[那年微訊的他] 一個差點/已經 戀上人夫的故事: 2. 他還未出現之前
「對唔住。我今日嚟唔到見你，我媽媽有事要入醫院。我地下次再約好無?」- 柱男
「唔緊要啦你媽咪身體緊要，下次先啦咁 (:」我心諗洗唔洗驚見我驚到作阿媽入醫院呀仆街?
女人就係口不對心嘅表表姐，口話唔緊要下次見但其實心入面已經用盡四字真言鬧均你全家同下決心要向你報仇。請各位用心銘記: 令得罪小人，莫得罪女人。
當時我已經係去緊佢屋企嘅途中，佢突然咁樣殺我一個措手不及我只好搵另一個人陪: 阿晞。我即刻send個訊息俾阿晞問佢得唔得閒陪我去唱K。聽落去我好賤格搵人攝時間，但當時我真係只想有人陪我，而阿晞亦答應會盡快出門口同我見面。我認我衰仔當人水泡請大家盡情鬧我啦!
由於我一早出咗門口所以我自己去攞房先(K房唔係爆房)。其實我對自己嘅歌喉無自信我有一把比較低沉嘅聲同可愛又嗲嘅女仔完全唔一樣，但係外國咁耐無得唱K 我已經唔會介意人地對我嘅目光我只係想盡情咁去唱曬我腦海入面儲咗一年嘅歌單。我仍然記得當時我唱緊周國腎個首「漢城沉沒了」，去到高潮位突然電話響起。
「喂?我唔識點行去喎教下我啦!」我聽到阿晞把聲嘅時候呆咗因為平時我哋只係用微訊溝通從來無聽過聲。
「你轉右手面入大廈再搭lift就到嫁喇! 我係2016號房喎。」過咗無幾耐阿晞就到。
佢唔算高但應該有170。已經對佢衣著無乜印象，應該係普通t-shirt 牛仔褲。由於k房太暗所以我都無認真去留意佢個樣但記憶中佢係單眼皮,個鼻有啲大,面細細。
見到佢我唔知講乜好，大家都互望咗幾秒先俾到反應。
「做咩唔出聲呀? 」男方首先開口
「我唔知講乜喎，不如你點歌啦我都唱咗好耐」跟住佢就坐咗係度揀歌，而我就唔再夠膽再大大聲咁唱我啲走音歌。
佢唱嘅第一首歌係 A-Lin 嘅 給我一個理由忘記。我記得咁清楚係因為佢唱歌真係幾好聽。我個陣諗全晚由得佢一個唱我會自動收皮。
「你唱得好好聽下喎，你叫我點好意思係你面前唱呀...」
「我只係唱到女仔歌，反而男仔歌我就唱唔到上去」之後我地傾咗陣計 又係個啲返學返工去旅行。
阿晞大我3年倒 佢係做甜品嘅 (其他無乜印象)佢話得閒可以返大陸唱k因為抵好多。
一開始我覺得自己好好彩無遇到變態佬，至少阿晞係正正常常嘅年輕人。
點知過一陣佢就嚟了。
本來我地坐嘅位置係隔咗2個身位，點知佢去完一個廁所返嚟就坐咗係我隔離，零距離。
我無反抗因為我個陣貪玩我想睇下一個男仔可以去到幾盡。
記得以前睇過條片講男仔同男仔唱K，會唱陳奕迅同LMF但如果有女仔在場就會唱悲情歌去以示自己係一個痴情人。阿晞就係不斷咁唱啲愛到要生要死無乜內涵嘅失戀歌。
我係隔離得閒唱一兩句但多數時間係聽佢唱，反正佢唱得真係唔錯我好似聽緊私人音樂會。
聽聽下我開始感覺到佢隻手慢慢搭落我膊頭，我忍因為我都幾享受。
然後佢又將隻手移落少少攬住我條腰，呢個行為我唔會忍。
「你都幾順手喎成日咁樣媾女仔嫁? 」我一邊笑住講一邊將佢隻淫手移開。
「都係想大家熟落啲姐」佢細細聲咁回答之後我地繼續各有各唱無乜交流，我個陣心諗只要過多陣就可以返屋企訓真係開心。只可惜我係一個入世未深嘅細佬女，我諗少咗。
「我有啲攰想返屋企喇。」唱咗只有四個鐘，但可能因為我未調教好香港時間所以我早就想訓。
「好呀咁賣單之後一齊返屋企啦！」如果各位仍記得我係用微訊附近的人呢個功能搵人嘅所以我同阿晞都住同一區。
大家AA制俾完錢就搵車返去。記憶中我地唱到一點半無得搭地鐵要搵紅van。本來分開行但佢又慢慢地痴近之後拖我隻手。我個晚先知道原來香港男仔咁進取會一晚之內攬腰拖手，都係個句我只係個入世未深嘅小妹妹因為原來呢啲只係前戲。
我地行到去小巴站嘅時候我就問：「其實你做咩拖住我？」
「我以為你會驚嘛。咁夜條街又無乜人，你唔怕咩？」
「怕嫁！最怕你食咗我。」呢句說話諗起都覺得自己講錯，因為佢聽完之後好似仲興奮。
我地由本來嘅拖手變成佢從後抱住我，將個頭放係我膊頭。依家嘅我會一把車落去再加句: 食屎啦淫蟲！然後轉身離去。可惜我個陣覺得佢嘅擁抱好溫暖好舒服，所以我地靜靜地用呢個姿勢企咗陣。原來我真係咁傻，俾一個第一日見嘅男仔咁樣抽水。
最後紅van無影所以我地去搭的士。我坐左面靠窗而佢就坐係中間位。上到車我地十字緊扣，手放係佢大脾。佢拍拍自己膊頭示意我挨落去，我好聽話照做。就係咁我一路訓，過咗一陣佢又手痕開始將我地拖住嘅手放上我大脾。佢慢慢地摸上去我嘅敏感位置。我下意識用另一隻手阻止佢，以防佢不斷進攻。我阻止過後佢就停手，而我又回到我嘅夢鄉。