《DSE幻想校園(一)》── 從這裡開始 (Do Something Easy): 第二節：從宿生長開始 6.3 (第二節完)

視點回到我卓龍身上。

時隔一日，我、南兄、超人、佩君及阿鼎五人一同到附近的商場買開學用的物品，還拍了學生照，只是在快餐店內等完成沖曬。因為南兄猜拳輸了，用餐後已經去了沖曬店給我們一同拿回來。而我們在無聊的時候，又再說起這次的事件。

「嘩！我嗰時真係唔敢再睇落去，係Vinci幫我拍落去㗎，俾人除晒啲衫喎……我先唔可以咁冷靜！」

佩君聽了超人說起此事，整個人也心寒起來。

「佩君小姐……可唔可以細聲啲……仲有……我無俾人除晒，喺除之前已經停咗手喇。」





這時我摸著佩君的頭，安慰著她，為她定驚，可是突然被她一手擋開：

「咪掂我！你掂過佢啲尿嘅！」

「無呀！我無掂到佢呀！」

我看著佩君夾著自己的鼻子，依著身邊的超人，用另一隻手再「撥撥撥撥撥」。早知如此，我便把心一橫，除了那人的底褲，拋進她的房間！

「我想問下妳，點解Vinci會喺度？」





超人突然問道。

「咁就真係好好彩喇，因為我唔識開天台道門，Vinci又好似咁啱行咗上嚟，我講咗件事俾佢聽，佢就幫我開門。如果唔係……都幾難拍到啲證據！」

這時我拍了一拍身邊的阿鼎。

「咁仲有阿鼎呀嘛，放心啦，我考慮得好周全！」

說後。見阿鼎微微點頭，有點不知所措。這時一直沉默的阿鼎突然說道：





「你哋玩到咁大，Man Sir竟然放過你哋……都幾奇怪！」

「係囉……卓龍！其實你係咪姓文，Man Sir係你老豆呀？」

超人也和議起來，我想了一想。

「係啩……我都唔記得我老豆係邊個……」

不久，南兄帶著我們的學生相回來，一併放在桌上，正當我們想取回自己的相時，他突然阻止我們，還露出陰謀家的笑容：

「頭先我諗到樣正嘢……不如大家結拜做兄弟呢？」

「下？」

除了阿鼎外，眾人異口同聲說到，佩君更說：





「我女仔嚟㗎喎！」

「所謂巾幗不讓鬚眉，妳何必睇小自己，只要妳唔著裙就無人知妳係女仔啦！」

說後當然被佩君鎚了一擊，但我在意的是南兄為什麼會有這個想法。

「經一事，長一智，有時人生嘅嘢真係好難估計，如果望返轉頭，我諗我真係唔會跟你哋上去。但唔做都做咗，我覺得呢啲都係大家嘅緣份……」

這時超人也受不了他的老氣。

「咪咁玄啦，總之就想做兄弟……咁想點做法？係咪要滴啲鼻血喺杯可樂到飲咗佢？」

佩君見狀笑個不停。南兄便說下去：





「就咁！我哋五個人，一齊飲咗呢杯混醬佢！」

說後，南兄便將手中所見的豉油、醋、辣油、麻油、茄醬、胡椒粉等等混在一個小杯中，還混得十分起勁。可是當我們看到這杯深咖啡色布丁狀的「結拜醬」，實在不敢恭維。我還沒出聲，佩君已搶著說：

「我先唔會同你癲，咁喇！用我嘅方法！」

她將我們的學生相各抽出一張，再反轉背面。

「我哋五個人，喺每張相嘅後面都寫返自己個花名，然後俾其他人保管！作為結拜嘅信物！」

說著，佩君已經動筆寫著。超人與南兄也高聲叫好，也動筆起來，只有阿鼎什麼也沒有做。

「喂……做咩唔寫？」

我輕聲問道。





「……我……好似都無做過啲咩……」

他既不是失落，又沒有高興，似是一個局外人一樣……確實，他是被我們強制拉過來的。

「喂！都話係緣份囉，擋唔到㗎喇！」

南兄說後，超人也和議：

「咪係，你嗰日都有幫大家拍片㗎嘛，我咪又係咩都無做，最後都係全靠佢兩個！」

最後佩君也說著：

「一齊Join嚟玩先會開心㗎！」





聽畢，他還是沒有動手，卻突然將南兄混成的「結拜醬」一口「飲」掉。我們也看呆了……

「咁……我就有資格同大家平等……」

阿鼎表情扭曲，可是……及後我看到自認識他以來的第一個笑面。

第二章完

(待續)

如想直接看完整個第一冊(一共四節)的故事，可到香港各大書店向職員查詢有關《DSE幻想校園》(一)，
或是到網上訂購：Pena Shore 。

有關第二冊的出版消息，可到作品專頁留意。(如無意外會在2019年底出版)