《DSE幻想校園(一)》── 從這裡開始 (Do Something Easy): 第二節：從宿生長開始 5.1

來到天台門前，門口已經看到兩個守門員不懷好意。由他們引路，我們三人被帶到天台的中央。以這裡的闊度，只要不靠邊站著，下方的同學根本不會發現。這時我眺望對面女生宿舍，那裡空無一人，希望佩君已經準備好。而沒有想到的是，在這個時候我竟然想起那一次跟Vinci見面的情況，從這邊的天台望回去，就像在偷窺那次我們的見面一樣，感覺頗有趣。

「喂！叫你上嚟發夢㗎？聽唔聽到我講咩呀？叫你一個人嚟就變咗三個？」

剛才那位中五的Tutor十分不滿，當我回神之後，才發現十多名中五學生已圍在附近，有的站在門口，有的圍在中五Tutor後方，有的散落在我們三人的附近。這不是一個有利的戰鬥條件……

「是但喇，你有咩想講呀？」

那位男Tutor聽到我的疑問，感到不滿，說話又再大聲了一點：





「你都幾串喎。你仲要喺度住成年㗎？咁嘅態度同我講嘢？」

我開始有點擔心他的心臟負擔，為什麼這種小事也大動肝火……

「係係係……你講喇，我會認真咁聽㗎喇……」

說著，就連超人及南兄也有點驚奇，是不是我太過冷靜？

「你哋班Form 4仔聽住，以後食飯有位要俾我哋坐先、沖涼要俾前半個鐘我哋用你哋嗰層嘅廁所、Book場借嘢要經我哋同意、定時定候送零食放喺我哋嗰層、你哋嘅雪櫃要俾埋我哋用、有咩嘢衰咗要人頂就你哋搵人認咗佢，明唔明白？」





聽完一次，未知是否我錯覺，他似乎用Rap歌的方式來唱給我知道，好等我容易入腦，可惜是聽起來就像陳腔濫調的數白欖懷舊風味，有點進不了耳。如果要問他可否再Rap一次，會否氣得他身心俱裂？這對他太殘忍了……

「喂……卓龍，你到底想點？單聲俾我哋知，等我哋可以配合下都好！」

超人輕聲問道，但對方已經阻止了超人說：

「喂！想點呀？反抗呀？」

超人沒有回應，南兄在旁也不敢多話，但看樣子跟我差不多，似乎在想辦法。





「南兄……三十六計，你覺得有咩計用得著？」

我沒有理會形勢，直截了當去問他，南兄則小心回道：

「咁睇你要咩效果喇，要全身而退就難啲，如果要減低傷兵都有啲方法嘅……」

「喂！你又當我無到呀！」

對方又爆發了，我聽得有點不耐煩：

「嘈咩啫，我哋呢度三個人，佔成級中四嘅宿生都無五份一，就算我代表大家答應你，佢哋分分鐘都未知咩事，跟住又搞到大家唔知頭唔知路咁得罪你咪仲麻煩，你都係想簡單啲由我哋去配合啫？俾啲耐性好無？」

超人聽著不禁笑了起來，當然對方一個人也不敢笑，反過來相當生氣。真是……要是他們一人一拳，我也不用去韓國整容了，冷靜點。