十六歲但非處子身嘅女孩: 11.3 如何

鈴鈴鈴...............鈴鈴鈴...............
鐘聲響起，夠鐘上第一堂，我雙手撐洗手盤，仰起頭，見到臉上面嘅水珠一滴一滴咁流落黎
我攞紙巾印乾水珠，然後低著頭咁離開廁所

「Anki，你係咪唔舒服？你見點樣？」我喺走廊到見到Reese 經過，佢好心慰問我
「我冇事，只係呢幾日唔夠瞓，個人有d 攰啫」我強顏歡笑，用同一個藉口回答
我將我所有心情全部都寫曬喺塊面到，個個經過都會問下我發生咩事，但係我通通到以同一個藉口迴避
我依然都係好擔心Cyrus 發生咩事，我唔想因為我而害咗Cyrus，亦都好擔心今日放學點同Rick 坦白

返到班房，我坐返埋座位，喺櫃桶裡面攞本通識書出黎，就喺呢個時候，有人拍拍我左邊嘅膊頭


我照常理咁望向左邊，但係又冇人，之後回頭一望，就見到Cyrus 出現喺我面前
佢蹲喺我座位前面，雙手平放喺枱上面，望實我

「點解.....點解你會喺到嘅？」我十分驚訝，當我聚精會神諗緊Cyrus 嘅同時，佢就即刻出現喺我面前，就好似我會念力召喚佢出黎咁
「今日係星期三，呢到又係我班房，點解我唔可以喺到？」Cyrus 仲有心情同我講笑，好似完全唔擔心咁
「頭先你都唔喺到，你而家又喺到，唔係，errr.......我唔知呀」我俾佢嚇到連自己本身想講咩都組織唔到
「你頭先衝咗出去廁所呀嘛，我睇到曬啦，我係遲到返黎啫，又唔係唔返學，做咩呀？好掛住我？」我同佢嘅對話好曖昧，雖然我已經有男朋友，但係同Cyrus 都係保持唔到適當嘅距離，什至喺學校咁多人面前都有時會忍唔住

「唔係喎，我係諗緊做咩有人偷懶唔返學咋喎」女人最叻就係口不對心
「唔係咁算囉」Cyrus 企起身跟住離開，「咪住！」我細細聲喝停佢，費時引起太多人注目



與此同時，一個年過半百嘅中年呀叔李sir 已經黎到班房「返埋位啦，我地上堂啦」
Cyrus 拎轉頭向我單眼微笑，跟住走過去喺三排之後嘅座位
佢返黎帶俾我突如其來嘅驚喜，令我要重新考慮同唔同Rick 攤牌好，既然Cyrus 都冇事，咁其實都冇攤牌嘅需要啫
雖然長期咁呃住呀Rick ，但係我同佢而家見面少咗，共同話題都少咗，其實都唔洗放咁多時間同心機喺Rick 身上，終有一日感情淡咗，大家都明白，就會分開，冇謂俾佢知道我係個一腳搭兩船嘅賤女人，我唔想背上呢個惡名

我對住Rick 已經冇曬嗰種愛佢嘅感覺，感覺上就好似我當Rick 只係一個攝時間嘅工具人，我唔想做開口講分手，唔想俾人話派綠帽嘅臭雞
我地唔夾，唔再互相愛對方嗰陣，自自然然就會分開，我係俾綠帽Rick 戴，但係我會用我地分手前餘下嘅時間去補償俾Rick
當我良心發現又好，想盡女朋友最後嘅責任又好，其實一切我都係為咗我自己，我唔想分開嗰陣俾人睥視



落堂之後， 我行出去locker 放低啱啱嘅書，我低頭執野，左翻右翻，擺平倒下嘅書本
「喂！」有人喺我後面拍一拍我屎忽，啪一聲，我情急之下輕聲一叫「啊」然後拎轉頭見到Cyrus

「估唔到你喺學校都咁放盪喎」佢又露出佢奸笑嘅樣
「你都知呢到係學校咩？咁多人經過你就唔好咁整啦」嬲佢又唔係，笑又唔係，對住佢呢個樣，我都唔知好嬲定好笑
「你唔係好想見到我㗎咩？做咩又扮怕羞喎」Cyrus 愈哄愈埋，佢一隻手拑住locker，另一隻手插住褲袋，上身向前傾，喺locker 嗰到將我壁咚
「我驚琴日我黎你屋企嘅事俾你呀媽發現，我驚你又話要轉校」我唔敢直線Cyrus，我從眼尾望到Cyrus目不轉睛咁瞪住我
「冇事呀，佢返咗入房休息之後就冇再出過黎」

我忍唔住望住Cyrus，佢用情深嘅眼神同我互相對望，不過理智話俾我聽，呢到係學校，絕對唔可以做d 過份嘅行為，更何況我怕我會俾其他識呀Rick 嘅人見到，我再次迴避Cyrus 嘅目光

「Anki，其實..........我.......」Cyrus 講野斷斷續續，我知道佢下一刻會問一d 我解答唔到嘅難題
「我想知道你會唔會為咗我...........同............同Rick....」
我四周張望，咁啱見到Reese 由女廁行緊過黎我班房呢邊，我細細力推開Cyrus，然後離開
「走廊到好多人，我地遲d 再講」



冇錯，我又再次逃避現實，明知道Cyrus 係問我會唔會為咗佢而同Rick 分手，但係我唔識答，我今日仲應承咗同Rick一齊走，放學又要應付Rick，我可以避到幾時？