《DSE幻想校園(一)》── 從這裡開始 (Do Something Easy): 第一節： 從學長訓練營開始 4.2 (第一節完)
「總知呢件事我唔想有咩差錯，我手上呢一封就係校董親手寫俾我嘅信，要我好好照顧呢位同學。其實單卓龍嘅情況真係好值得同情，所以校董先咁睇重呢件事。亦因為咁，我哋喺處理呢個問題上亦都要好小心，好可能會直接影響到校董會唔會再支持我哋富林克蘭寄宿書院嘅營運開支。所以我必須再強調一次，要好好去處理呢件事，我唔想有任何對學校不利嘅流言出到嚟，特別係由我哋老師把口，大家明唔明白？」
這時莫主任搶著回應：
「當然明白啦！我哋訓導處都決定咗，由今年嘅中一生開始，嚴格執行教育佢嘅紀律，一定會做到校風純樸嘅印象俾校董睇。」
雖然莫主任信心十足，可是Man Sir聽後不小心笑了一下，令對方十分不滿。此時校長也搖搖頭，嘆息著：
「咁都唔可以太嚴，始終係物極必反，唉……呢一代嘅學生同我哋嗰代好唔同，我哋要做到循循善誘，建立好友善嘅師生關係，學生先會聽我哋說話㗎嘛，明唔明呀？」
莫主任聽後似懂非懂的無奈點頭。這時任 Sir補充說著：
「校長妳放心，Miss貝佢哋呢次嘅學長訓練營，就係為咗配合訓導處，一軟一硬嘅教學方式而設計嘅活動，訓導處就係要夠硬，我哋做軟嘅工作先有效果㗎嘛！莫主任……呵？」
任Sir志氣地笑著，令莫主任也不得不和議起來，校長也點頭示好。
「都係……應該要咁做。咁宜家傾埋最後一件事先……一直懸空嘅副校長同舍監呢兩個位，都係時候要同大家交代一下……」
說後，任Sir對Man Sir打了一個眼色，連同莫主任也緊張起來，只有Miss葉一直茫然，還不知道三人剛才的舌戰只為了眼前一刻……校長說：
「……雖然Man Sir都好有經驗，但係要你再分啲時間出嚟照顧新嚟嘅主任同單卓龍同學，真係怕你應付唔嚟……舍監一職，我都係另外搵人……」
Man Sir聽後有如睛天霹靂，無法說話。任Sir馬上說：
「校長！其實如果單卓龍嘅事大家都有份分擔，唔一定……」
怎料校長搶先說：
「任Sir……你都係，做單卓龍嘅班主任，一定要用好多精神時間去照顧佢，副校長一職，我都會再搵人選。」
任Sir聽後也六神無主，與Man Sir二人對望，只有莫主任突如其來的春風滿面，高聲說著：
「就係囉！任Sir要委以重任，副校長嘅工作太辛苦佢喇……就梗係由我嚟做……嘻……」
說後，校長也感愕然：
「我無話要升你喎……」
在坐人士鴉雀無聲。一會，任Sir急起來，走到校長身邊說：
「……咁……係咪要等單卓龍畢咗業……先決定人選？但要等三年……三年喎？校長？」
說話的同時，任Sir不小心看到桌上的親筆信，似乎提到有關副校人選的事，令他恍然大悟。校長發現後馬上收起，道：
「我話咗會處理……無咩特別事，散會！」
校長說後，也急步離開，眾人也感奇怪，只好跟著走出會議室，剩下剛才舌戰的三人及Miss葉。
這時Man Sir終於可以對Miss葉吐出苦水：
「葉小姐呀，妳唔知咩事就唔好亂講嘢啦，真係前世欠咗妳……」
Miss葉急著回應：
「對唔住，我真係唔知校長唔知欺凌嘅事，我真係擔心緊單卓龍！」
「妳睇住自己班女就得㗎喇，仔我會搞掂㗎喇，OK？唉……」
這時任Sir竊笑一下，走到Man Sir身邊，安慰著他：
「算啦算啦，唔關佢事，校長佢借刀殺人啫，根本就唔想升我哋職……」
莫主任聽到對手的說話，也前事不計，上前問道：
「任Sir，你講咩？學校最老資格唔係你就係我，佢想升邊個？」
任Sir見莫主任雖然行事魯莽，平時也只會拍拍馬屁，本為著跟他平起平坐一事感到不悅，但如今出現了共同敵人，也不妨坦言：
「我見到封親筆信提到，校董有一個人選想委任做副校同舍監，哈！真係……總之單卓龍同其他學生嘅事，我哋都做好本份先得……將來嘅日子，我都唔知會發生咩事……」
全第一話完
後記：
有關之後的內容，可到附近各大書店向職員查詢。如果沒有貨，可以留電話預訂，但切記！
不要先付錢！要先看看書本內頁是否完整無缺、摺痕、皺起(順便繼續試讀)！
覺得沒有問題才付款購買。如有問題，可跟我聯絡。
FB：https://www.facebook.com/DSEFFSTORY/ 《DSE幻想校園》系列專頁。
其他實體上架作品：
《叛神軍團》HKD88 (書展後會安排香港各大書店有售)
《錯的人生，對的人》HKD80 (不包運費)
其他網上作品：
《格子控的執著》
《混個半神當就這麼難嗎》
《Slow Music》
《筆示驅魔傳》
《元戰江湖》
《鍊魔騎士》
《在咖啡店工作是一件沉悶的事》
《當值護屍》
《中年大叔的覺醒》
《遊唱詩人的幻想》
關於作者最新消息，可到作者個人FB：https://www.facebook.com/andy729huiblog/ (Like後搶先看)