你出手．．．若然唔係阿叔佢諗住對付我地，我根本無諗住對任何人出手．．．當然，我唔係咩聖人，我都要講明先，若然到時你想殺我，我都唔會俾你得逞．．．ｏｋ？」
阿欣聽到我咁講，忍唔住笑左一下，然後點一點頭：「你有咩理由會話定俾我知你會反擊架．．．假如我真係你既敵人，咁你就幣家伙喇！．．．」
「哈哈．．．」聽到阿欣咁講，我都笑左出聲，但我好清楚，其實我地只不過係度苦中作樂，因為之後要做既事，絕對唔係講笑。
我同阿欣企番起身，拍一拍身上既灰塵，由於我地都唔知道離開左７仔有幾遠，加上頭先跑出黎既時候又曾經轉過方向，所以我地只能夠大慨估計7仔既位置（其實係依個咁奇特既空間入面，距離7仔有幾遠又或者7仔係咩方向，好似已經變得冇意思），然後朝住果個方向出發。
我地回程既時候，唔敢太大幅度跑動，改為加快步伐，同時亦將手機lock左，避免手機發出燈光，事關阿叔佢可能係濃霧入要搵緊我地，所以我地要盡量隱藏自己既位置。
無手機當係電筒咁照明，四周圍又變得漆黑一片，由於唔想走散左，所以回程既時候我同阿欣都拖住手。
一路上拖住阿欣隻手，我就諗番起頭先同阿欣多次既對話，知道佢好想入到大學，想將來搵番到份好工，想改變屋企人既生活，我相信佢一定用左好多苦功，作為一個香港公開試同埋職場上既失敗者，我都希望佢能夠完成心願，唔洗好似我咁，沉淪係一個永遠無機會向上游既狀態．．．所以我提醒自己，今次同阿叔佢死過，唔單單係為左自己，亦係為左阿欣。
回程途中唔算得上順利，或者係太緊張既原故，感覺上好似行左好遠路都未番到７仔，好彩我既估計無錯，似乎向邊一個方向出發都無所謂，只要一直行，最終都會番到黎７仔。
我同阿欣企係７仔門口，由正門望入去，已經唔見阿叔係度，就連強國女人條屍都唔見左。
我不其然係度諗，究竟係阿叔早我地一步先返到黎７仔搬開左條屍，定還是條屍好似西裝友佢地咁消失左？
若果係貨倉外頭既屍體最後會自動消失，咁師奶佢又係咪係我地離開左之後就消失左？
不過，我地無時間深究依ｄ問題，我同阿欣企左係７仔門口探頭「裝」下，但仍然唔敢貿然走入去，因為我地擔心阿叔可能係入面埋伏緊。
我地望左幾眼都唔見有咩動靜，於是我就先走到收銀櫃隔離拎左兩把７仔長遮當係武器旁身，其中一把就交俾阿欣，而阿欣就跟住我後面，我地放輕腳步慢慢走入ｄ，同時又周不時回頭望下正門，睇下阿叔會唔會突然係正門出現。
行到去零食架果度，我地都唔見阿叔既蹤影，於是我就望一望貨倉門口，阿欣亦向我點一點頭，大家都明白仲未可以放低戒心。
我用手勢示意阿欣佢係零食架後面「哩埋」，萬一阿叔真係係貨倉入面走出黎見到我，咁阿欣都仲可以趁機襲擊阿叔。
而我就自己一個去到貨倉門口，一手輸入密碼，一手握實把遮，準備隨時會見到阿叔同佢死過。
輸入密碼後，我慢慢打開到門，透過門隙偷望貨倉入面既環境。係門口可以見到，廁所同我地離開既時候一樣，只有一大灘血跡係地下，同埋見到果個裂左既廁所缸。
我將道門再打開少少，然後伸個頭入去望，雪房門口打開左，我集中精神聽下有冇咩動靜，聽左幾秒唔覺有異樣，於是我大膽小小行入ｄ望下，發覺原來雪房同埋辦公枱果邊都冇人，真係好彩，咁睇黎阿叔佢仲未番入黎７仔。
我走番去貨倉出面搵阿欣，舉起ｏｋ手勢，表示一切順利。
阿欣：「跟住落黎我地要點做？？」
我用手指一指貨倉入面：「辦公枱果邊可能有ｄ岩洗既野。」
於是我同阿欣佢就走入去辦公枱果邊，好快就係櫃桶入面搵到另一把交剪，我地再打開其他櫃桶搵，但其餘果ｄ都係無殺傷力既文具。
我拎住把交剪，盤算左一陣，然後就遞俾阿欣：「我有一個計劃，不過要你既協助。」
阿欣：「你俾左把交剪我，咁你打算點做？」
我：「等我黎做餌，引開阿叔注意，到時你睇準機會落手！」
阿欣一聽到我既計劃，就變得不知所惜：「我！？我唔得架！．．．我怕幫唔到手不特只，仲會連累你．．．」
我：「就算到時發生左咩事你幫唔到我，最起碼你仲有把交剪係手保護自己．．．阿欣你要聽住，果個阿叔宜家唔係人咁品，你千祈唔可以心軟！出面仲有好多野等住你去完成！」
由於地形所限，加上擔心阿叔好快返到黎，所謂既計劃其實都冇經過咩精心設計，我好快就將計劃講俾阿欣知道，然後我地兩個就係貨倉出面部置。
我拎住把遮，企係收銀櫃果邊望住７仔門口，一切都準備就緒。
等左好耐，７仔門口終於傳黎一陣腳步聲同埋呼吸聲，我知道，係阿叔佢番左黎，所以亦都握實把遮，但我提醒自己唔好衝動，一定要將阿叔引到去我地既埋伏位置。
誰不知，７仔門外既腳步聲停低左，呼吸聲亦好似刻意壓低左，由於被濃霧包圍，我依然見唔到７仔出面既人影，但我保持住警戒心，我知道，阿叔就係７仔門外，盤算緊應該點做。
失驚無神，有一塊「板狀物」係濃霧入面向我飛埋黎，就係千鈞一髮之間我避開左，但由於事情發生得太突然，我控制唔住叫左出聲，就係依個時候，阿叔係濃霧入面衝左入黎，原來係聲東擊西！
由於阿叔既衝力大猛，即使我有把遮係手格開阿叔，但都阻唔到佢，仲俾佢一野「禁」住我把遮，試圖壓我落地下，好彩我身穩陣腳之後，即刻一腳「ｙｕｎg」落佢個肚倒，佢成個人向後遯左幾步，不過好快佢就企穩番，然後擺出一副準備攻擊既姿勢，而我亦不甘示弱，拎住把遮作勢準備迎擊。
阿叔望住我，眼神極之陰險，笑笑口話：「哈哈，仲咩得你一個既？你果個女朋友仔呢？」
我一副毫不在乎既口吻：「哈，果個死靚妹？頭先我係出面做瓜左佢啦．．．」
阿叔對我既做法好似表現得好欣賞：「哈哈，叻仔！！係７仔依度又好，係出面個世界又好，最緊要都係自己！」