《DSE幻想校園(一)》── 從這裡開始 (Do Something Easy): 第一節： 從學長訓練營開始 4.1

正當學長訓練營完結的時候，同時間在學校宿舍的會議室，主任們正為「單卓龍」的個案在會議室討論著。一名男性坐在一旁提出：

「我觀察咗佢一段時間，我覺得佢一啲問題都無，而且比一般同年嘅十五六歲男生嚟講更加成熟添，所以我想搵佢做宿生長，一方面可以單對單照顧佢，另外仲可以俾啲責任佢，等佢可以生活上有多啲寄托，仲可以令佢對宿舍有家嘅歸屬感。」

這時，一位坐在中央的中年女性陰沉地提問：

「其他人有無咩意見？任Sir，佢將會係你嗰班嘅學生，你都俾啲意見？」

另一邊的中年男性聽到她的語氣，見她眼神一直留在自己桌上的文件，那是學校唯一一位校董今早才突然寄來的親筆信，她會帶同信件出席會議，應該與單卓龍有關，甚至乎她內心早已計劃好如何處理。任Sir看準這位校長的心思，小心說話：





「我覺得Man Sir呢個建議好好，我哋應該從學校生活上多啲配合去照顧佢，既然校董都願意承擔佢三年嘅生活開支，我哋都應該主動一啲去幫助佢去投入返學校嘅生活。」
任Sir說後，Man Sir也微笑點頭，可是在他身邊的一位女士突然說著：

「但係聽聞佢喺學校都係個問題學生，可能會面對好多欺凌嘅問題喎？」

無心的說話，令Man Sir瞪了她一眼，她吃了一驚。還沒有等Man Sir說話，校長的視線已離開了重要的信件，嚴厲說道：

「咩嘢欺凌？」

這時眾人也微微嘆了口氣，只有訓導主任小心翼翼回道：





「無……無咩大問題，校長，我哋會處理好。」

怎料校長變得更加嚴厲道：

「莫主任，我問緊嘅係咩嘢欺凌？發生咩事？」

此時眾人也無法回應，她再問：

「Miss葉，頭先妳提到單卓龍同學係問題學生，又提到欺凌，我想問妳係咪聽到啲咩事？」





Miss葉聽著不禁發寒，原來大家也不知道的嗎？這時身邊的Man Sir輕輕在桌下豎起食指，微微地搖晃著。可是這舉動令Miss葉更加迷糊，是說不得嗎？

「……我……我都係擔心有啲咁嘅事啫。」

說後，會議上的緊張氣氛還沒有平靜下來，一直在等待校長的回應……

「Miss葉……」

「係……」

「作為負責女宿生嘅妳，雖然只係入職咗兩個月，但我好希望妳可以小心去處理從學生身上聽到嘅每一件事。妳經驗尚淺，如果聽到一啲誤傳返嚟嘅消息，而且仲信以為真，咁會好影響同事同學生對妳嘅信任同專業，所以請妳下次小心自己嘅言行……」

「係……校長……」





Miss葉垂下頭來，帶震的嘴唇說後，再也不敢說話。校長再道：

「Man Sir！你係佢上司，你應該好好指引佢嘅工作，我想你都注意一下，好嗎？」

聽著，Man Sir也微微嘆了口氣，嚴肅回道：

「知道。」

校長聽後還是搖搖頭，這時任Sir卻突然提道：

「關於卓龍嘅事，Miss貝係佢之前嘅班主任，我可以問多啲關於佢嘅事，宜家佢哋一齊去咗學長訓練營，Miss貝應該會清楚啲佢嘅情況，之後我同Man Sir、Miss貝都會好好配合。」

雖然任Sir刻意為Man Sir說話，可是校長還是不放心，視線又落在那封親筆信上。

(待續)





香港區訂購實體本：
https://www.penana.com/product/43